ލިވަޕޫލް (އޮކްޓޫބަރު 11) - މި ސީޒަނުގައި ނަތީޖާ ނެރުމުގައި ލިވަޕޫލަށް ގިނަ މައްސަލަތަކެއް ދިމާވެފައިވަނިކޮށް އެ ޓީމަށް މި ފަހަރު އެންމެ ރަނގަޅު ކުޅުމެއް ދައްކަމުން އަންނަ އެއް ކުޅުންތެރިޔާ، ލުއިސް ޑިއާޒަށް އަނިޔާވެ އިތުރު ގޮންޖެހުންތަކާ ކުރިމަތިލާން ޖެހިއްޖެ އެވެ.
ޑިއާޒްގެ ކަކުލަށް އަނިޔާވީ އިނގިރޭސި ޕްރިމިއާ ލީގުގައި މިިދިޔަ އާދިއްތަ ދުވަހުގެރޭ ލިވަޕޫލުން އާސެނަލާ ދެކޮޅަށް ކުޅުނު މެޗުގަ އެވެ. އާސެނަލް އަތުން 3-2 އިން ލިވަޕޫލް ބަލިވި އެ މެޗުގެ ފުރަތަމަ ހާފުގައި ޑިއާޒް ކަކުލަށް އަނިޔާވެގެން، ފަރުވާ ދިނުމަށް ފަހު ކުޅެވޭތޯ މަސައްކަތް ކުރި އެވެ. އެކަމަކު، ކުޅުން ކުރިއަށް ނުގެންދެވިގެން އޭނާ ޖެހުނީ ބަދަލުކުރާށެވެ.
ލިވަޕޫލުން ވަނީ ޑިއާޒްގެ އަނިޔާގެ ތަފްސީލް ދެނެގަންނަން ޓެސްޓްތަކެއް ހަދައިފަ އެވެ. ޓެސްޓްތަކުގެ ނަތީޖާއިން ދައްކާގޮތުން ޑިއާޒް އޮޕަރޭޝަނެއް ކުރަން ނުޖެހުނު ނަމަވެސް ދޮޅު މަހެއްހާ ދުވަހަށް ކުޅުމާ ދުރުގައި ހުންނަން ޖެހޭނެ އެވެ. މިއާ އެކު ދެން ޑިއާޒަށް އެނބުރި ކުޅުމަށް އާދެވޭނީ ފީފާ ވޯލްޑް ކަޕަށް ފަހު އެވެ. ކޮލަމްބިއާ ކޮލިފައިނުވާތީ ޑިއާޒަށް މާ ކުރިން ވޯލްޑް ކަޕް އޮތީ ގެއްލިފަ އެވެ.
އަންނަ މަހުގެ 20 ވަނަ ދުވަހު ގަތަރުގައި ފަށާ ފީފާ ވޯލްޑް ކަޕަށް، ޕްރިމިއާ ލީގު މެދުކަނޑާލާނީ ނޮވެމްބަރު 13 ގަ އެވެ.
ލިވަޕޫލް އޮތީ އިނގިރޭސި ޕްރިމިއާ ލީގުގައި މިހާތަނަށް އެ ޓީމުން ކުޅުނު އަށް މެޗުން ލިބުނު 10 ޕޮއިންޓާ އެކު 10 ވަނައިގަ އެވެ. މިއީ 2012-2013 ވަނަ އަހަރުގެ ސީޒަނަށް ފަހު ލިވަޕޫލުން އެންމެ ދަށްކޮށް ލީގު ސީޒަން ފެށި ފަހަރެވެ. އެ ފަހަރު އެ ޓީމު ލީގު ނިންމާލީ ހަތް ވަނައިގަ އެވެ.
އާސެނަލާ ދެކޮޅަށް ކުޅުނު މެޗުގައި ޑިއާޒްގެ އިތުރުން ލިވަޕޫލްގެ ފުލްބެކް ޓްރެންޓް އަލެކްސަންޑާ އާނޯލްޑަށް ވަނީ އަނިޔާވެފަ އެވެ. އޭނާ އަށް ވެސް މެޗުތަކެއް ގެއްލޭނެ ކަމަށް ބެލެވޭއިރު، ލިވަޕޫލްގައި އަނިޔާގެ ސަބަބުން ކުޅުމާ ދުރުގައި ތިބި ކުޅުންތެރިންގެ ލިސްޓެއް ވެސް އެބައޮތެވެ. ސީޒަން ފެށިއިރު ވެސް އަލެކްސް އޮކްސްލޭޑް ޗަމްބަލެއިން އާއި ނަބީ ކެއިޓާ އަދި ކާޓިސް ޖޯންސް ހުރީ އަނިޔާގަ އެވެ. އެ ލިސްޓަށް ދާދި ފަހުން އިތުރުވީ ޔުވެންޓަސްގެ ލޯން އެއްބަސްވުމެއްގެ ދަށުން ލިވަޕޫލާ ގުޅުނު އާތޫރު މެލޯ އެވެ. އާތޫރަށް ލިބުނު އަނިޔާއަކާ ހެދި މި އަހަރު ދެން އޭނާ ނުފެންނާނެ އެވެ.
