އެންޖެލީނާ ޖޯލީ އާއި ދަރިންނަށް ޕްރައިވެޓް ފްލައިޓެއްގެ ތެރޭގައި ބްރެޑް ޕިޓް އަނިޔާ ކުރި ކަމަށް ބުނާ ލިޔުންތަކެއް ކޯޓަށް ހުށަހަޅައިފި އެވެ.
އެންޖެލީނާ ކޯޓަށް ހުށަހެޅި ލިޔުންތަކުގައި ބުނީ ކައިވެނި ނިމުމަކަށް ގެންނަން ނިންމީ އެ ހާދިސާއަށް ފަހު ކަމަށެވެ. އަނިޔާގެ ތަފްސީލް ކޯޓަށް ހުށަހެޅީ ދެ ތަރިން އެކުގައި ގަތް ރާ އުފައްދާ ވިޔަފާރިއެއްގެ މައްސަލައިގަ އެވެ.
ބްރެޑް ޕިޓް ބުނީ އެ ވިޔަފާރީގެ ހިއްސާ އެކަކު އަނެކަކުގެ ހުއްދަ ނެތި ވިއްކާ ނުލާން އެއްބަސްވި ކަމަށެވެ. އެކަމަކު އެންޖެލީނާ ޖޯލީ އެކަން ދޮގުކޮށް ބުނީ، އޭނާ ހިއްސާ ވިއްކާލަން އުޅުމުން ބްރެޑް ޕިޓް ހުރަސް އަޅާ ކަމަށެވެ.
އެ ވިޔަފާރިއާ ގުޅިފައިވާ ބޮޑު ބިމެއް އެ މީހުން ގަތީ 2008 ގައި 25 މިލިއަން ޑޮލަރަށެވެ. އޭގެ ހަ އަހަރު ފަހުން ދެ ތަރިންގެ ކައިވެނި ވެސް އޮތީ އެ ތަނުގަ އެވެ.
އެންޖެލީނާ ޖޯލީ ބުނީ 2016 ވަނަ އަހަރު ޕްރައިވެޓް ފްލައިޓުގެ ތެރެއިން ބްރެޑް ޕިޓް އޭނާގެ ބޮލަށް އަނިޔާކޮށް، ދެ ދަރިންނަށް ވެސް ހަމަލާ ދިން ކަމަށެވެ.
ފްރާންސުން ލޮސް އެންޖެލެސްއަށް ކުރި ދަތުރުގައި ހަޑި ހުތުރު ބަހުން އެއްޗެހި ގޮވައި އެންޖެލީނާ ޖޯލީ އާއި ދަަރިންގެ ގަޔަށް ރާ އުކި ކަމަށް ވެސް ބުންޏެވެ. އޭރު ބްރެޑް ޕިޓް ހުރީ މަސްތުގެ ހާލުގަ އެވެ.
އެކަމަކު ބްރެޑް ޕިޓް އެ ތުހުމަތު ދޮގުކުރެ އެވެ. މީގެ ކުރިން ވެސް އެ ހާދިސާގެ ވާހަކަ އާއްމުވި އެވެ. އެފްބީއައިއިން 2016 ވަނަ އަހަރު މައްސަލަ ބެލުމަށް ފަހު ނިންމީ ދައުވާ ނުކުރުމަށެވެ.
އެ ހާދިސާއަށް ފަހު ދެ މީހުން ވަރިވި އެވެ. ދަރިންގެ ކަސްޓޮޑީ މައްސަލަ ވެސް ކޯޓަށް ގެންގޮސް، މިދިޔަ އަހަރު ފަނޑިޔާރު ނިންމީ ދެ މީހުންނަށް އެއް ވަރަށް ދަރިންގެ ކަންކަން ހަވާލުކުރުމަށެވެ.
