ގެމްބިއާގައި ކުދިންތަކެއްގެ މަރާ ގުޅިފައިވާ ކޯފް ސިރަޕް ބޭސް އުފެއްދި އިންޑިއާގެ މެއިޑެން ފާމަސޫޓިކަލް ކުންފުނީގެ މައި ފެކްޓްރީގެ މަސައްކަތްތައް ހުއްޓުވައިފި އެވެ.
އިންޑިއާގެ އުތުރު ހަރްޔާނާ ސްޓޭޓުގެ ހޯމް މިނިސްޓަރު އަނިލް ވިޖް ވިދާޅުވީ މި މަހުގެ ތެރޭގައި ހަތަރު ފަހަރެއްގެ މަތިން އެ ފެކްޓްރީ ބަލައި ފާސްކުރި އިރު، ގަވާއިދާ ހިލާފު 12 ކަމެއް ފާހަގަވި ކަމަށެވެ.
މެއިޑެން ފާމާ ކުންފުނީގެ އުފެއްދުންތައް ވިއްކަަނީ އިންޑިއާ އާއި އޭޝިއާ، އެފްރިކާ އަދި ލެޓިން އެމެރިކާގެ ބައެއް ގައުމުތަކުގަ އެވެ.
"ފެކްޓްރީއިން ފާހަގަވި ކަންކަމަށް ރިއާޔަތްކޮށް، ކުންފުނީގެ ހުރިހާ އުފެއްދުމެއް ވަނީ ހުއްޓުވާފައި އަދި އެކަމުގެ ނޯޓިސް ވެސް ހަވާލުކޮށްފައި،" ވިޖް ވިދާޅުވި އެވެ.
ވެރިރަށް ނިއު ދިއްލީ ކައިރީގައި ހުންނަ މައި ފެކްޓްރީގެ އިތުރުން ވެސް ހަރްޔާނާ ސްޓޭޓުގައި މެއިޑެން ފާމާ ކުންފުނީގެ އިތުރު ދެ ފެކްޓްރީ ހުރެ އެވެ.
މިދިޔަ ބުދަ ދުވަހު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ ގެމްބިއާގައި 69 ކުދިން މަރުވުމާ ގުޅުން އޮތް ކަމަށް ބެލެވެނީ އިންޑިއާގައި އުފެއްދި ކެއްސާތީ ބޯ ބޭސް ނުވަތަ ކޯފް ސިރަޕްގެ ހަތަރު ބާވަތަކާ ކަމަށެވެ.
ކުދިންތަކަށް ކިޑްނީ މައްސަލަ ދިމާވެ، ޖުލައި، އޯގަސްޓް އަދި ސެޕްޓެމްބަރުގައި މަރުވުމުން ޑަބްލިއުއެޗްއޯއިން ތަހުލީލުތަކެއް ކުރި އެވެ.
މަރުވި ކުދިންގެ އާއިލާތަކުން ބީބީސީއަށް ބުނީ ބޭސް ދިނުމުން ކުދިންނަށް ކުޑަކަމުދާން އުނދަގޫވި ކަމަށާއި ދުވަހަކަށް ވުރެ ދުވަހެއް ހާލަތު ގޯސްވި ކަމަށެވެ.
ޑަބްލިއުއެޗްއޯއިން ފާހަަގަކުރި ހަތަރު ބޭހަކީ ޕްރޯމެތަޒައިން އޯރަލް ސޮލިއުޝަން، ކޯފެކްސްމެލިން ބޭބީ ކޯފް ސިރަޕް، މޭކޯފް ބޭބީ ކޯފް ސިރަޕް އަދި މެގްރިޕް އެން ކޯލްޑް ސިރަޕް އެވެ.
