އޮސްކާ އެވޯޑު ހާސިލްކޮށްފައިވާ އެކްޓަރު ކެވިން ސްޕޭސީ މީގެ 36 އަހަރު ކުރިން ފިރިހެން ކުއްޖަކަށް ޖިންސީ ގޯނާ ކުރި ކަމަށް ބުނާ މައްސަލައިގެ ޝަރީއަތް ނިއު ޔޯކުގައި ފަށައިފި އެވެ.
އެންތަނީ ރެޕް ހުށަހެޅި މައްސަލައިގައި ބުނީ 1986 ވަނަ އަހަރު ޕާޓީއެއްގެ ތެރެއިން ކެވިން ސްޕޭސީ އޭނާއަށް ޖިންސީ ގޯނާ ކުރި ކަމަށެވެ. އޭރު އެންތަނީ ރެޕްގެ އުމުރުން 14 އަހަރެވެ.
މިހާރު އުމުރުން 63 އަހަރުގެ ކެވިން ސްޕޭސީއާ ދެކޮޅަށް އިނގިރޭސިވިލާތުގައި ވެސް ޖިންސީ ގޯނާގެ އިތުރު ފަސް ދައުވާ އުފުލާފައިވެ އެވެ. ހައުސް އޮފް ކާޑްސް ސީރީޒްގެ އެކްޓަަރު ތުހުމަތުތައް ދޮގުކުރެ އެވެ.
ބުރާސްފަތި ދުވަހު ނިއު ޔޯކްގައި ޝަރީއަތް ފެށި އިރު، މިހާރު އުމުރުން 51 އަހަަރުގެ އެންތަނީ ރެޕް އާއި ކެވިން ސްޕޭސީ ވެސް ކޯޓަށް ހާޒިރުވި އެވެ.
އެންތަނީ ރެޕް ކޯޓަށް މައްސަލަ ހުށަހަޅަން ނިންމީ 2020 ވަނަ އަހަރު އެވެ. ރިޕޯޓުތައް ބުނާ ގޮތުން އޭނާާ އެދުނީ ބަަދަލުގެ ގޮތުގައި 40 މިލިއަން ޑޮލަރު ނަގައިދިނުމަށެވެ.
އެންތަނީ ރެޕްއަކީ ވެސް ފިލްމު އިންޑަސްޓްރީގައި އުޅޭ މީހެކެވެ. ޕެރެމައުންޓް ޕްލަސްއިން ދައްކާ "ސްޓާ ޓްރެކް: ޑިސްކަވަރީ" ގައި އޭނާ އުޅެ އެވެ.
އެންތަނީ ރެޕް.
އޭނާގެ އިތުރުން ވެސް ގިނަ ބަޔަކު ކެވިން ސްޕޭސީއާ ދެކޮޅަށް ޖިންސީ ގޯނާގެ ތުހުމަތު ކުރެ އެވެ. އެގޮތުން 2016 ވަނަ އަހަރު ރެސްޓޯރެންޓެއްގައި 18 އަހަރުގެ މީހެއްގެ ގައިގައި އަތްލި ކަމަށް ތުހުމަތުކޮށްފައިވެ އެވެ.
ތުހުމަަތުތަކާ ގުޅިގެން ހައުސް އޮފް ކާޑްސް ސީރީޒުން ކެވިން ސްޕޭސީ ވަކިކުރި އެވެ. އެ ނިންމުމާ ހެދި ޝޯގެ ޕްރޮޑިއުސަރުންނަށް ލިބުނު ގެއްލުމުގެ ބަދަލަށް 31 މިލިއަން ޑޮލަރު ދޭން މިދިޔަ އޯގަސްޓު މަހު ކޯޓުން އޭނާއަށް އެންގި އެވެ.
އިނގިރޭސިވިލާތުގެ ލަންޑަންގައި ކެވިން ސްޕޭސީއާ ދެކޮޅަށް ޖިންސީ ގޯނާގެ ޝަރީއަތްތަކެއް ޖޫން 2023 ގައި ފަށަން ވަނީ ތާވަަލުކޮށްފަ އެވެ.
