ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގައި އިއްޔެ ހަވީރު ކުޅުނު މެޗުގައި ކްލަބް ޔޫތު މިނިސްޓްރީ އަތުން 26-0 އިން ދިވެހި ސިފައިންގެ ކްލަބް މޮޅުވިއިރު، ޓީމު ފެނަކައިން 2-1 ކްލަބް ވެމްކޯ ބަލިކޮށްފި އެވެ.
މި ފަހަރުގެ 18/30 ފުޓްސަލް ފިއެސްޓާގައި މި ފަހަރު ފަސް ޓީމު ވާދަކުރާއިރު، އެންމެ ރެކޯޑް ދަށްކޮށް ފެންނަނީ ޔޫތު މިނިސްޓްރީ އެވެ. ލީގު އުސޫލުން ކުޅޭ ބުރުގައި ޔޫތު މިނިސްޓްރީން ކުޅުނު ފުރަތަމަ މެޗުގައި ވެމްކޯ އަތުން ވަނީ 23-0 އިން ބަލިވެފަ އެވެ. ދެ ވަނަ މެޗުގައި ދިވެހި ސިފައިންގެ ކްލަބް އަތުން މި ވަނީ މާ ފަރަގު ބޮޑުކޮށް ބަލިވެފަ އެވެ.
ރެހެންދި ފުޓްސަލް ދަނޑުގެ އެއް ވަނަ ޕިޗުގައި އިއްޔެ ހަވީރު ވިއްސާރައިގެ ތެރޭގައި ކުޅުނު މެޗުގައި ސިފައިންގެ ކްލަބުން ވަނީ ކޮންމެ ހާފެއްގައި ވެސް 13 ގޯލު ޖަހައިފަ އެވެ. މި މެޗުގައި ސިފައިންގެ ޓީމަށް އެންމެ ގިނަ ގޯލު ޖަހައިދިނީ މެޗުގެ މޮޅު ކުޅުންތެރިޔާ، ބަންގްލަދޭޝް ގައުމީ ޓީމުގެ ފޯވާޑް، ސަބީނާ ހަތުން އެވެ. ސަބީނާ ވަނީ 12 ގޯލު ޖަަހައި، ހަތަރު ހެޓްރިކް ހަދައިފަ އެވެ.
އަނެއް ގޯލުތައް ޖެހީ ބަންގްލަދޭޝްގެ ފޯވާޑް، މަތުސުޝިމާ ސުމައްޔާ ހަ ގޯލާއި ރާއްޖޭގެ ގައުމީ އަންހެން ޓީމުގެ މަރިޔަމް ރިފާ ހަތަރު ގޯލާއި މައީޝާ އަބްދުލް ހަންނާނު ފާތިމަތު ތީބާ ކޮންމެ ކުޅުންތެރިއަކު ދެ ގޯލެވެ. މި މެޗުގައި ސިފައިންގެ ޓީމުން އިތުރު ގޯލުތަކެއް ޖަހަން ވެސް ރަނގަަޅު ހަމަލާތަކެއް ފޮނުވާލައިފަ އެވެ. އެކަމަކު، މިނިސްޓްރީގެ ގޯލްކީޕަރު މަރިޔަމް ސުހާ އިލްޔާސް ވަނީ އެ ބޯޅަތައް ހުއްޓުވައިފަ އެވެ.
ފުރަތަމަ މެޗުގައި ސިފައިން އަތުން ބަލިވި ފެނަކަ އިން މި ވަނީ ދެން ކުޅުނު ދެ މެޗުގައި އެންމެ ފަހުގެ ޗެމްޕިއަން، އެމްޕީއެލް އާއި ރަނަރަޕް ކްލަބް ވެމްކޯ ބަލިކޮށްފަ އެވެ. ވެމްކޯ އަތުން އިއްޔެ ހަވީރު ފެނަކަ މޮޅުވީ މުޅި މެޗުގައި ވެސް ހިތްވަރުގަދަ ކުޅުމެއް ދައްކައިގެންނެވެ.
ފެނަކަ ޓީމުގެ ރާނީ (ކ) ވެމްކޯގެ ތެނަފޯން ކައިރިން ބޯޅަ ހިފައިގެންދަނީ.-- ފޮޓޯ: ޓީމު ފެނަކަ
ވެމްކޯ އިން ފުރަތަމަ ހާފުގައި ޑަރިކާގެ ގޯލުން ލީޑުނެގި ނަމަވެސް ފެނަކައިން ނަތީޖާ އަނބުރާލީ ދެ ވަނަ ހާފުގައި ދެ ގޯލު ޖަހައިގެންނެވެ. މެޗުގެ 28 ވަނަ މިނިޓްގައި ރާނީ ފެނަކަ އަށް އެއްވަރުކޮށްދިންއިިރު، އެ ޓީމު މޮޅުކޮށްދިން ގޯލު ޖެހީ އައިޝަތު ސަމާ އެވެ.
ލީގު އުސޫލުން ކުޅޭ ބުރުގެ އެންމެ ކުރީގައި މި ވަގުތު އޮތީ ދިވެހި ސިފައިންގެ ކްލަބް އެވެ. އެއީ ދެ ވަނައިގައި އޮތް ފެނަކައާ އެއްވަރަށް ޕޮއިންޓް ލިބިފައިވީ ނަމަވެސް ލަނޑުގެ ތަފާތުން ކުރިލިބޭތީ އެވެ. ސިފައިންނަށް ދެ މެޗުން ހަ ޕޮއިންޓާއި ފައިދާ 30 ގޯލު އޮތްއިރު، ފެނަކަ އަށް ތިން މެޗުން ހަ ޕޮއިންޓް ލިބުނުއިރު، އަދި ފައިދާ ގޯލެއް ނެތެވެ. ތިން ވަނައިގައި ވެމްކޯ އޮތީ ތިން މެޗުން ހަތަރު ޕޮއިންޓާ އެކު އެވެ. ހަތަރު ވަނައިގައި އެންމެ ފަހުގެ ޗެމްޕިއަން އެމްޕީއެލް އޮތީ ދެ މެޗުން އެއް ޕޮއިންޓާ އެކު އެވެ. ކުޅުނު ދެ މެޗުން ވެސް ބޮޑު ތަފާތަކުން ބަލިވެ، މިނިސްޓްރީ އޮތީ ޕޮއިންޓެއް ނުލިބި ތާވަލުގެ ފުލުގަ އެވެ.
ލީގު ބުރަށް ފަހު އެއް ޓީމު ކަޓައި، އަނެއް ހަތަރު ޓީމު ސެމީ އަށް ދާނެ އެވެ. ފުރަތަމަ ސެމީގައި އެއް ވަނަ އާއި ހަތަރު ވަނަ ކުޅޭއިރު، ދެ ވަނަ ސެމީގައި ކުޅޭނީ ދެ ވަނަ އާއި ތިން ވަނަ ޓީމެވެ.
