މެންޗެސްޓާ (އޮކްޓޫބަރު 14) - ޔުއެފާ ޔޫރޮޕާ ލީގުގަައި ރޭ ނޯވޭގެ ބޯޑޯ/ގިލްމް އަތުން ބުކާޔޯ ސަކާގެ ގޯލުން 1-0 އިން އާސެނަލް މޮޅުވިއިރު، ފަހު ވަގުތު ސްކޮޓް މެކްޓޮމިނޭ ޖެހި ގޯލުން ސައިޕްރަސްގެ އޮމޯނިއޯ ނިކޯސިއާ އަތުން 1-0 އިން މެންޗެސްޓާ ޔުނައިޓެޑް މޮޅުވެއްޖެ އެވެ.
ބޯޑޯ/ގިލްމްއާ ދެކޮޅަށް އާސެނަލްގެ ސަކާ ފުރަތަމަ ހާފުގެ މެދު ތެރެއިން ޖެހި ގޯލަކީ މެޗުގައި ފެނިގެންދިޔަ ހަމައެކަނި ލަނޑެވެ. އާސެނަލްގެ މިޑްފީލްޑަރު، ސަމްބީ ލޮކޮންގާ އާއި ސަކާ ގުޅިގެން އުފެއްދި އެޓޭކް ހުއްޓުވަން ބޯޑޯ/ގިލްމް ޑިފެންޑަރުން މަސައްކަތް ކުރި ނަމަވެސް ސަކާ ވަނީ ރަނގަޅު ތަނަށް ވަދެ، ގޯލު ޖަހަން ކުރި ހިތްވަރުން އެކަން ކާމިޔާބުކޮށްފަ އެވެ.
މި މޮޅާ އެކު އާސެނަލް އޮތީ ތިން މެޗުން ވެސް މޮޅުވެ، ނުވަ ޕޮއިންޓާ އެކު ގްރޫޕްގެ އެއް ވަނައިގަ އެވެ. ދެ ވަނައިގައި އޮތް ޕީއެސްވީން ވަނީ ރޭ އެފްސީ ޒިއުރިކް 5-0 އިން ބަލިކޮށްފަ އެވެ. ޕީއެސްވީ އަށް ތިން މެޗުން ލިބުނީ ހަތް ޕޮއިންޓެވެ. ތިން ވަނައިގައި އޮތީ ހަތަރު މެޗުން ހަތަރު ޕޮއިންޓާ އެކު ބޯޑޯ/ގިލްމް އެވެ. ފުލުގައި އޮތް ޒިއުރިކް ހަތަރު މެޗު ކުޅުނުއިރު، ޕޮއިންޓެއް ނުލިބެ އެވެ.
ލަނޑު ޖެހުމަށް ފަހު ސަކާ އުފާފާޅުކުރަނީ.-- ފޮޓޯ: އޭއެފްޕީ
ޔުނައިޓެޑުން ރޭ އަމިއްލަ ދަނޑުގައި ގިނަ ހަމަލާތަކެއް ފޮނުވާލި އެވެ. ޔުނައިޓެޑުން 11 ހަމަލާ ގޯލާ ސީދާކޮށް ފޮނުވާލިއިރު، އޮމޯނިއާގެ ކީޕަރު، ފްރާންސިސް އޮޒޯހޯ ވަނީ އެ ބޯޅަތައް ހުއްޓުވައިފަ އެވެ. ފުރަތަމަ ހާފުގައި ޔުނައިޓެޑްގެ ކަސެމީރޯ ޖެހި ބޯޅައެއް ވަނީ ހުރަސްދަނޑިއަށް ވެސް އަމާޒުވެފަ އެވެ. ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ އާއި މި ސީޒަނުގައި ރަނގަޅު ފޯމެއްގައި ހުރި، މާކަސް ރެޝްފޯޑަށް ވެސް ގޯލު ޖަހަން ލިބުނު ފުރުސަތުތަކުގެ ބޭނުމެއް ނުހިފުނެވެ.
މެޗުގައި ޔުނައިޓެޑް މޮޅުކޮށްދިން ލަނޑު ޖެހި ސްކޮޓް މެކްޓޮމިނޭ ކުޅެން އެރީ ބަދަލަކަށެވެ. މެޗުގެ އިތުރު ވަގުތުގައި މެކްޓޮމިނޭ، މި ގޯލު ޖަހަން ފުރުސަތު ތަަނަވަސްކޮށްދިން ޖޭޑަން ސަންޗޯ އަކީ ވެސް ދެ ވަނަ ހާފުގައި ބަދަލަކަށް އެރި ކުޅުންތެރިއެކެވެ.
ޔުނައިޓެޑް ހިމެނޭ ގްރޫޕް އީގެ އެއް ވަނައިގައި އޮތީ ހަތަރު މެޗުން ވެސް މޮޅުވެ، 12 ޕޮއިންޓް ހަމަކޮށްފައިވާ ރެއާލް ސޮސިއެޑާޑް އެވެ. ރޭ ސޮސިއެޑާޑް ވަނީ 3-0 އިން ޝެރިފް ޓިރާސްޕޯލް ބަލިކޮށް އަނެއް ބުރުން ފުރުސަތު ހޯދައިފަ އެވެ. ދެ ވަނައިގައި ޔުނައިޓެޑް ހަތަރު މެޗުން ނުވަ ޕޮއިންޓާ އެކު އޮތްއިރު، އަނެއް ބުރު ޔަގީންކުރަން ބާކީ އޮތް ދެ މެޗުން ޔުނައިޓެޑް ބޭނުންވަނީ އެންމެ ޕޮއިންޓެކެވެ. މި ގްރޫޕްގެ ތިން ވަނައިގައި އޮތް ޝެރިފަށް ހަތަރު މެޗުން ތިން ޕޮއިންޓް ލިބިފައިވާއިރު، އޮމޯނިއާ އަށް އަދި ޕޮއިންޓެއް ނުލިބެ އެވެ.
ރޭގެ މެޗުތަކަށް ފަހު ޔޫރޮޕާ ލީގުގެ ނޮކައުޓް ބުރުން ޖާގަ ލިބިފައިވާ ޓީމުތަކަކީ ގްރޫޕް ބީން ފެނަބާޗޭ އާއި ރެން، ގްރޫޕް ސީން ރެއާލް ބެޓިސް، ގްރޫޕް އީން ރެއާލް ސޮސިއެޑާޑް އަދި ގްރޫޕް ޖީން ފްރެއިބާގް އެވެ.
ރެން އިން ވަނީ ރޭ ޑިނަމޯ ކިއޭވް އަތުން 1-0 އިން މޮޅުވެފަ އެވެ. ފެނަބާޗޭ އިން ލަނާކާ ބަލިކުރީ 2-1 އިންނެވެ. ރެއާލް ބެޓިސް އިން ވަނީ 1-1 އިން ހޯސޭ މޮރީނިއޯގެ ރޯމާއާ އެއްވަރުކޮށްފަ އެވެ. އަދި ފްރާންސްގެ ނޯންޓްސް ދަނޑުގައި ފްރެއިބާގް މޮޅުވީ 4-0 އިންނެވެ.
