އިންޑިއާގެ އުތުރު އުއްތަރްހާންދް ސްޓޭޓުގެ ފަރުބަދަ މަތީ މަގަކުން ބަހެއް ވެއްޓި 25 މީހުން މަރުވެއްޖެ އެވެ.
އޮފިޝަލުން ބުނީ ޕައުރީ ގަަރްވަލް ޑިސްޓްރިކްޓުގައި ބަސް ވެއްޓުނު ވަގުތު އޭގަައި 40 މީހުން ތިބި ކަމަށެވެ. އޭގެ ތެރެއިން މިހާތަނަށް 21 މީހުން ސަލާމަތްކޮށްފައިވެ އެވެ.
ބޮޑު ވަޒީރު ނަރެންދްރަ މޯދީ ވަނީ އެ ހާދިސާއާ ގުޅިގެން ހިތާމަ ފާޅުކުރައްވައި، އާއިލާތަކަށް ތައުޒިޔާ ފޮނުއްވައިފަ އެވެ.
ބަހުގައި ދަތުރު ކުރިީ ކައިވެނި ހަފްލާއަކަށް ދިޔަ ބަޔެކެވެ. ބަސް ވެއްޓުނީ ލާލްދަންގް އަވަށުން ބިރޮންކާލް އަވަށަށް ދިޔަ މަގުމަތީގަ އެވެ.
ބަސް ވެއްޓުނު ސީދާ ސަބަބު ސާފު ނުވާ އިރު، ފުލުހުން ވަނީ ތަހުގީގެއް ފަށައިފަ އެވެ. ބުދަ ދުވަހު ވެސް ރެސްކިއު އޮޕަރޭޝަން ހުއްޓުމެއް ނެތި ކުރިއަށް ދިޔަ އެވެ.
އުއްތަރްހާންދްގެ ޗީފް މިނިސްޓަރު ޕުޝްކާރް ސިންގް ދާމީ ވިދާޅުވީ ރެސްކިއު ޓީމުން ބޭނުންވާ ހުރިހާ އެހީތެރިކަމެއް ފޯރުކޮށްދެމުންދާ ކަމަށެވެ.
އިންޑިއާގެ މަގުތަކުގެ ރައްކާތެރިކަން ވަރަށް ކުޑަ އެވެ. ފަރުވާ ކުޑަކޮށް ދުއްވުމާއި، މަގުތަކުގެ ހާލަތު ގޯސްވުމުގެ ސަބަބުން ހިނގާ އެކްސިޑެންޓުތަކުގައި ކޮންމެ އަހަރަކު ވެސް 100،000 އަށް ވުރެ ގިނަ މީހުން މަރުވެ އެވެ.
