ދުނިޔޭގައި ފުރަތަމަ ފަހަރަށް ކާމިޔާބުކަމާ އެކު ގޮހޮރުގެ ޓްރާންސްޕްލާންޓެއް ހެދި 13 މަހުގެ އަންހެން ކުއްޖާގެ ހާލު ރަނގަޅު ކަމަށް ސްޕެއިންގެ ސިއްހީ އިދާރާތަކުން ބުނެފި އެވެ.
"އެ ކުއްޖާ ހޮސްޕިޓަލުކޮށް ދޫކޮށްލައި، ގޭގައި ދުވަސްތައް ހޭދަކުރަނީ މައިންބަފައިން ކައިރީގައި. ކުއްޖާގެ ހާލު ރަނގަޅު،" މެޑްރިޑްގެ ލަ ޕާޒް ހޮސްޕިޓަލުން ނެރުނު ބަޔާނުގައި ބުންޏެވެ.
އެ ކުއްޖާއަށް ގޮހޮރެއް ލިބުނީ ހިތް ފެއިލްވެގެން މަރުވި މީހަކު ހަދިޔާ ކުރަން ނިންމުމުންނެވެ. ގުނަވަން ހަދިޔާ ކުރީ "އެސިސްޓޮލިކް ޑޮނޭޝަން" މެދުވެރިކޮށް ކަމަށް ހޮސްޕިޓަލުން ބުންޏެވެ.
"އެސިސްޓޮލިކް ޑޮނޭޝަން" ހެދުމުން "ޓްރާންސްޕްލާންޓް ކުރާ ގުނަވަނުގެ ފެންވަރު ދަށް ނުވާ" ކަމަށް ހޮސްޕިޓަލުގެ ބަޔާނުގައިވެ އެވެ.
މީގެ ކުރިން ގޮހޮރުގެ ޓްރާންސްޕްލާންޓް ކުރުމަށް އެ ޓެކްނީކް ބޭނުންކޮށްފައެއް ނުވެ އެވެ. އެއީ އެ ޓެކްނީކް ބޭނުން ކުރުމުން ވެސް ކާމިޔާބު ވާނެ ކަމަށް ނުފެންނާތީ އެވެ.
"ގޮހޮރަކީ މީހާގެ ދިފާއީ ނިޒާމާ ވަރަށް ބޮޑަށް ގުޅިފައިވާ ލިމްފޮއިޑް ގުނަވަނެއް. އެއީ ގިނަ އަދަދެއްގެ ޖަރާސީމު އެކުލެވޭ ގުނަވަނެއް،" ބަޔާނުގައި ބުންޏެވެ.
އެ ސަބަބާ ހެދި ގޮހޮރު ޓްރާންސްޕްލާންޓް ކުރި ނަމަވެސް، އެ ލިބޭ މީހާގެ ހަށިގަނޑުން ގުނަވަން "ރިޖެކްޓް ކުރުމާއި" އިންފެކްޝަަންގެ ފުރުސަތު އެހެން ޓްރާންސްޕްލާންޓްތަކަށް ވުރެ ބޮޑެވެ.
ސްޕެއިންގެ ހޮސްޕިޓަަލުން ބުނީ "އެސިސްޓޮލިކް ޑޮނޭޝަން" މެދުވެރިކޮށް އޮޕަރޭޝަން ކުރެވިދާނެކަން ދެނެގަތުމަށް ތިން އަހަރުގެ ދިރާސާ އާއި ޓެސްޓުތަައް ކުރި ކަމަށެވެ.
ގްލޯބަލް އޮބްޒަވޭޓަރީ އޮން ޑޮނޭޝަން އެންޑް ޓްރާންސްޕްލާންޓޭޝަންގެ ހިސާބުތަކުން ދައްކާ ގޮތުގައި ގުނަވަން ޓްރާންސްޕްލާންޓް ކުރުމުގައި ސްޕެއިންއަކީ އެންމެ ކުރީގައި އުޅޭ އެއް ގައުމެވެ.
ދުނިޔޭގެ އާބާދީގެ ތެރެއިން ސްޕެއިންގައި އުޅެނީ އެންމެ 0.6 ޕަސެންޓް މީހުން ނަމަވެސް، 2021 ވަނަ އަހަރު ދުނިޔޭގައި ޑޮނޭޓް ކުރި ގުނަަވަންތަކުގެ ފަސް ޕަސެންޓް ހިއްސާކުރަަނީ އެ ގައުމެވެ.
