ކްލަބް މޯލްޑިވްސް ކަޕްގައި ރޭ ކުޅުނު މެޗުތަކަށް ފަހު ގްރޫޕްގެ އެއް ވަނަ ޓީމުގެ ގޮތުގައި އެމްޕީއެލް އާއި ސްޓެލްކޯ ކްލަބް ގްރޫޕް ސްޓޭޖު ނިންމާލިއިރު، ޔޫތު މިނިސްޓްރީ 2-1 އިން ބަލިކޮށް ކަސްޓަމްސް ރެކްރިއޭޝަން ކްލަބް މުބާރާތުގެ ދެ ވަނަ ބުރުން ފުރުސަތު ހޯދައިފި އެވެ.
ސްޓެލްކޯ އިން ވަނީ ގްރޫޕް އީގައި ރޭ ކުޅުނު މެޗުން ރާއްޖެ އޮންލައިން ކްލަބް އަތުން 6-1 އިން މޮޅުވެފަ އެވެ. އެ ގްރޫޕްގެ އަނެއް މެޗުން ހޯމްއެފެއާޒް އަތުން 15-2 އިން ޓީމު އެފްއެސްއެމް މޮޅުވިއިރު، ގްރޫޕްގެ އެއް ވަނަ ސްޓެލްކޯ އަށް ލިބުނީ އެފްއެމްއެމްއާ އެއްވަރަށް ތިން މެޗުން ހަތް ޕޮއިންޓް ލިބުނު ނަމަވެސް ލަނޑުގެ ތަފާތުންނެވެ. ތިން ވަނަ އަށް ދިޔައީ ތިން މެޗުން ތިން ޕޮއިންޓް ހޯދި ރާއްޖެއޮންލައިން އެވެ. އަދި ފުލަށް ދިޔަ ހޯމްއެފެއާޒަށް ތިން މެޗުން ޕޮއިންޓެއް ނުލިބެ އެވެ.
ހޯމް އެފެއާޒް ކުޅުންތެރިއަކު ކައިރިން އެފްއެސްއެމްގެ ޒިޔާން (ކ) ބޯޅަ ހިފައިގެންދާން މަސައްކަތް ކުރަނީ.--- ފޮޓޯ: އަބްދުﷲ އިޔާން/ އަދަދު
ރޭގެ މެޗަށް ނުކުތްއިރު، ވެސް އެމްޕީއެލަށް ދެ ވަނަ ބުރުގެ ޖާގަ އޮތީ ޔަގީންވެފަ އެވެ. އެކަމަކު، ކްލަބް އާސަންދަ އަތުން 7-0 އިން މޮޅުވެ، އެމްޕީއެލް ދެ ވަނަ ބުރުގެ ފުރުސަތު ހޯދީ ގްރޫޕް އެފްގެ އެއް ވަނަ ޓީމުގެ ގޮތުގައި ތިން މެޗުން ނުވަ ޕޮއިންޓާ އެކު އެވެ. ގްރޫޕްގެ ދެ ވަނަ ޓީމުގެ ގޮތުގައި ދެ ވަނަ ބުރުގެ ޖާގަ ލިބެން އޮތީ ކަސްޓަމްސް އާއި ޔޫތު މިނިސްޓްރީ މެޗުން މޮޅުވާ ޓީމަކަށެވެ. އެ މެޗުން މޮޅުވެ، ކަސްޓަމްސް ދެ ވަނަ ހޯދީ ތިން މެޗުން ހަ ޕޮއިންޓާ އެކު އެވެ. ތިން ވަނަ އަށް ދިޔަ ޔޫތު މިނިސްޓްރީ އާއި ހަތަރެއްގައި ނިންމާލި އާސަންދަ އަށް ލިބުނީ ތިން މެޗުން ޕޮއިންޓެކެވެ.
އެމްޕީއެލް އިން ޖެހި ހަތް ގޯލުގެ ތެރެއިން އިބްރާހިމް އިމްރާހު ވަނީ ދެ ގޯލު ޖަހައިފަ އެވެ. އަނެއް ފަސް ގޯލު ޖެހީ، ހަސަން ނިމާލް، މުހައްމަދު ޔަފާއު، ސިނާން އިބްރާހިމް ރަޝީދު، އަހުމަދު ހުސެއިން އަދި އަލީ ޝަމާލް އަބްދުﷲ އެވެ.
ކަސްޓަމްސް އިން ޔޫތު މިނިސްޓްރީ ކޮޅަށް ލީޑުނެގީ އަލީ ޝަމާލް އަބްދުﷲ ޖެހި ގޯލުންނެވެ. ފުރަތަމަ ހާފު ނިމުމުގެ ކުރިން ފަތުހުﷲ ޖަމީލް ވަނީ ޔޫތު މިނިސްޓްރީ އަށް އެއްވަރުކޮށްދީފަ އެވެ. ގިނަ އެޓޭކްތަކެއްކޮށް، ކަސްޓަމްސް އިން ލަނޑެއް ޖަހަން ކުރި މަސައްކަތް ކާމިޔާބުކުރީ މެޗު ނިމެން ދެ މިނިޓަށް ވެފައި ހުއްޓަ އެވެ. މި ގޯލު ޖެހީ ސަރާއު ހަމީދު އެވެ.
ޔޫތު މިނިސްޓްރީ ޓީމުގެ ފަތުހުﷲ (ވ) ކަސްޓަމްސްގެ ޝަމާލް އަތުން ބޯޅަ ހޯދަން މަސައްކަތް ކުރަނީ.--- ފޮޓޯ: އަބްދުﷲ އިޔާން/ އަދަދު
ސްޓެލްކޯ އިން ރާއްޖެ އޮންލައިން ބަލިކުރިއިރު، އެ މެޗުގެ މޮޅު ކުޅުންތެރިޔާ، ސްޓެލްކޯގެ ޖުމައިލް ޖަމީލް ވަނީ ހެޓްރިކެއް ހަދައިފަ އެވެ. އަނެއް ގޯލުތައް ޖެހީ އިބްރާހިމް ރިމާހު (ރިމޭ)، ޝުއައިދު ސައީދު އަދި މުހައްމަދު ވިލްފް އެވެ. ރާއްޖެ އޮންލައިންގެ ހަމައެކަނި ގޯލު ޖެހީ ހަމްދޫން އަހުމަދު އެވެ.
ހޯމްއެފެއާޒުން މުބާރާތް ނިންމާލިއިރު، 36 ގޯލު އެ ޓީމު ކޮޅަށް ވަނެވެ. މިއީ މި ފަހަރުގެ މުބާރާތުގައި ބައިކޮޅަށް އެންމެ ގިނަ ގޯލު ވަން ޓީމެވެ. ރޭ އެފްއެސްއެމް އިން ހޯމް އެފެއާޒް ކޮޅަށް ޖެހި ގޯލުތަކުގެ ތެރެއިން، މެޗުގެ މޮޅު ކުޅުންތެރިޔާގެ މަގާމު ހޯދި މުހައްމަދު ނާފިއު އިބްރާހިމް (ނާއްޕެ) ވަނީ ދެ .ހެޓްރިކް ހަދައިފަ އެވެ. އަނެއް ގޯލުތައް ޖެހީ އަހުމަދު ވިޖުދާން (ވިޖޫ) އާއި އަބްދުﷲ ޒިޔާން އަދި މުހައްމަދު ޖުމާން، ކޮންމެ ކުޅުންތެރިއަކު ދެ ގޯލާއި އިސްމާއިލް ޝައިހާނާއި އަހުމަދު ނަސާތު އެވެ.
ރޭގެ މެޗުގައި ހޯމްއެފެއާޒްގެ ގޯލުތައް ޖެހީ ހަސަން ޖައުފަރު އާއި ޒައިދާން އަބްދުﷲ އެވެ.
