ޑޮކްޓަރީ ބޭހާއި މެޑިކަލް ކޮންސިއުމަބްލްސް އެއްފަހަރާ ގަނޑުކޮށް، ބަލްކް ޕްރޮކިއުމެންޓްގެ ތެރެއިން ގަންނަ ފެށުމުން އެކަމަށް ކުރަމުން އަންނަ ހޭދަ 30 ޕަސެންޓު ކުޑަވާނެ ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ސުވާލުކުރުމަށް މިނިސްޓަރު އަމީރު ހާޒިރުކޮށްފައިވާއިރު، އައްޑޫ މަރަދޫ ދާއިރާގެ މެންބަރު އިބްރާހިމް ޝަރީފް ވަނީ ސެންޓްރަލް ޕްރޮކިއުމެންޓް އޭޖެންސީއެއް ގާއިމްކުރުމުގެ ވިސްނުން ގެންގުޅޭތޯ ސުވާލުކުރައްވާފަ އެވެ.
"މިހާރު ވެސް ރާއްޖެއަށް އެންމެ ބޮޑު ގެއްލުމެއް މިވަނީ ދައުލަތަށް ބޭނުންވާ ބޭހާއި ކޮންސިއުމަބްލްސް ހެޔޮ އަގުގައި ލިބެން އޮއްވާ ސަރުކާރުން އެ މަސައްކަތް ނުކޮށް ދޫކޮށްލާފައި އޮތުމުގެ ސަބަބުން، މިހާރު 300 ނުވަތަ 400 ޕަސެންޓު ބޮޑުކޮށް މާކެޓު ރޭޓަށް ވުރެ ސަރުކާރުން އެއްޗެހި ގަންނަނީ،" އިބްރާހިމް ޝަރީފް ވިދާޅުވި އެވެ.
ޝަރީފްގެ ސުވާލަށް ޖަވާބު ދެއްވަމުން މިނިސްޓަރު އިތުރަށް ވިދާޅުވީ ބަލްކް ޕްރޮކިއުމެންޓްގެ މަސައްކަތް މިހާރު ފަށައިގެން ކުރިއަށްދާ ކަމަށެވެ.
"އަޅުގަނޑު ގަބޫލުކުރާ ގޮތުގައި ޑިސެންބަރު ޖެނުއަރީ ހާ ތަނުގައި އަޅުގަނޑުމެންނަށް ބަލްކް ޕްރޮކިއުމެންޓަށް ދެވޭނެ، މެޑިކަލް ކޮންސިއުމަބްލްސް، ބަލްކް ޕްރޮކިއުމެންޓްގެ ތެރެއިން އަޅުގަނޑުމެންނަށް ގާތްގަނޑަކަށް 30 ޕަސެންޓުގެ ހަރަދު ކުޑަ ކުރެވޭނެ ކަމަށް އަންދާޒާ ކުރެވެނީ،" އަމީރު ވިދާޅުވި އެވެ.
މީގެ އިތުރުން މިނިސްޓަރު ވަނީ މި އަހަރަށް ފާސްކުރި 37 ބިލިއަން ރުފިޔާގެ ބަޖެޓަށް ވުރެ ޑެފިސިޓު އިތުރުވެގެންދާނެ ކަމަށް ބެލެވޭ ކަމަށް ވިދާޅުވެފަ އެވެ. ސަބަބެއްގެ ގޮތުގައި މިނިސްޓަރު ފާހަގަކުރެއްވީ ތެލުގެ އަގަށް އައި ބަދަލާއި ސަބްސިޑީއަށް ކުރަން ޖެހުނު ހޭދަ ބޮޑުވުމެވެ.
"މިހާރު ރިވައިސްޑް ޑެފިސިޓެއްގެ ގޮތުގައި އަޅުގަނޑަށް މި ފާހަގަކުރެވެނީ 11 ބިލިއަން ރުފިޔާއަށް އަރައިގެން ދާނެ ކަމަށް، އަޅުގަނޑުމެން ފާސްކުރި ބަޖެޓުގެ ޑެފިސިޓަކީ 9.8 ބިލިއަން ރުފިޔާ،" އަމީރު ވިދާޅުވި އެވެ.
