ޕާކިސްތާނުގެ ވެރިރަށް އިސްލާމްއާބާދުގެ މެދުގައި ހުންނަ ސެންޓޯރަސް ޝޮޕިން މޯލްގައި އާދީއްތަ ދުވަހުގެ ރޯވި ބޮޑު އަލިފާންގަނޑެއް ނިވާލައިފި އެވެ.
ފުލުހުން ބުނީ ޝޮޕިން ސެންޓަރުގައި ތިބި ހުރިހާ އެންމެން ރައްކާތެރިކަމާ އެކު އިވެކުއޭޓް ކުރި ކަމަށެވެ. އެއްވެސް މީހަކަށް އަނިޔާވިކަމުގެ ރިޕޯޓެއް ނުލިބެ އެވެ.
ސޯޝަލް މީޑިއާގައި ދައުރުވި ފޮޓޯތަކުން ފެންނަނީ އިމާރާތުގެ މަތިން ކަޅު ދުންތައް އަރާ މަންޒަރެވެ. ހުޅުތައް އިމާރާތް ތެރެއިންނާއި ބޭރުން ވެސް ފެނުނެވެ.
އަލިފާން ރޯވީ އާދީއްތަ ދުވަހުގެ މެންދުރު އެވެ. ވީޑިއޯ އާއި ފޮޓޯތަކުން ފެންނަނީ ފުޑް ކޯޓުގައި ގިނަ ބަޔަކު ތިބި އިރު، އަލިފާން ރޯވެފައިވާ މަންޒަރެވެ.
ކެޕިޓަލް ޑިވެލޮޕްމަންޓް އޮތޯރިޓީ (ސީޑީއޭ) އިން ބުނީ ދެ ގަޑިއިރުގެ ތެރޭގައި އަލިފާންގަނޑު ކޮންޓްރޯލް ކުރި ކަމަަށެވެ. ބޮޑު ވަޒީރު ޝެހްބާޒް ޝަރީފް އެންގެވީ ހާދިސާއާ ގުޅިގެން ވަގުތުން ފިޔަވަޅު އެޅުމަށެވެ.
