ކްލަބް މޯލްޑިވްސް ކަޕްގައި ރޭ ކުޅުނު މެޗުތަކަށް ފަހު ޔުނައިޓެޑް ބީއެމްއެލް ޖެހިޖެހިގެން ދެ ވަނަ ފަހަރަށް ގްރޫޕް ސްޓޭޖުން ކެޓިއިރު، އެއާޕޯޓްގެ ތިން ޓީމު ކަމަށްވާ، ކްލަބް އެއާޕޯޓްސް އާއި އެމްއޭސީއެލް އަދި ކްލަބް އޭވިއޭޝަން ސެކިއުރިޓީ މުބާރާތުގެ ދެ ވަނަ ބުރުން ވަނީ ފުރުސަތު ހޯދައިފި އެވެ.
ގްރޫޕް ސީގައި ރޭ ޓްރޭޑް ކްލަބް އަތުން އޭވިއޭޝަން ސެކިއުރިޓީ މޮޅުވީ 2-1 އިންނެވެ. އެ ގްރޫޕްގައި އެމްއޭސީއެލް އިން ވަނީ ޓީމު ޑީޖީއޭ 5-2 އިން ބަލިކޮށްފަ އެވެ. ރޭގެ މެޗަށް ނުކުތްއިރު ވެސް ގްރޫޕް ޑީން ދެ ވަނަ ބުރު ޔަގީންވެފައި އޮތް ޓީމު ފެނަކަ އިން ވަނީ 3-1 އިން ކްލަބް އެއާޕޯޓްސް ބަލިކޮށްފަ އެވެ. އެ ގްރޫޕްގެ އަނެއް މެޗުން ބީއެމްއެލް އިން ޓީމު ސިވިލް ކޯޓު 4-1 އިން ބަލިކުރި ނަމަވެސް ލަނޑުގެ ތަފާތުން ބީއެމްއެލް ވަނީ ކަޓައިފަ އެވެ.
އެމްއޭސީއެލް ގްރޫޕް ސީގެ އެއް ވަނަ ހޯދީ ދެ ވަނަ އަށް ދިޔަ އޭވިއޭޝަން ސެކިއުރިޓީއާ އެއްވަރަށް ތިން މެޗުން ހަތް ޕޮއިންޓް ލިބުނު ނަމަވެސް ލަނޑުގެ ތަފާތުންނެވެ. މި ގްރޫޕްގެ ތިން ވަނަ އަށް ދިޔަ ޑީޖީއޭ އަށް ތިން މެޗުން ތިން ޕޮއިންޓް ލިބުނުއިރު، އެންމެ ފުލަށް ދިޔަ ޓްރޭޑް ކްލަބް ނިންމާލީ ޕޮއިންޓެއް ވެސް ނުލިބި އެވެ.
އެމްއޭސީއެލްގެ ސަނޫން ރޭގެ މެޗުގެ ތެރެއިން ބޯޅަ ހިފައިގެން.--- ފޮޓޯ: އަދަދު
ފެނަކަ އިން ގްރޫޕް ސްޓޭޖު ނިންމާލީ ސައްތަ އިން ސައްތަ ރެކޯޑަކާ އެކު އެވެ. ތިން މެޗުން ވެސް މޮޅުވެ، ނުވަ ޕޮއިންޓް ހޯދިއިރު، މި ގްރޫޕްގެ ދެ ވަނަ އަށް ދިޔަ ކްލަބް އެއާޕޯޓްސް އާއި ބީއެމްއެލް ވަނީ ޕޮއިންޓުގެ ގޮތުން ތިން މެޗުން ހަތަރު ޕޮއިންޓް ލިބި އެއްވަރުވެފަ އެވެ. ކްލަބް އެއާޕޯޓްސް އަށް އަނެއް ބުރުން ފުރުސަތު ލިބުނީ ބީއެމްއެލް އަށް ވުރެން އެއް ފައިދާ ގޯލު އިތުރު ވުމުންނެވެ. ޓީމު ސިވިލް ކޯޓު މުބާރާތުން ކެޓީ ތިން މެޗުން ވެސް ބަލިވެ، ޕޮއިންޓެއް ވެސް ނުލިބި އެވެ.
ރޭގެ މެޗުގައި އެމްއޭސީއެލް އިން ޑީޖީއޭ ކޮޅަށް ޖެހި ފަސް ގޯލުގެ ތެރެއިން ތިން ގޯލު ޖަހައި، އަބްދުﷲ ސުޒޭރު ވަނީ ހެޓްރިކެއް ހަދައިފަ އެވެ. އަނެއް ދެ ގޯލު ޖެހީ އިބްރާހިމް ޝަނޫން އާއި އަޒްޔާން އިބްރާހިމް އެވެ.
ބަދަލަކަށް ކުޅެން އެރިތާ މާގިނައިރެއްނުވެ، މުހައްމަދު އަޖުވަދު ސޮލާހު ވަނީ ފުރަތަމަ ހާފުގައި ޑީޖީއޭ އަށް ގޯލެއް ޖަހައިދީފަ އެވެ. އަނެއް ލަނޑު ޖެހީ ދެ ވަނަ ހާފުގައި އަބްދުﷲ ފާރިޝް އެވެ.
އިސްމާއިލް ސިޔާދު އާއި ތައުމީން ނޫހުގެ ގޯލުތަކުން އޭވިއޭޝަން ސެކިއުރިޓީން ދެ ގޯލުގެ ލީޑެއް ނަގާފައިވަނިކޮށް ޓްރޭޑް ކްލަބްގެ ހިސާން މުހައްމަދު ވަނީ މެޗުގެ ފަހު ކޮޅުގައި ގޯލެއް ޖަހައިފަ އެވެ.
ފެނަކަ ޓީމުގެ އަޔާ މި ފަހަރުގެ ކްލަބް މޯލްޑިވްސް ކަޕްގެ މެޗެއްގެ ތެރެއިން: ރޭ ކްލަބް އެއާޕޯޓްސް ކޮޅަށް އަޔާ ވަނީ ދެ ގޯލު ޖަހާފައި.-- ފޮޓޯ: އަދަދު
ނަތީޖާ ނެރެން މަޖުބޫރު މެޗަކަށް ނުކުމެ، ބީއެމްއެލް އިން ރޭ ސިވިލް ކޯޓުގެ ގޯލަށް ގިނަ ހަމަލާތަކެއް ފޮނުވާލި އެވެ. މި މެޗުގައި ބީއެމްއެލްގެ ގިނަ ހަމަލާތަކެއް ސިވިލް ކޯޓުގެ ކީޕަރު އަހުމަދު އިހުސާން ވަނީ މަތަކޮށްފަ އެވެ. މި މެޗުގައި ބީއެމްއެލްގެ ގޯލުތައް ޖެހީ މެޗުގެ މޮޅު ކުޅުންތެރިޔާ، އިބްރާހިމް ހަމްދާން (މެސީ) ހެޓްރިކަކާއި އިޝާން އިބްރާހިމް (ސައްޓު) ގޯލެކެވެ. މި ދެ ކުޅުންތެރިންނަށް ގޯލު ޖަހަން ލިބުނު ގިނަ ހުސް ފުރުސަތުތަކުން ޖެހި ޝޮޓްތައް ގޯލާ ސީދާނުވެ ވެސް ދިޔަ އެެވެ.
ސިވިލް ކޯޓުގެ ހަމައެކަނި ގޯލު ދެ ވަނަ ހާފުގައި ޖެހީ އަންސަރު އިބްރާހިމް (އަންކޮ) އެވެ.
ހުސެއިން ޝަރީފް (އޮންލީ) ބޮލުން ޖެހި ގޯލާއި އޭރިއާބޭރުން އަޔާޒް އަހުމަދު (އަޔާ)ގެ ގޯލުން ފެނަކަ އިން ރަނގަޅު ލީޑެއް ނެގިއިރު، މުހައްމަދު އަގީލް ވަނީ ގޯލެއް ޖަހައި، ކްލަބް އެއާޕޯޓްސް އަށް ފަރަގު ކުޑަކޮށްދީފަ އެވެ. ދެ ވަނަ ހާފުގައި އަޔާ ވަނީ އިތުރު ގޯލެއް ޖަހައި ފެނަކަ އަށް ތިން ޕޮއިންޓް ކަށަވަރުކޮށްދީފަ އެވެ.
