އަބޫޖާ، ނައިޖީރިއާ (އޮކްޓޯބަރު 12) - ފާއިތުވި 10 އަހަރުގެ ތެރޭގައި ނައިޖީރިއާއަށް ކުރިމަތިވި އެންމެ ބޮޑު ފެންބޮޑުވުމުގެ ހާދިސާގައި 500 މީހުން މަރުވެ، 1.4 މިލިއަން މީހުން ހާލުގައި ޖެހިއްޖެ އެވެ.
ބޯކޮށް ވާރޭވެހި ފެންބޮޑުވުމުގެ އަސަރު ބޮޑު ސަރަހައްދަކަށް ކުރަމުންދާ އިރު، އޭގެ ސަބަބުން އިންފްލޭޝަން މަތިވެ، ކާބޯތަކެތީގެ ދަތިކަން އިތުރަށް ކުރިމަތިވުމުގެ ފުރުސަތު އެބަ އޮތެވެ.
ހިޔުމެނިޓޭރިއެން އެފެއާޒް މިނިސްޓްރީން ބުނީ "1.4 މިލިއަން މީހުންގެ ގެދޮރު ގެއްލި، 500 މީހުން މަރުވެފައިވާ އިރު، 1،546 މީހުންނަށް އަނިޔާވެފައިވާ" ކަމަށެވެ.
އޭގެ އިތުރުން "45،249 ގެޔަށް ގެއްލުން ލިބި، 70،566 ހެކްޓަރުގެ ދަނޑުބިން އެއްކޮށް ސުންނާފަތިވެފައިވާ" ކަމަށް އެ މިނިސްޓްރީން ބުންޏެވެ.
"ފެންބޮޑުވުމުގެ އަސަރުކޮށްފައިވާ މީހުންނަށް އެހީ ފޯރުކޮށްދިނުމަށް ކުރަން ޖެހޭ ހުރިހާ ކަމެއް އަޅުގަނޑުމެން މި ދަނީ ކުރަމުން،" އެ މިނިސްޓްރީގެ އޮފިޝަލް ނާސިރް ސާނީ ގްވާޒޯ ވިދާޅުވި އެވެ.
އަވަށުގައި ފެންބޮޑުވުމުން ރައްކާތެރި ހިސާބަކަށް ދަތުރު ކުރަނިކޮށް މިދިޔަ ހުކުރު ދުވަހު ބޯޓެއް ބަންޑުން ޖަހާލައި 76 މީހުން މަރުވި އެވެ.
ކުރިއަށް އޮތް ދުވަސްތަަކުގައި ވިއްސާރަ ކުރުން އިތުރުވާނެ ކަމަށް ލަފާކުރެވެ އެވެ. މީގެ ކުރިން 2012 ގައި ވެސް ނައިޖީރިއާގައި ފެންބޮޑުވެ، 363 މީހުން މަރުވެ، 2.1 މިލިއަން މީހުން ހާލުގައި ޖެހުނެވެ.
