ކްލަބް މޯލްޑިވްސް ކަޕްގައި މިރޭ ޓީމު ފެނަކައިން މުބާރާތުގެ ޗެމްޕިއަންކަން ދެ ފަހަރެއްގެ މަތިން ހޯދާފައިވާ ޔުނައިޓެޑް ބީއެމްއެލް އަތުން 2-0 އިން މޮޅުވިއިރު، އެއާޕޯޓަށް ނިސްބަތްވާ ތިން ޓީމު ވެސް ފުރަތަމަ މެޗުތަކުން މޮޅުވެ ފެށުން ރަނގަޅުކޮށްފި އެވެ.
ފެނަކަ އާއި ބީއެމްއެލް ހިމެނޭ ގްރޫޕް ޑީގައި ކްލަބް އެއާޕޯޓްސް އިން ވަނީ ޓީމު ސިވިލް ކޯޓު 4-0 އިން ބަލިކޮށްފަ އެވެ. ގްރޫޕް ސީގައި އެމްއޭސީއެލް އިން 7-0 އިން ޓްރޭޑް ކްލަބް ބަލިކުރިއިރު، އެ ގްރޫޕްގެ އަނެއް މެޗުގައި ޓީމު އޭވިއޭޝަން ސެކިއުރިޓީން 6-2 އިން ޓީމު ޑީޖީއޭ ބަލިކޮށްފި އެވެ.
މިރޭގެ މެޗުގައި ފެނަަކައިން ލީޑުނެގީ މެޗުގެ 19 ވަނަ މިނިޓްގައި މުހައްމަދު އައްޒާމް ޖެހި ގޯލުންނެވެ. މިއީ އިބްރާހިމް މުބީން (މުއްކި) ދިން ބޯޅައެއް ކޮންޓްރޯލް ކުރުމަށް ފަހު އައްޒާމް އޭރިއާތެރެއިން ތިރިތިރިން ގޯލަށް ފޮނުވާލި ބޯޅައެކެވެ.
ގޯލު ޖެހުމަށް ފަހު ފެނަކަ ޓީމުގެ ކުޅުންތެރިން އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
އިޝާން އިބްރާހިމް (ސައްޓު)ގެ ކެޕްޓަންކަމުގައި ކުޅުނު ބީއެމްއެލް ކައިރިން ފެނަކައިން ގިނަ ވަގުތު ބޯޅަ ހިފަހައްޓައިގެން ކުޅެ ގިނަ ހަަމަލާތަކެއް ފޮނުވާލި އެވެ. ބީއެމްއެލް އިން ވެސް އެޓޭކްކުރަން ލިބޭ ފުރުސަތުތަކުގައި ނުރައްކާ ކުރެވޭތޯ ބަލަމުންދިޔަ އެވެ.
ދެ ވަނަ ހާފްގެ ކުޅުން ފެށިގެން ހަ މިނިޓް ތެރޭ އަޔާޒް އަހުމަދު (އަޔާ) ވަނީ ފެނަކައިގެ ލީޑުފުޅާކޮށްދީފަ އެވެ، މިއީ މެޗުގެ 25 ވަނަ މިނިޓްގައި ފެނަކައިގެ ކެޕްޓަން، ހުސެއިން ޝަރީފް (އޮންލީ) ޖައްސާލި ބޯޅައަކުން އޭރިއާބޭރުން އަޔާ ގޯލުގެ މަތީ ދާގަނޑަށް ބޯޅަ ފޮނުވާލައިގެން ޖެހި ގޯލެކެވެ.
މި މެޗުގައި ގޯލެއް ޖަހަން ބީއެމްއެލް އަށް ރަނުގެ ފުރުސަތެއް ލިބުނެވެ. މެޗުގެ 38 ވަނަ މިނިޓްގައި ބީއެމްއެލް އަށް ލިބުނު ޕެނަލްޓީ އަކުން ހައިޝަމް ރަޝީދު ޖެހި ބޯޅަ ފެނަކައިގެ ކީޕަރު ޒައިދާން އަހުމަދު ވަނީ މަތަކޮށްފަ އެވެ.
މިރޭ، ސިވިލް ކޯޓު ކޮޅަށް ކްލަބް އެއާޕޯޓްސްގެ ގޯލުތައް ޖެހީ އަބޫބަކުރު ސިއްދީގު ދެ ގޯލާއި އަބްދުﷲ ރަޝީދު އަދި އަލީ ހުސެއިން އެވެ.
އެމްއޭސީއެލް އިން ޓްރޭޑް ކްލަބް ކޮޅަށް ހަތް ގޯލު ޖެހިއިރު، އެމްއޭސީއެލްގެ އިބްރާހިމް ޝަނޫން ވަނީ ދެ ގޯލު ޖަހައި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ.
އެމްއޭސީއެލް ޓީމުގެ އަނެއް ގޯލުތައް ޖެހީ އަހުމަދު ސިނާހު، އަހުމަދު ހަމީދު (އައްމަޑޭ)، އަލީ ޝާފިއު، އަބްދުﷲ ސުޒޭރު އަދި ހުސެއިން ޒާހިރު އެވެ.
އޭވިއޭޝަން ސެކިއުރިޓީ އާއި ޓީމު ޑީޖީއޭ ކުޅުނު މެޗުގެ ތެރެއިން.-- ފޮޓޯ: މުހައްމަދު ޝާބިން/ އަދަދު
ޓީމު ޑީޖީއޭ ކޮޅަށް އޭވިއޭޝަން ސެކިއުރިޓީގެ ތައުމީނު ނޫހު ވަނީ ހެޓްރިކެއް ހަދައިފަ އެވެ. އެ ޓީމުގެ އަނެއް ގޯލުތައް ޖެހީ އާދަމް މަންސޫރު، އަބްދުﷲ ބައްސާމް އަދި އަލީ ފާރިޝް އެވެ. ޑީޖީއޭ އިން ވެސް މި މެޗުގައި ވަނީ ދެ ގޯލު ޖަހައިފަ އެވެ. އެ ޓީމުގެ ލަނޑުތައް ޖެހީ ހަސަން އިހުސާން އާއި އަބޫބަކުރު މުހައްމަދު އެވެ.
ކްލަބް މޯލްޑިވްސް ކަޕްގައި މާދަމާރޭ ކުޅޭނީ ގްރޫޕް އީ އާއި ގްރޫޕް އެފްގެ ދެ މެޗެވެ. މާދަމާރޭ ފުރަތަމަ 20:05 ގައި ފަށާނީ ގްރޫޕް އީގައި ޓީމު އެފްްއެސްއެމް އާއި ސްޓެލްކޯ ކުޅޭ މެޗާއި ގްރޫޕް އެފްގައި އެމްޕީއެލް އާއި ކަސްޓަމްސް ބައްދަލުކުރާ މެޗެވެ. އަދި 21:30 ގައި އޮތީ ގްރޫޕް އީގައި ރާއްޖެ އޮންލައިން އާއި ހޯމްއެފެއާޒް ކުޅޭ މެޗާއި ގްރޫޕް އެފްގައި ޔޫތު މިނިސްޓްރީ އާއި ކްލަބް އާސަންދަ ބައްދަލުކުރާ މެޗެވެ.
