ޗައިނާގެ ރައީސް ޝީ ޖިންޕިންއާ ދެކޮޅަށް ހިޔާލު ފާޅުކޮށް، ކާކުކަން ނޭނގޭ މީހަކު، އެ ގައުމުގެ ވެރިރަށް ބެއިޖިންގެ ބްރިޖެއްގައި ބެނާ ހަރުކޮށްފި އެވެ.
ޝީ ޖިންޕިން ރައީސްކަމުން ދުރު ކުރުމަށާއި ޒީރޯ ކޮވިޑް ސިޔާސަތު އުވާލުމަށް ގޮވާލައި ދެ ބެނާ ހަރުކުރީ ބެއިޖިންގެ ހައިދިއަން ޑިސްޓްރިކްޓުގެ ސިތޯންގް ބްރިޖުގަ އެވެ.
އެކަމާ ގުޅޭ ހަބަރު ދައުލަތުގެ މީޑިއާއިން ރިޕޯޓެއް ނުކުރެ އެވެ. އަދި އެ މަންޒަރު ފެންނަ ވީޑިއޯތައް ސޯޝަލް މީޑިއާގައި ދައުރުވާން ފެށުމުން ވީޑިއޯތައް ސެންސަރު ކުރުމުގެ މަސައްކަތް ކުރި އެވެ.
ޝީ ޖިންޕިންއާ ދެކޮޅަށް ބެނާ ހަރުކުރި އިރު، އޮކްޓޯބަރު 16 ވަނަ ދުވަަހު އޮންނަ ކޮމިއުނިސްޓް ޕާޓީގެ ކޮންގްރެސްގައި ތިން ވަނަ ދައުރަކަށް އެމަނިކުފާނު ރައީސްކަމުގައި ބަހައްޓަން ފާސްކުރާނެ އެވެ.
ބެނާ ހަރު ކުރުމުގެ އިތުރުން ބްރިޖު މަތީގައި ކާރުގެ ފުރޮޅުތަކެއްގައި ހުޅުޖެހުމުން ދުން އެރި މަންޒަރު ވީޑިއޯތަކުން ފެނުނެވެ. އަދި އަޑުގަދަކުރާ ބޭނުންކޮށްގެން ޝީ ޖިންޕިންއާ ދެކޮޅަށް ހިޔާލު ފާޅުކުރި އެވެ.
ރިޕޯޓުތައް ބުނާ ގޮތުން އެ ހާދިސާއާ ގުޅިގެން އެކަކު ހައްޔަރު ކުރި އެވެ. ފޮޓޯތަކުން ފެންނަނީ ބްރިޖުގައި ރީނދޫ ހެލްމެޓަކާއި އޮރެންޖް ހެދުމެއް ލައިގެން ހުރި މީހެއް ކައިރިއަށް ފުލުހުން ގޮސް ތިބި މަންޒަރެވެ.
ބެނާ ހަރުކުރި ކަމަށް ބެލެވޭ މީހާ ބްރިޖު މަތީގައި. -- ފޮޓޯ: ޓްވިޓާ
އެފަދަ ގޮތަކަށް ސަރުކާރާ ދެކޮޅަށް އާއްމު ތަނެއްގައި ހިޔާލު ފާޅުކުރުމަކީ ޗައިނާގައި ވަރަށް މަދުން ނޫނީ ނުހިނގާ ކަމެކެވެ. އެކަމަކު ޒީރޯ ކޮވިޑް ސިޔާސަތާ ހެދި ބައެއް އާއްމުންގެ ކެންތެރިކަން ވަނީ ކޮޅުންލާފަ އެވެ.
މީގެ ކުރިން 2018 ވަނަ އަހަރު ރައީސް ޝީ ޖިންޕިންގެ ޕޯސްޓަރަކަށް ގެއްލުން ދިން އަންހެނަކު، މިހާރު ބަންދުކޮށްފައި ހުރީ ނަފްސާނީ ބަލި މީހުންގެ ހޮސްޕިޓަލެއްގަ އެވެ.
