މިހާރު ކުރިއަށްދާ ކްލަބް މޯލްޑިވްސް ކަޕްގައި ރޭ ކުޅުނު މެޗުތަކުން ޓީމު ފެނަކަ އާއި އެމްޕީއެލް އަދި ޓީމު ޑީޖީއޭ މޮޅުވެއްޖެ އެވެ.
އެމްޕީއެލް އާއި ފެނަކަ ދެ ވަނަ މޮޅު ހޯދިއިރު، މިއީ ޓީމު ޑީޖީއޭ އަށް ފުރަތަމަ މެޗުގެ ނާކާމިޔާބީ އިން އަރައިގަންނަން ލިބުނު ރަނގަޅު މޮޅެކެވެ.
ފެނަކަ އިން ވަނީ ރޭ ކުޅުނު މެޗުގައި ޓީމު ސިވިލް ކޯޓު 8-2 އިން ބަލިކޮށްފަ އެވެ. އެމްޕީއެލް އިން ޔޫތު މިނިސްޓްރީ ބަލިކުރީ 4-0 އިންނެވެ. ޓްރޭޑް ކްލަބްގެ މައްޗަށް ޓީމު ޑީޖީއޭ ކުރިހޯދީ 5-1 އިންނެވެ. އަދި އެމްއޭސީއެލް އާއި ކްލަބް އޭވިއޭޝަން ސެކިއުރިޓީ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.
ފުރަތަމަ މެޗުގައި ޔުނައިޓެޑް ބީއެމްއެމް އަތުން މޮޅުވި ފެނަކަ އިން ރޭގެ މެޗުގެ ފުރަތަމަ ހާފުގައި ވަނީ ތިން ގޯލު ޖަހައިފަ އެވެ. މި ތިން ލަނޑު ވެސް ޖެހީ ޓީމުގެ ކެޕްޓަން ހުސެއިން ޝަރީފް (އޮންލީ) އެވެ. ފަހަތަށް ކުޅެމުން އެޓޭކްގައި ބައިވެރިވެ، ރަނގަޅު ތަނަށް ހުސްވެ، އޮންލީ ޖެހީ މޮޅު ޓީމު ގޯލުތަކެކެވެ.
ސިވިލް ކޯޓުން ވަނީ ދެ ވަނަ ހާފްގެ ކުޅުން ފެށުނުތަނުން ގޯލެއް ޖަހައިފަ އެވެ. މި ލަނޑު ޖެހީ އަންސަރު އިބްރާހިމް (އަންކޮ) އެވެ. އެ ގޯލު ޖެހިތާ އިރުކޮޅެއް ފަހުން، އޮންލީ ވަނީ އިތުރު ގޯލެއް ޖަހައިފަ އެވެ. މިއީ އިބްރާހިމް މުބީން (މުއްކި) ދިން ބޯޅަ އަކުން ޖެހި ގޯލެކެވެ. ފެނަކަ ޓީމުގެ ފަސް ވަނަ ގޯލު ޖެހީ އޭރިއާބޭރުން ޖެހި ޝޮޓަކުން އަޔާޒް އަހުމަދު (އަޔާ) އެވެ. ހާޒިމް ފައުޒީ ދިން ބޯޅައަކުން އޮންލީ ވަނީ ފެނަކަ ޓީމުގެ ހަ ވަނަ ގޯލު ކާމިޔާބުކޮށްފަ އެވެ. އޮންލީ ދިން ބޯޅައަކުން ހާޒިމް ވަނީ ފެނަކަގެ ހަަތް ވަނަ ގޯލު ޖަހައިފަ އެވެ.
މެޗުގެ ފަހު މިނިޓްގައި އަންކޮ ވަނީ ސިވިލް ކޯޓުގެ ދެ ވަނަ ގޯލު ޖަހައިފަ އެވެ. އޭގެ ފަހުން، އޮންލީ ވަނީ އޭނާގެ ދެ ވަނަ ހެޓްރިކް ފުރިހަމަކޮށް، ފެނަކަ ޓީމުގެ އަށް ވަނަ ގޯލު ޖަހައިފަ އެވެ.
އެމްޕީއެލް އިން ޔޫތު މިނިސްޓްރީ ބަލިކުރިއިރު، އެ ޓީމުގެ ގޯލުތައް ޖެހީ އަހުމަދު ހުސެއިން (އައްމަޑޭ)، ސާޖިދު ރަޝީދު، މުހައްމަދު ޔަފާއު އަދި އަލީ ހައިޝަމް (ޗުމްޕު) އެވެ.
ގްރޫޕް ސީގައި ރޭ ޓްރޭޑް ކްލަބް ކޮޅަށް ޑީޖީއޭގެ ގޯލުތައް ޖެހީ މުހައްމަދު އަޖުވަދު ސޮލާހު ދެ ގޯލާއި ސައުދުﷲ އަހުމަދު، ހަސަން އިހުސާން އަދި އަބްދުﷲ ފާރިޝް ކޮންމެ ކުޅުންތެރިއަކު ގޯލެކެވެ. ޓްރޭޑް ކްލަބްގެ ހަމައެކަނި ގޯލު ޖެހީ އަބްދުﷲ އިރުފާން އެވެ.
މި ގްރޫޕްގެ އަނެއް މެޗުގައި އެމްއޭސީއެލް އާއި އޭވިއޭޝަން ސެކިއުރިޓީ ވަނީ 1-1 އިން އެއްވަރުވެފަ އެވެ. މި މެޗުގެ ފުރަތަމަ ހާފުގައި ދެ ޓީމުން ކުރެން އެއް ޓީމަކަށް ވެސް ގޯލެއް ޖެހޭގޮތެއްނުވި އެވެ. އެކަމަކު، ދެ ވަނަ ހާފް ފެށިގެން ފަސް މިނިޓް ތެރޭ، އެމްއޭސީއެލް އިން ލީޑުނެގީ އަޒްޔާން އިބްރާހިމް ޖެހި ގޯލުންނެވެ. މިއީ އޭވިއޭޝަން ސެކިއުރިޓީ ޓީމުގެ ފަހަތުން ހެދި ގޯހެއްގެ ފައިދާނަަގައި އަޒްޔާން ޖެހި ގޯލެކެވެ.
އެމްއޭސީއެލް އަށް ލީޑުހިފަހައްޓައިލެވުނީ ދެ މިނިޓެވެ. އޭވިއޭޝަން ސެކިއުރިޓީ ޓީމުގެ އިސްމާއިލް ސިއާދު ހުސްކޮށްލާފައި އެ ޓީމުގެ ތައުމީން ނޫހަށް ދިން ބޯޅަ އޭނާ ވަނީ ގޯލަށް ފޮނުވާލައިފަ އެވެ.
