ދިރިއުޅުމަށްޓަކައި ގޯތިގެދޮރު ކުއްޔަށްދިނުމާބެހޭ ގާނޫނުގެ ދަށުން ހަދަން ޖެހޭ ކުއްޔަށް ދިނުމުގެ ދަފްތަރުގެ މަސައްކަތް ނުނިމޭ ކަމަށް މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މިދިޔަ ނޮވެންބަރު މަހު ތަސްދީގުކުރި މި ގާނޫނުގައި ވަނީ ދިވެހިރާއްޖޭގައި ކުއްޔަށްދޭ ހުރިހާ ތަންތަނުގައި އެންމެ ދަށްވެގެން ހުންނަންޖެހޭ މިންގަނޑުތައް ކަނޑައަޅައި، ދަފްތަރެއް އެކުލަވާލަން ޖެހޭނެ ކަމަށް ބުނެފަ އެވެ.
ގެދޮރު ކުއްޔަށް ދިނުމާ ބެހޭ ގާނޫނުގައިވާ ގޮތުން ކޮންމެ ރަށެއްގައި ވެސް ކުއްޔަށް ދޭ ތަންތަނުގެ ދަފްތަރު ކަނޑައަޅަންޖެހެނީ އެ ރަށެއްގެ ކައުންސިލުންނެވެ. އަދި މުޅި ރާއްޖޭގެ ދަފްތަރެއް ހޯމް މިނިސްޓްރީން ގެންގުޅެންޖެހެ އެވެ.
މިކަމާ ގުޅިގެން "އަދަދު" އިން ސުވާލުކުރުމުން މުއިއްޒު ވިދާޅުވީ އެ މަސައްކަތް "ނުހިނގާ" ކަމަށެވެ.
"އަޅުގަނޑުމެންނާ މަޝްވަރާނުކޮށް ގަވައިދު ހަދައި ގެޒެޓުކޮށްފައި އޮތީ، އަޅުގަނޑުމެން ޕްލޭނިން މިނިސްޓްރީއާ މަޝްވަރާ ކުރަމުން އެބަ ދަން މި ގަވައިދު ތަންފީޒުކުރުމުގައި އަދި ބަލަން ޖެހޭ ކަންކަން ނިންމަން،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި މާލެ ސަރަހައްދުގައި ގޯތިގެދޮރު ކުއްޔަށް ދޭ ބޮޑެތި ސަބަބުތަކެއް ހުރިއިރު، މިކަން ކުރުމުގައި ގިނަ ކަންތައްތަކަކަށް ރިއާޔަތް ކުރަން ޖެހޭ ކަމަށެވެ.
ކަމާ ގުޅުން ހުރި އިދާރާތަކާއެކު މަޝްވަރާތައް ނިމުމުން، އޭގެ އަލީގައި ދަފްތަރުގައި ރެޖިސްޓްރީކުރުމުގެ މަސައްކަތް ފެށިގެން ދާނެ ކަމަށް މުއިއްޒު ވިދާޅުވި އެވެ.
މިކަން ކުރުމަށް ގިނަ ގޮންޖެހުންތަކެއް ހުރިކަން ފާހަގަކުރައްވައި މުއިއްޒު ވިދާޅުވި ގޮތުގައި އެކަމަށް ބޭނުންވާ ގިނަ ވަސީލަތްތައް ވެސް ކައުންސިލްގައި ނެތެވެ.
"ކަމަކީ ވަރަށް ބޮޑު ކަމެއް، ސްޓާފުން ބޭނުންވާނެ، ބަޖެޓު ބޭނުންވާނެ، އަދި ޓައިމްލައިނެއް ބޭނުންވާނެ، އެއަށް ބޭނުންވާ ޑޭޓާ ބޭސް އާ އެހެނިހެން އިދާރީ ބައިވަރު ކަންކަން ހުންނާނެ،" މުއިއްޒު ވިދާޅުވި އެވެ.
ތަސްދީގުކޮށްފައިވާ ގާނޫނުގައި ވަނީ ގެދޮރު ކުއްޔަށް ހިފާ ފަރާތްތަކާއި ކުއްޔަށް ދޭ ފަރާތްތައް ވެސް އަމަލު ކުރަންޖެހޭ ގޮތްތަކެއް ބަޔާންވެ، ދެ ފަރާތަށް ލިބިފައިވާ ހައްގުތައް ވެސް ސާފުކޮށް ބަޔާން ކޮށްފަ އެވެ. އެގޮތުން ސެކިއުރިޓީ ޑިޕޮސިޓްގެ ގޮތުގައި ގިނަވެގެން ނެގޭނީ ދެ މަސް ދުވަހުގެ ކުލީގެ ފައިސާކަން ގާނޫނުން ވަނީ ކަނޑައަޅައިފަ އެވެ.
އޭގެ އިތުރުން، ކުއްޔަށް ދޭ ތަނުގެ ކުޑަބޮޑުމިނަށް ބެލުމަށްފަހު އެތަނެއްގައި އެންމެ ގިނައިން އުޅެވޭނެ މީހުންގެ އަދަދު ކަނޑައަޅަންޖެހެ އެވެ. އަދި ސަބް ލީޒްއަށް ތިން ވަނަ ފަރާތަކަށް ކުއްޔަށް ދޭ ނަމަ އެކަން ކުރެވޭނީ ކުއްޔަށް ދޭ ފަރާތުގެ އިއުތިރާޒެއް ނެތްކަމުގެ ލިޔުމެއް އޮވެގެން ކަމަށް ވެސް ގާނޫނުގައި ބަޔާންކޮށްފައިވެ އެވެ.
