ދާދި ފަހުން ގިނަ މިސައިލްތަކެއް ލޯންޗު ކުރީ ދެކުނު ކޮރެއާއަަށް ނިޔުކްލިއާ ހަމަލާއެއް ދޭނެ ގޮތުގެ ތަމްރީނަކަށް ކަމަށް އުތުރު ކޮރެއާއިން ބުނެފި އެވެ.
ޖާސޫސީ ފަރާތްތަކުން ބުނާ ގޮތުގައި އުތުރު ކޮރެއާއިން ދަނީ ނިޔުކްލިއާ ހަތިޔާރެއް ޓެސްޓު ކުރަން ތައްޔާރުވަމުންނެވެ. އެ ގައުމުން އެންމެ ފަހުން ނިޔުކްލިއާ ހަތިޔާރެއް ޓެސްޓު ކުރީ މީގެ ފަސް އަހަރު ކުރިންނެވެ.
އެމެރިކާ އާއި ދެކުނު ކޮރެއާ ގުޅިގެން ހިންގި އަސްކަރީ ތަމްރީންތަކަށް ރައްދު ދިނުމުގެ ގޮތުން ކުޑަ ދުވަސްކޮޅެއްގެ ތެރޭގައި އުތުރު ކޮރެއާއިން ހަތް މިސައިލް ލޯންޗު ކުރި އެވެ.
ހޯމަ ދުވަހު ދައުލަތުގެ މީޑިއާއިން ބުނީ އެ ހުރިހާ މިސައިލަކީ ވެސް ނިޔުކްލިއާ ހަތިޔާރު އުފުލުމުގެ ގާބިލްކަން ލިބިފައިވާ މިސައިލްތަކެއް ކަމަށެވެ.
މިސައިލްތައް ލޯންޗު ކުރުމުގެ ތެރޭގައި ދެކުނު ކޮރެއާގެ އަސްކަރީ މަރުކަޒުތަކާއި، ބަނދަރުތަކާއި، އެއާޕޯޓުތަކަށް ހަމަލާ ދޭނެ ގޮތުގެ "ސިމިއުލޭޝަން" ހެދި ކަމަށް ކޭސީއެންއޭއިން ބުންޏެވެ.
ކުރު ރާސްތާގެ ގިނަ މިސައިލްތަކުގެ އިތުރުން ޖަޕާނު ހުރަސްކޮށް ޕެސިފިކް ކަނޑުގައި އޮންނަ އެމެރިކާގެ ގުއާމް ރަށްތައް ކައިރިއަަށް ވެއްޓުނު ދިގު ރާސްތާގެ މިސައިލެއް ވެސް ކާމިޔާބުކަމާ އެކު ފޮނުވި އެވެ.
މީގެ ކުރިން 2017 ވަނަ އަހަރު ޖަޕާނުގެ މަތިން ދެ މިސައިލް ފޮނުވިތާ ހަފްތާއެއް ފަހުން އުތުރު ކޮރެއާއިން ނިޔުކްލިއާ ޓެސްޓެއް ވެސް ކުރި އެވެ.
ޖާސޫސީ ތަޖުރިބާކާރުން ބުނާ ގޮތުގައި މި ފަހަރު އުތުރު ކޮރެއާއިން ނިޔުކްލިއާ ހަތިޔާރު ޓެސްޓު ކުރާނެ ކަމަށް ބެލެވެނީ ގައުމުގެ އެކުވެރި ޗައިނާގެ ކޮމިއުނިސްޓް ޕާޓީގެ ކޮންގްރެސް މި މަހު ނިންމުމުންނެވެ.
