ޓިއުނީޝިއާގެ ރައީސް ކައިސް ސައީދްއާ ދެކޮޅަށް އަޑު އުފުލުމަށް އެތައް ހާސް ބަޔަކު ވެރިރަށް ތޫނިސްއަށް އެއްވެއްޖެ އެވެ.
މުޒާހަރާ ކުރީ މުޅިން ތަފާތު ދެ ސިޔާސީ ވިސްނުމެއްގެ މީހުން ވަކިވަކިންނެވެ. އެކަމަކު އެ ދެ ގްރޫޕްގެ މީހުން ވެސް ސައީދްއާ ދެކޮޅެވެ.
ސައީދްގެ އިސްތިއުފާގެ އިތުރުން، ގައުމަށް ދިމާވެފައިވާ އިގްތިސާދީ ކާރިސާއާ ގުޅިގެން ޖަވާބުދާރީވުމަށް މުޒާހަރާގެ ބައިވެރިން ޑިމާންޑު ކުރި އެވެ.
ގިނަ ބަޔަކު ދެކޭ ގޮތުގައި 2011 ވަނަ އަހަރު ގެނައި އިންގިލާބަށް ފަހު ތައާރަފު ކުރި އިސްލާހީ ބަދަލުތަކަށް ގޮން ޖަހައި، ސައީދް ގެންދަވަނީ ހުދުމުހުތާރް ވެރިކަމެއް ކުރައްވަމުންނެވެ.
އެގޮތުން ޖުލައި 2021 ގައި ބޮޑު ވަޒީރު ވަކިކުރައްވައި ޕާލިމެންޓް އުވާލެއްވުމަށް ފަހު، ރައީސްގެ ބާރުތައް ވަރުގަދަވާ ފަދަ އާ ގާނޫނު އަސާސީއެއް ފާސްކުރި އެވެ.
އެކަން ކުރުމަށް ޕާލިމެންޓުގައި ބޭއްވި ޖަލްސާ އިދިކޮޅުން ބޮއިކޮޓް ކުރި އެވެ. އާ ގާނޫނު އަސާސީގެ ދަށުން ވެރިކަން ހިންގުމުގެ ފުރިހަމަ ބާރާއި، ސިފައިންގެ އެންމެ މަތީ ކޮމާންޑަރުކަމާއި، ޕާލިމެންޓުގެ ރުހުން ނެތި ސަރުކާރު އުފެއްދުމުގެ ބާރު ރައީސަށް ލިބިދެ އެވެ.
ސައީދް ވިދާޅުވީ އެފަދަ ބަދަލުތަކެއް ގެންނަން ޖެހުނީ އިގްތިސާދަށް ގެއްލުންވެ، ސިޔާސީ ހަމަޖެހުން ގާއިމްނުވެ ގިނަ ދުވަސްވަމުން ދާތީ ކަމަށެވެ.
