އިނގިރޭސިވިލާތުގެ ކުރީގެ އަސްކަރީ ޕައިލެޓުންނަށް ބޮޑެތި އަދަދުތަކުން ފައިސާ ހުށަހަޅައިގެން ޗައިނާގެ އަސްކަރިއްޔާއިން އެ މީހުންގެ އެހީ ހޯދަމުންދާ ކަމަށް ތުހުމަތުކޮށްފި އެވެ.
ބީބީސީއިން ރިޕޯޓު ކުރި ގޮތުގައި އިނގިރޭސި ސިފައިންގެ ކުރީގެ 30 ޕައިލެޓުން ވަނީ ޗައިނާގެ ޕީޕަލްސް ލިބެރޭޝަން އާމީގެ މެމްބަރުން ތަމްރީން ކުރުމަށް ޗައިނާއަށް ގޮސްފަ އެވެ.
އިނގިރޭސިވިލާތުން މިހާރު ދަނީ ކުރީގެ ސިފައިންގެ ޕައިލެޓުން ޗައިނާ ސިފައިންނަށް އެހީނުވުމަށް އިންޒާރުދީ ޖާސޫސީ އެލާޓުތައް ނެރެމުންނެވެ.
އޮފިޝަލުން ބުނާ ގޮތުގައި ހުޅަނގުގެ ގައުމުތަކުގެ ތަޖުރިބާކާރު ޕައިލެޓުން ހޯދައި، އެ މީހުންގެ އެހީއާ އެކު ޗައިނާގެ ސިފައިން ތަމްރީން ކުރުމަށް މަސައްކަތް ކުރާތާ އަހަރުތަކެއް ވެއްޖެ އެވެ.
އިނގިރޭސި ޑިފެންސް މިނިސްޓްރީން ބުނީ އެއީ އިނގިރޭސިވިލާތުގެ އެއްވެސް ގާނޫނަކާ ހިލާފު އަމަލެއް ނޫން ނަމަވެސް، އެކަން ހުއްޓުވުމަށް މަސައްކަތް ކުރަމުންދާ ކަމަށެވެ.
ޗައިނާއިން އެހީ ހޯދަމުންދާ ބައެއް ޕައިލެޓުންނަށް 300،000 ޑޮލަރު ހުށަހަޅާފައިވާ ކަމަށާއި ހުޅަނގުގެ މަތިންދާ ބޯޓުތަކާއި ޕައިލެޓުން އޮޕަރޭޓް ކުރާ ގޮތް އެ މީހުންގެ ކައިރިން ދަސްކުރާ ކަމަށް އޮފިޝަލުން ބުންޏެވެ.
