ކެންޔާއަށް ސިފައިން ފޮނުވާނެ ކަމަށް ވިދާޅުވެ ދަރިކަލުން ކުރެއްވި ޓްވީޓަކާ ގުޅިގެން ޔުގެންޑާގެ ރައޫސް ޔޮވޭރީ މުސެވެނީ ކެންޔާ ރައްޔިތުންގެ ކިބައިން މައާފަށް އެދިވަޑަައިގެންފި އެވެ.
މުސެވެނީގެ ދަރިކަލުން މުހޫޒީ ކައިނެރުގާބާއަކީ އިސް އަސްކަަރީ އޮފިޝަލެކެވެ. އޭނާ ޓްވީޓާ ގުޅިގެން އަންގާރަ ދުވަހު ވަނީ ސިފައިންގެ ކޮމާންޑަަރުގެ މަގާމުން ވަކިކުރައްވާފަ އެވެ.
އެހެން ނަމަވެސް، ޖެނެރަލްގެ މަގާމަށް ޕްރޮމޯޓު ކުރައްވައި، ރައީސްގެ އެޑްވަައިޒަރުގެ ގޮތުގައި ދަރިކަލުން ދެމިހުންނަވާނެ ކަމަށް މުސެވެނީ ވިދާޅުވި އެވެ.
އެނެލިސްޓުން ދެކޭ ގޮތުގައި މުސެވެނީގެ ރޭވުމަކީ އެމަނިކުފާނު ވެރިކަމާ ދުރަށް ދާން ޖެހޭ ވަގުތު އައިސް ޖެހުމުން އުމުރުން 48 އަހަރުގެ ދަރިކަލުން ރައީސް ކަމަށް ގެންނެވުމެވެ.
ފަހަކަށް އައިސް ޖެނެރަލް ކައިނެރުގާބާ ސިޔާސީ ކަންކަމުގައި ވަރަށް ހަރަކާތްތެރި އެވެ. އެކަމަކު އެއީ ސިފައިންގެ ކޯޑާ ހިލާފު ކަމެއް ކަމަށް ފާޑުކިޔާ ފަރާތްތަކުން ބުނެ އެވެ.
ހޯމަ ދުވަހު އޭނާ ކުރެއްވި ޓްވީޓުތަކެއްގައި ވިދާޅުވީ ކެންޔާގެ ކުރީގެ ރައީސް އުހޫރޫ ކެންޔަޓާގެ ދެ ދައުރު ހަމަވެ އޯގަސްޓު މަހު ވެރިކަމާ ދުރަށް ދާން ޖެހުމުން ކެންޔަޓާ ހިތާމަ ކުރައްވާ ކަމަށެވެ.
"ކެންޔާގެ ވެރިރަށް ނައިރޯބީ ހިފުމަށް އަޅުގަނޑާއި އަޅުގަނޑުގެ ލަޝްކަރަށް އެންމެ ދެ ހަފުތާ ވެސް ނުނަގާނެ،" އިތުރު ޓްވީޓެއްގައި ކައިނެރުގާބާ ވިދާޅުވި އެވެ.
އެކަމާ ހެދި ޓްވިޓާގައި ގިނަ ބަޔަކު ނުރުހުން ފާޅުކުރި އެވެ. ކެންޔާގެ ސަރުކާރުން ވަކި އެއްޗެއް ނުބުނި ނަމަވެސް، ޔުގެންޑާގެ ފޮރިން މިނިސްޓްރީން ބުނީ ކެންޔާއާ އެކު އޮތް ގުޅުމަށް އިހްތިރާމް ކުރާ ކަމަށެވެ.
ބުދަ ދުވަހު ރައީސް މުސެވެނީ ވިދާޅުވީ ކެންޔާގެ ރައީސް ވިލިއަަމް ރޫޓޯއާ ވާހަކަދައްކަވައި، ދަރިކަަލުންގެ ޓްވީޓްތަކާ ގުޅިގެން މައާފަށް އެދުނު ކަމަށެވެ.
