މެންޗެސްޓާ (އޮކްޓޫބަރު 20) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑުން 2-0 އިން ޓޮޓެންހަމް ހޮޓްސްޕާސް ބަލިކުރިއިރު، ޑާވިން ނޫނޭޒްގެ ގޯލުން ލިވަޕޫލުން 1-0 އިން ވެސްޓް ހޭމް ޔުނައިޓެޑް އަތުން މޮޅުވެއްޖެ އެވެ.
ލީގުގައި ރޭ ޗެލްސީ ކުޅުނު މެޗުން ރަށުންބޭރުގައި ވަނީ ބްރެންޓްފޯޑާ ލަނޑެއް ނުޖެހި 0-0 އިން އެއްވަރުވެފަ އެވެ. އަދި ނިއުކާސަލް ޔުނައިޓެޑުން ވަނީ 1-0 އިން އެވަޓަންގެ މައްޗަށް ކުރިހޯދައިފަ އެވެ.
ލީގުގެ އެއް ވަނައިގައި އޮތް އާސެނަލާއި މެންޗެސްޓާ ސިޓީ މި ބުރުގައި ނުކުޅެ އެވެ. އާސެނަލަށް 10 މެޗުން 27 ޕޮއިންޓް ލިބިފައިވާއިރު، ސިޓީ އަށް 10 މެޗުން ވަނީ 23 ޕޮއިިންޓް ލިބިފަ އެވެ. ރޭ ޔުނައިޓެޑް އަތުން މޮޅުވެގެން ދެ ވަނަ އަށް އެރެން އޮތް ޓޮޓެންހަމް ތިން ވަނައިގައި އޮތީ 11 މެޗުން 23 ޕޮއިންޓް ހޯދައިގެންނެވެ. ހަތަރު ވަނައިގައި ޗެލްސީ އޮތީ 10 މެޗުން 20 ޕޮއިންޓާ އެކު އެވެ.
ފަސް ވަނައިގައި އޮތް ޔުނައިޓެޑަށް 10 މެޗުން 19 ޕޮއިންޓް ލިބިފައިވާއިރު، ހަ ވަނައިގައި ނިއުކާސަލް އޮތީ 11 މެޗުން 18 ޕޮއިންޓާ އެކު އެވެ. ލީގުގައި މި ފަހަރު ފުރަތަމަ ފަހަރަށް ޖެހިޖެހިގެން ދެ މެޗުން މޮޅުވި ލިވަޕޫލް ހަތް ވަނައިގައި އޮތީ 10 މެޗުން 16 ޕޮއިންޓް ހަމަކޮށްގެންނެވެ.
ރޭގެ މެޗުގައި ލިވަޕޫލްގެ ހަމައެކަނި ގޯލު ޖެހީ 22 ވަނަ މިނިޓްގައި ނޫނޭޒް އެވެ. މިއީ ކޮސްޓާސް ސިމިކާސް ނެގި ހުރަހަކުން ނޫނޭޒް ބޮލުން ޖެހި ގޯލެކެވެ. ނޫނޭޒް އިތުރު ގޯލެއް ޖަހަން ފޮނުވާލި އެއް ހަމަލާ ދަނޑިއަށް އަމާޒުވިއިރު، އަނެއް ޝޮޓް ވެސްޓް ހޭމް ކީޕަރު ލޫކަސް ފަބިއާންސްކީ ވަނީ މަތަކޮށްފަ އެވެ. ލިވަޕޫލްގެ މުހައްމަދު ސަލާހަށް ގޯލު ޖަހަން ލިބުނު ފުރުސަތުތަކުގައި ޖެހި ބޯޅަތައް ގޯލާ ސީދާނުވެ އެވެ.
ވެސްޓް ހޭމްގެ ކީޕަރު ފަބިއާންސްކީ (ކ) ކައިރިން ލިވަޕޫލްގެ ނޫނޭޒް ބޯޅަ ހޯދަން މަސައްކަތް ކުރަނީ.-- ފޮޓޯ: އޭއެފްޕީ
ވެސްޓް ހޭމް އަށް އެއްވަރުކޮށްދޭން އެ ޓީމުގެ ޖެރޮޑް ބޮވެން ޖެހި ޕެނަލްޓީ ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ. މިއީ ބޮވެން އަށް ލިވަޕޫލްގެ ޖޯ ގޯމޭޒް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ދިން ޕެނަލްޓީ އެކެވެ.
ޔުނައިޓެޑުން ރޭ ޓޮޓެންހަމް ކޮޅަށް ދެ ގޯލު ވެސް ޖެހީ ދެ ވަނަ ހާފުގަ އެވެ. ފުރަތަމަ ހާފުގައި ޔުނައިޓެޑްގެ ފްރެޑް އާއި މާކަސް ރެޝްފޯޑް ފޮނުވާލި ހަމަލާތައް ޓޮޓެންހަމްގެ ކީޕަރު ހޫގޯ ލޮރީސް މަތަކުރި އެވެ. އެކަމަކު، ދެ ވަނަ ހާފު ފެށިގެން ކުޑައިރުކޮޅެއްގެ ތެރޭގައި ޔުނައިޓެޑުން ލީޑުނެގީ ފްރެޑް ޖެހި ގޯލަކުންނެވެ. އޭރިއާބޭރުން ފްރެޑް ޖެހި ބޯޅަ ގޯލަށް ވަނީ ޓޮޓެންހަމްގެ ކުޅުންތެރިއަކު ފައިގައި ޖެހިފަ އެވެ.
ޓޮޓެންހަމް އިން ނަތީޖާ ހަމަހަމަކުރަން ކުރިއަށް އަރައި ތިބި ވަގުތެއްގައި ޔުނައިޓެޑުން ކުރި އަވަސް އެޓޭކެއްގައި އެ ޓީމުގެ ދެ ވަނަ ގޯލު ޖެހީ ބްރޫނޯ ފެނާންޑޭސް އެވެ. ފެނާންޑޭސް އޭރިއާތެރެއިން ޖެހި ބޯޅަ އަމާޒުވީ ގޯލުގެ ކަނަށެވެ.
މިދިޔަ ސީޒަނުގައި ޔުނައިޓެޑުން ޓޮޓެންހަމް ބަލިކުރީ ކްރިސްޓިއާނޯ ރޮނާލްޑޯގެ ހެޓްރިކުންނެވެ. ރޭގެ މެޗުގައި ރޮނާލްޑޯ އިނީ ބެންޗުގަ އެވެ. އަދި މެޗުގެ 89 ވަނަ މިނިޓްގައި ޔުނައިޓެޑުން ކްރިސްޓިއަން އެރިކްސަން އާއި އެންތަނީ އެލަންގާ ކުޅެން އެރުވި ވަގުތު، ރޮނާލްޑޯ ވަނީ ދަނޑުން ގޮސްފަ އެވެ. މެޗަށް ފަހު، ޔުނައިޓެޑްގެ ކޯޗު އެރިކް ޓެން ހާގް ބުނީ މެޗު ނުނިމެނިސް ދިޔަ ސަބަބު އޮޅުންފިލުވަން ރޮނާލްޑޯއާ ވާހަކަ ދައްކާނެ ކަމަށެވެ.
