ދުނިޔޭގެ އެންމެ ތަޖުރިބާކާރު ސިޔާސީ ލީޑަރުންގެ ތެރޭގައި ހިމެނޭ މެލޭޝިއާގެ މަހާތީރް މުހައްމަދު އުމުރުފުޅުން 97 އަހަރުގައި އާއްމު އިންތިހާބުގައި ޕާލިމެންޓުގެ ގޮނޑިއަކަށް ވާދަކުރަން ނިންމަވައިފި އެވެ.
ދެ ފަހަރެއްގެ މަތިން ބޮޑު ވަޒީރުކަން ކުރައްވާފައިވާ މަހާތީރް ފުރަތަމަ ފަހަރު އެ މަގާމުގައި 22 އަހަރު ހޭދަކުރެއްވި އެވެ. އޭގެ ފަހުން އުމުރުފުޅުން 92 އަހަރުގައި 2018 ވަނަ އަހަރު އަނެއްކާވެސް ބޮޑު ވަޒީރުކަމަށް ވަޑައިގެންނެވި އެވެ.
ހިތުގެ އާލާސްކަންފުޅެއްގައި މި އަހަރުގެ ކުރީކޮޅު އެމަނިކުފާނަށް ހޮސްޕިޓަލުގައި ފަރުވާ ދެއްވި އެވެ. އެހެން ނަމަވެސް، އަލުން އިންތިހާބުގައި ވާދަކުރެވޭ ވަރަށް ސިއްހަތު ރަނގަޅުވެފައިވާ ކަމަށް އެމަނިކުފާނު ވިދާޅުވެ އެވެ.
މަހާތީރްގެ ކޯލިޝަނަށް ކާމިޔާބު ލިބިއްޖެ ނަމަ، ތިން ވަނަ ފަހަރަށް ބޮޑު ވަޒީރުކަމަށް ވަޑައިގެންނެވުމާ މެދު މިހާތަނަށް ވަކި އެއްޗެއް ވިދާޅެއް ނުވެ އެވެ.
"ބޮޑު ވަޒީރުކަމަށް އަންނާނީ ކޮން ބޭފުޅެއްކަމާ މެދު އަޅުގަނޑުމެން އަދި ގޮތެއް ނުނިންމަން. އެއީ އެ ހިސާބަށް ވިސްނުން ގެންދެވޭނީ އިންތިހާބުން މޮޅުވެގެން ކަމަށް ވާތީ،" ނިއުސް ކޮންފެރެންސެއްގައި މަހާތީރް ވިދާޅުވި އެވެ.
މިދިޔަ ހޯމަ ދުވަހު މެލޭޝިއާގެ ޕާލިމެންޓު އުވާލައި، އާ އިންތިހާބަކަށް ފުރުސަތު ފަހިވި އެވެ. ސަރުކާރުގެ އުއްމީދަކީ އާ އިންތިހާބާ އެކު ސިޔާސީ ހަމަޖެހުން ގާއިމް ކުރުމެވެ.
މަހާތީރް މުހައްމަދު ޕާލިމެންޓަށް އެންމެ ފުރަތަމަ ވަޑައިގެންނެވީ 1964 ގަ އެވެ. މެލޭޝިއާއަށް 1980 އިން ފެށިގެން އައި އަވަސް އިގްތިސާދީ ކުރިއެރުމާއި ތަރައްގީގެ ބާނީއަކީ އެމަނިކުފާނު ކަމަށް ގިނަ ބަޔަކު ދެކެ އެވެ.
