ބެއިޖިން، ޗައިނާ (އޮކްޓޯބަރު 16) - ޓައިވާން މައްސަލައިގައި ޗައިނާއިން ބާރުގެ ބޭނުން ކުރުމުގެ ފުރުސަތު އަބަދުވެސް އޮންނާނެ ކަމަށް އެ ގައުމުގެ ރައީސް ޝީ ޖިންޕިން ވިދާޅުވެއްޖެ އެވެ.
ޝީ އެގޮތަށް ވިދާޅުވީ އާދީއްތަ ދުވަހު ޗައިނާގެ ވެރިކަން ކުރާ ކޮމިއުނިސްޓް ޕާޓީގެ ކޮންގްރެސް ބެއިޖިންގައި ފެށުމުގެ ގޮތުން ދެއްވި ހިތާބުގަ އެވެ.
"ޓައިވާން މައްސަލަ ހައްލު ކުރުމަކީ ޗައިނާ ރައްޔިތުން ކުރަން ޖެހޭ ކަމެއް. އަދި އެކަން ހައްލު ކުރަން ޖެހޭނީ ހަމައެކަނި ޗައިނާގެ ރައްޔިތުން ކުރާ މަސައްކަތުން. އަޅުގަނޑުމެން ބަލާނީ އިހްލާސްތެރިކަމާ އެކު ހަރުދަނާ މަސައްކަތުން ވީހާވެސް ސުލްހަވެރިކަމާ އެކު އަލުން ގުޅި އެއްބައިވުމުގެ މަސައްކަތް ކުރެވޭތޯ. އެކަމަކު ބާރުގެ ބޭނުން ކުރުމުގެ ފުރުސަތު ގެއްލުވާލުމަކަށް އަޅުގަނޑުމެން އިޖާބައެއް ނުދޭނަން. އެ އިހްތިޔާރު ބާއްވާނީ އެ ނޫން ގޮތެއް ނެތިއްޖެ ހާލަތެއްގައި އަމަލު ކުރުމަށް،" ބެއިޖިންގެ ގްރޭޓް ހޯލް އޮފް ދަ ޕީޕަލްގައި ކޮމިއުނިސްޓް ޕާޓީގެ ޑެލިގޭޓުންނާ މުހާތަބު ކުރައްވަމުން ޝީ ވިދާޅުވި އެވެ.
ޗައިނާއިން ދެކޭ ގޮތުގައި އަމިއްލަ ވެރިކަމެއް އޮންނަ ޓައިވާނަކީ ޗައިނާގެ ބަޔެކެވެ. އަދި ޓައިވާން ޗައިނާގެ ތަނެއްގެ ގޮތުގައި ބޭއްވުމަށް ބާރުގެ ބޭނުން ކުރަން ޖެހިއްޖެ ނަމަ ކުރާނެ ކަމަށް ތަކުރާރުކޮށް ބުނެފައިވެ އެވެ.
"ގައުމު އަލުން އެއްބައިވަންތަވުމާއި އަލުން އާރޯވުމުގެ ތާރީހީ ފުރޮޅު އެ ދަނީ ކުރިއަށް އެނބުރެމުން. އަޅުގަނޑުމެންގެ ލޯބިވާ މި ބިން އަލުން އެއްތަނެއްގައި ގޮތުގައި އޮންނާނެ،" ޝީ އިތުރަށް ވިދާޅުވި އެވެ.
ޝީ ވިދާޅުވީ ޓައިވާނު މައްސަލައިގައި "ބައިބައިވުން އުފެއްދުމާއި، ގުޅުމެއް ނެތް ފަރާތްތަކުން ނުފޫޒު ފޯރުވުން" ކުށްވެރި ކުރާ ކަމަށެވެ.
އޭގެ އިތުރުން ހޮންކޮންގް "ނުތަނަވަސްކަމުން ހަމަޖެހުން އޮތް ތަނަކަށް" ބަދަލުވެފައި ވާތީ ޝީ އެކަމަށް ތައުރީފް ކުރެއްވި އެވެ. ހޮންކޮންގައި ސަރުކާރާ ދެކޮޅަށް އަޑު އުފުލަމުން ދަނިކޮށް 2020 ވަނަ އަހަރު ތަންފީޒު ކުރި ގައުމީ ސެކިއުރިޓީއާ ބެހޭ ގާނޫނުގެ ދަށުން، އިދިކޮޅު އަޑު އެއްކޮށް ކަނޑުވާލި އެވެ.
ގިނަ ބަޔެއްގެ ފާޑުކިޔުން އަމާޒުވެފައިވާ ޒީރޯ ކޮވިޑް ސިޔާސަތު ދިފާއު ކުރައްވައި ޝީ ވިދާޅުވީ އެއީ "ވައިރަސް ހުއްޓުވަން ރަައްޔިތުން ކުރާ ވަރުގަދަ ހަނގުރާމައެއް" ކަމަށެވެ.
ތިން ވަނަ ދައުރެއް ޔަގީން
ރިޕޯޓުތައް ބުނާ ގޮތުގައި ކޮމިއުނިސްޓް ޕާޓީގެ ކޮންގްރެސްގެ ތެރެއިން ތިން ވަނަ ދައުރަކަށް ޕާޓީގެ ލީޑަރުކަން ޝީއާ ހަވާލުކުރައްވާނެ އެވެ. އެހެން ވެއްޖެ، އެމަނިކުފާާނު ވާނީ މާއޯ ޒެޑޯންގަށް ފަހު ޗައިނާއަށް އައި އެންމެ ބާރުގަދަ ލީޑަރަށެވެ.
ކޮންގްރެސްގައި 2،300 ޑެލިގޭޓުން ބައިވެރިވާ އިރު، ޕާޓީގެ ލީޑަރުން އިންތިހާބުކޮށް، މުހިއްމު ސިޔާސަތުތަކާ ގުޅޭ ބަހުސް ކުރުން އޮންނާނެ އެވެ.
ކޮމިއުނިސްޓް ޕާޓީގެ މުހިއްމު ޕޮލިޓްބިޔުރޯ ސްޓޭންޑިން ކޮމިޓީގެ މެމްބަރުން ވެސް ކޮންގްރެސްގައި އިންތިހާބު ކުރާނެ އެވެ. ޕޮލިޓްބިޔުރޯއަކީ ރައީސްގެ ކެބިނެޓެވެ.
ކޮންމެ 10 އަހަރެއްގެ ތެރޭގަައި ދެ ފަހަރު ބާއްވާ ކޮންގްރެސްއަކީ ލީޑަރުން އާއްމުންގެ ސަޕޯޓް ހޯދުމަށް މުހިއްމު އެއްވުމެކެވެ. އެހެން ނަމަވެސް އެނެލިސްޓުން ބުނާ ގޮތުގައި ކޮމިއުނިސްޓް ޕާޓީގެ ތެރޭގައި މިހާރު ވާދަވެރިކަމެއް ނެތެވެ. ޕާޓީގެ 20 ވަނަ ކޮންގްރެސްގައި ފެނިގެން ދާނީ އެންމެ ފެކްޝަނެއްގެ ބަހުސްތައް ކަމަށް އެ މީހުން ދެކެ އެވެ. އެއީ ރައީސް ޝީއަށް ތާއީދު ކުރާ ފެކްޝަށެވެ.
ޗައިނާގެ އެންމެ ބާރުގަދަ ތިން މަގާމު ވެސް މި ވަގުތު ފުރުއްވަނީ ޝީ އެވެ. އެއީ ކޮމިއުނިސްޓް ޕާޓީގެ ޖެނެރަލް ސެކެޓްރީކަމާއި، ސިފައިންގެ ޗެއާމަންކަމާއި ރައީސްކަމެވެ. ޝީ ތިން ވަނަ ދައުރަކަަށް މަގާމުތައް ދަމަހައްޓާނެ ކަމަށް ބެލެވޭ އިރު، މީގެ ކުރިން ތިން ދައުރު އެގޮތަށް ފުރުއްވީ ކޮމިއުނިސްޓް ޗައިނާގެ ފައުންޑަރު މާއޯ އެކަންޏެވެ.
