އިންޑިއާގެ ބިހާރް ސްޓޭޓުގެ ޗަމްޕަރަންގައި ނުވަ މީހުން މަރާލުމުގެ ފަހަތުގައިވާ މިނިކާ ވަގެއްގެ ގަޔަށް ފުލުހުން ބަޑި ޖަހައި މަރާލައިފި އެވެ.
އެ މިނިކާ ވަގު މަޝްހޫރުވެފައި ވަނީ "ޗަމްޕަރަންގައި އިންސާނުން ކާ ވަގު" ގެ ގޮތުގަ އެވެ. އެ މިނިކާ ވަގު ހުއްޓުވުމަށް ބޮޑު އޮޕަރޭޝަނެއް ހިންގަން ޖެހުނެވެ.
އޮޕަރޭޝަނުގަައި 200 އަށް ވުރެ ގިނަ ފުލުހުންނާއި ޑިސްޓްރިކްޓު އޮފިޝަލުން ބައިވެރިވި އެވެ. ބައެއް އޮފިސަރުން ތަންތަން ޕެޓްރޯލް ކުރީ އެތުގެ ބުރަކަށި މަތީގައި ތިބެގެންނެވެ.
އެ ފިރިހެން މިނިކާ ވަގުގެ ހަމަަލާތައް އަމާޒުވީ ވަލްމިކީ ޓައިގާ ރިޒާވް ވަށައިގެންވާ އަވަށްތަކަށެވެ. ދުނިޔޭގެ މިނިކާ ވަގުގެ 70 ޕަސެންޓު އުޅެނީ އިންޑިއާގަ އެވެ.
އިންޑިއާގައި މިނިކާ ވަގުތަކަށް ރައްކާތެރިކަމާ އެކު އުޅެވޭނެ ގޮތް ހަދަން ރިޒާވްތައް ހަދާފައިވެ އެވެ. އެކަމަކު މިނިކާ ވަގުގެ އާބާދީ އިތުރުވާ ވަރަކަށް ރިޒާވްތަކުގެ ބިމުގެ ސަރަހައްދު ފުޅާކުރަމުން ނުދެ އެވެ.
އޭގެ ސަބަބުން މިނިކާ ވަގުތައް އަވަށްތަކަށް ވަދެ، އިންސާނުންނާ ކުރިމަތިލުން ހިނގަން މެދުވެރިވެ އެވެ. ބިހާރްގައި މަރާލީ އުމުރުން ތިން އަހަރުގެ "ޓީ-104" މިނިކާ ވަގެވެ.
ވަލްމިކީ ޓައިގާ ރިޒާވްގެ ޑިރެކްޓަރު ނެސަމަނީ ކޭ ވިދާޅުވީ ޓީ-104 ހޯދުމުގެ އޮޕަރޭޝަަން ވަރުގަދަ ކުރީ ހޮނިހިރު ދުވަހު އޭތީގެ ހަމަލާއެއްގައި އަންހެނަކާއި އޭނާގެ ދަރިފުޅު މަރުވުމުން ކަމަށެވެ.
އިންޑިއާ ސަރުކާރުގެ ތަފާސްހިސާބު ދައްކާ ގޮތުން ކޮންމެ އަހަރަކު ވެސް މިނިކާ ވަގުގެ ހަމަލާތަކުގައި 40-50 މީހުން މަރުވެ އެވެ.
