ކްލަބް މޯލްޑިވްސް ކަޕްގައި މިރޭ ކުޅޭ ގޮތަށް ހަމަޖެއްސި ފިރިހެން ޑިވިޝަންގެ ދެ މެޗާއި ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގެ ދެ މެޗު މާދަމާ އަށް ފަސްކޮށްފި އެވެ.
ކްލަބް މޯލްޑިވްސް އިން ބުނީ މިއަދު މެންދުރު ފަހުން ފެށިގެން މެދުނުކެނޑި މާލެ ސަރަހައްދަށް ކުރަމުން އަންނަ ވިއްސާރައިގެ ސަަބަބުން މިރޭ ކުޅެން ޝެޑިއުލްކޮށްފައިވާ މުބާރާތުގެ ހަތަރު މެޗު ވެސް މާދަމާ ހަވީރަށް ފަސްކޮށްފައިވާ ކަމަށެެވެ.
އެ ގޮތުން މިރޭ 20:05 ގައި ފަށަން ނިންމާފައި އޮތް ކްލަބް މޯލްޑިވްސް ކަޕްގެ އަންހެން ޑިވިޝަން 18/30 ފުޓްސަލް ފިއެސްޓާގެ އެމްޕީއެލް އާއި ޓީމު ފެނަކަ ކުޅޭ މެޗާއި ޔޫތު މިނިސްޓްރީ އާއި ކްލަބް ވެމްކޯގެ މެޗު މިހާރު ކުޅޭ ގޮތަށް ނިންމީ މާދަމާ ހަވީރު 16:00 ގަ އެވެ. އަދި މިރޭ ކްލަބް މޯލްޑިވްސް ކަޕްގައި އެސްޓީއޯ އާއި ކްލަބް އިމިގްރޭޝަން ކުޅޭ މެޗާއި ކްލަބް އެޗްޑީސީ އާއި ދިވެހި ސިފައިންގެ ކްލަބްގެ މެޗު ވަނީ މާދަމާ ހަވީރު 17:15 ގައި ކުޅެން ނިންމައިފަ އެވެ.
ކްލަބް މޯލްޑިވްސް ކަޕްގައި ރޭ ކުޅުނު ހަަތަރު މެޗަށް ވެސް ވިއްސާރައިގެ ސަބަބުން އަސަރުކުރި އެވެ. އެ ގޮތުން އެންމެ ފުރަތަމަ ކުޅެން އޮތް ދެ މެޗު ވަގުތަށް ފެށޭގޮތް ނުވިއިރު، ލައިވްކޮށް މެޗު ދެއްކުމަށް ވެސް އުނދަގޫތަކާ ކުރިމަތިލާން ޖެހުނެވެ.
ކުރިން މާފަންނު ސްޓޭޑިއަމްގައި ކުރިއަށްދިޔަ ކްލަބް މޯލްޑިވްސް ކަޕް، މިހާރު ބާއްވަނީ ހުޅުމާލެ ރެހެންދި ފުޓްސަލް ދެ ދަނޑުގަ އެވެ.
