އަންނަ އަހަރަށް ސަރުކާރުން އަންދާޒާކޮށްފައި ވަނީ 41.5 ބިލިއަން ރުފިޔާގެ ބަޖެޓެއް ކަމަށް ފިނޭންސް މިނިސްޓަރު އިބްރާހިމް އަމީރު ހާމަކުރެއްވީ އިއްޔެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު ނޫސްވެރިންނާ ބައްދަލު ކުރައްވައި އަމީރު ވިދާޅުވީ "2023 ވަނަ އަހަރު 41.5 ބިލިއަން ރުފިޔޭގެ ބަޖެޓެއް ކަމަށް އަޅުގަނޑުމެންނަށް އަންދާޒާ ކުރެވެނީ ފިސްކަލް ސްޓެރެޓެޖީ ނަމްބަރުތައް ވެސް އޭގައި އަޅުގަނޑުމެން ހިމަނާފައިވާނެ،" ކަމަށެވެ.

މިހާރު މަސައްކަތް ކުރަން ޖެހިފައިވަނީ ވަރަށް ބޮޑަށް ބަދަލުވަމުންދާ ހާލަތެއްގައި ކަމަށާއި އެހެން ނަމަވެސް އަންދާޒާކުރި މިންވަރަށް ވުރެ ރަނގަޅަށް ރާއްޖޭގެ އިގުތިސާދު ޕާފޯމް ކުރަމުންދާ ތަން ފެންނަ ކަމަށް ވިދާޅުވި އެވެ.

އަންނަ އަހަރު ސަރުކާރަށް ޖުމްލަ އާމްދަނީގެ ގޮތުގައި 30.7 ބިލިއަން ރުފިޔާ ލިބޭނެ މި އަހަރު ނިމުމުގެ ކުރިން އާމްދަނީގެ ގޮތުގައި 24.9 ބިލިއަން ރުފިޔާ ލިބޭނެ ކަަމަށް ވެސް އަމީރު ވިދާޅުވި އެވެ.

ބައެއް މުހިންމު ހަބަރުތައް

• އެމެރިކާގެ ކްރެޑިޓް ރޭޓިން އޭޖެންސީ, ފިޗުގެ ރާއްޖޭގެ ރޭޓިން މިއަހަރު ވެސް "ބީ ނެގަޓިވް" ގައި ހިފެހެއްޓިއިރު، ކުރިމަތިވެދާނެ ކަމަށް ބެލެވޭ ގޮންޖެހުންތަކުގެ ސަބަބުން އިގުތިސޯދީ ހާލަތު ލަފާކުރާ ގޮތް ދަށްކޮށް، ރިޕޯޓް ނެރުނީ އިއްޔެ އެވެ.

• ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތްކުރާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) ގެ މުވައްޒަފަކު ކޮންޓެއިނަރެއްގެ ތެރޭގައި ބަންދުކޮށްގެން ގެންގުޅުނު ކަމަށް ޕަބްލިކް އިންޓެރެސްޓް ލޯ ސެންޓަރު (ޕީއައިއެލްސީ) އިން އިއްޔެ ބުންޏެވެ.

• ގެއްލިގެން ހޯދަނިކޮށް ގަސްތަކެއްގެ ތެރޭގައި މަރުވެފައި އޮއްވާ ފެނުނު މުހައްމަދު އަޒުހާންގެ ހަށިގަނޑު ޕޯސްޓްމޯޓަމެއް ހެދުމަށްފަހު މާލެ ގެނެސްފައިވާ ކަމާއި މިއަދު އޭނާގެ ޖަނާޒާ ބޭއްވާ ކަމަށް ފުލުހުން ބުނީ އިއްޔެ އެވެ.

• ފުޅާ ދާއިރާގައި މަސްތުވާތަކެތީގެ ވިޔަފާރި ކުރާ ބޮޑެއް ކަމަށް ފުލުހުން ތުހުމަތުކުރާ ގދ. ހޯނޑެއްދޫ އަލޯރާ، އަރުޝަދު ހާލިދު ލަންކާއިން ރާއްޖެ ގެނެސް ކޯޓަށް ހާޒިރުކުރުމުގެ ކުރިން އޭނާ ދޫކޮށްލުމުން ފުލުހުންނަށް ބޮޑެތި ފާޑުކިޔުންތައް އަމާޒުވުމާއެކު، އެފަދަ މައްސަލަތަކުގައި އަމަލުކުރާ އުސޫލު ބަދަލުކޮށްފި ކަމަށް ބުނީ އިއްޔެ އެވެ.

• ނިމިދިޔަ އަހަރުގެ ފެބްރުއަރީ މަހު ގއ. މާމެންދޫގައި ހިނގި މާރާމާރީއެއްގެ ތެރެއިން، އެ ރަށު ލިލީ އޮފް ދަ ވެލީ، އަހްމަދު އުދައްޔަށް ހަމަލާ ދިނުމަށް ފަހު އޭނާގެ އާއިލާގެ ބައެއް މީހުނާއި މާރާމާރީގައި ބައިވެރިވި ކަމުގެ ތުހުމަތު އޮތް މީހުނާ ދެމެދު ހިނގި ޒުވާބު އިއްޔެ އޮތް ޝަރީއަތުގައި ކިޔައިދީނެވެ.

• ހަރަކާތްތެރި ދިރިއުޅުމަކަށް ބާރުއަޅައި، އުމުރުން ދުވަސްވީ މީހުންނަށް ހިތްފަސޭހަ މާހައުލެއް ގާއިމުކުރުމުގެ މަސައްކަތުގެ ތެރެއިން މާލޭގައި އެލްޑާލީ ކޮމިއުނިޓީ ސެންޓަރެއް ގާއިމު ކުރުމުގެ މަސައްކަތް ޖެންޑާ މިނިސްޓްރީން ކުރަމުން އަންނަ ކަމަށް ރިޕޯޓުކުރީ އިއްޔެ އެވެ.

• ދަނޑުވެރިކަމުގެ މަސައްކަތަށް ދޫކޮށް، މިހާތަނަށް މަސައްކަތެއްނުކޮށް ގުދަނެއްގެ ގޮތުގައި ބޭނުން ކުރަމުން އަންނަ ވ. ހުޅިދޫ ކުއްޔަށް ދިނުމުގެ އެގްރިމެންޓު ބާތިލުކޮށް އެ އަތޮޅު ރައްޔިތުންނާ ރަށް ހަވާލު ކުރުމަށް ގޮވާލާ އިއްޔެ މުޒާހަރާ ކުރި އެވެ.

• ހުޅަނގު މޫސުމުގެ ބާރުގަދަވެ، ދިޔަވަރު ބޮޑުވެ އުދަ އަރާނެ ކަމުގެ އިންޒާރު ދީފައިވާއިރު، އިއްޔެ ރޭ އދ. ދިގުރަށަށް އެރި އުދަ އެރަށުގެ މީހުން ސިފަކުރީ ސުނާމީއެއްގެ ގޮތުގަ އެވެ. މީގެ ތިރީގައި އެ ވަނީ އެ މަންޒަރު ފެންނަ ވީޑިއޯ އެވެ.

ދުވަހުގެ ކޯޓޭޝަން

ދަނޑުވެރިކަމަށް ދޫކޮށްފައިވާ ވ. ހުޅިދޫގައި، ވެފައިވާ އެއްބަސްވުމާ އެއްގޮތަށް މަސައްކަތް ނުކުރާތީ އެއްބަސްވުން ބާތިލުވެފައިވާ ކަމަށް ބުނެ އެ އަތޮޅުގެ ރައްޔިތުންގެ ބަޔަކު އިއްޔެ ރަށަށް އަރައި މުޒާހަރާ ކުރަމުން ދިޔައިރު، އެތަނުގައި ހުންނަވައި ވ. އަތޮޅު ކައުންސިލްގެ ރައީސް ޝުޖާއު އަލީ "އަދަދު" ނޫހަށް ދެއްވި އިންޓަވިއުގައި ވިދާޅުވީ؛

ވާވު އަތޮޅު ތެރޭގައި ގުތުރަތީ ގޮތުން މިހުރި ވަސީލަތްތައް، ކުއްޔަށް ދޫކުރެވިފައި ހުރި ރަށްރަށް ގާނޫނާ ހިލާފަށް އެ ރަށްރަށުގެ ބޭނުން ކުރާތީ އަތޮޅު ކައުންސިލުން އޮންނާނީ އެދިފައި މިރަށްތައް ކައުންސިލާއި ހަވާލު ކުރުމަށް،"

ދުވަހުގެ ފޮޓޯ

ސަން އައިލެންޑްގައި އިއްޔެ ފެށި އެފްއައިވީބީ ބީޗް ޓުއާ މުބާރާތުގެ މެޗެއްގެ ތެރެއިން ރާއްޖޭގެ ކޯކޭ ފޮނުވާލާ ބޯޅައެއް ބްލޮކްކުރަން ތައިލެންޑްގެ ކުޅުންތެރިޔާ މަސައްކަތް ކުރަނީ.--- ފޮޓޯ: އަބްދުﷲ އިޔާން/ އަދަދު