މާލޭގެ އަމީނީ މަގުގައި ތާރު އެޅުމުގެ މަޝްރޫއުގެ ތެރެއިން ޕޭވްމަންޓް ހަދަނީ މާ ފުޅާކޮށް ކަމުން ޓްރެފިކް އިތުރަށް ބޮޑުވެގެންދާނެ ކަމަށް ވިދާޅުވެ މާލެ ސިޓީގެ މޭޔަރު ޑރ. މުހައްމަދު މުއިއްޒު ކަންބޮޑުވުން ފާޅުކުރައްވައިފި އެވެ.
ހަތް އަހަރު ދުވަހުގެ މުއްދަތަކަށް، ކުރީގެ ރައީސް ޑރ. މުހައްމަދު ވަހީދު ހަސަން މަނިކާއި ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ހައުސިން މިނިސްޓަރުގެ މަގާމު ފުރުއްވި މުއިއްޒު މިއަދު ކުރެއްވި ޓްވީޓެއްގައި ވަނީ ބިމުގެ މަތީގައި "ކޭބަލް ޓްރޭތައް" ވެސް ބަހައްޓާތީ ކަންްބޮޑުވުން ފާޅުކުރައްވައިފި އެވެ.
"އަމީނީ މަގު ހަދަމުން ދަނީ ޕޭވްމަންޓް ވަރަށް ފުޅާކޮށް، މަގުގެ ދުއްވަން އޮންނަ ބައި 25 ފޫޓުން 21 ފޫޓް 10 އިންޗިއަށް ހަނިކޮށް ކަމުން މަގުގެ ތޮއްޖެހުން އިތުރަށް ގޯސް ވާނެ ކަމަށް ފެނޭ،" މުއިއްޒު ކުރެއްވި ޓްވީޓްގައި ލިޔުއްވާފައިވެ އެވެ.
އަމީނީ މަގު ހަދަމުންދާ ގޮތާ މެދު މުއިއްޒު ފާޑުވިދާޅުވިއިރު، އެ މަގު ހެދުމަށް ޓަކައި މަގުގައި ހުރި ގަސްތަކެއް ކަނޑާލުމުން ވެސް ވަރަށް ގިނަ ބަޔަކު ސޯޝަލް މީޑިއާގައި ކަންބޮޑުވުން ފާޅުކޮށްފައިވެ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އަމީނީ މަގުގައި ހުރި ގަސްތައް ކެނޑުން ހުއްޓާލުމުގެ އަމުރެއް ނެރެދިނުމަށް އެދި ސިވިލް ކޯޓަށް މައްސަލައެއް ވެސް ހުށަހަޅައިފަ އެވެ. އެ ކޯޓުން މައްސަލަ ރަޖިސްޓްރީ ކޮށްދީފައި ވެސް ވެ އެވެ.
އަމީނީ މަގުގެ މަސައްކަތް ކުރިއަށް ދަނީ ވެސް ކޮންްސަލްޓެންޓުން ދިން ލަފައާ ހިލާފަށްކަން އެންވަޔަރަމަންޓަލް އިމްޕެކްޓް އެސެސްމަންޓް (އީއައިއޭ) ރިޕޯޓްގައި ވެސް ފާހަގަކޮށްފައިވެ އެވެ.
މި ކަމުގައި އާރްޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) މީގެ ކުރިން "އަދަދު"އަށް ވިދާޅުވެފައިވަނީ އަމީނީ މަގުގެ މަސަތްކަތަށް ބައެއް ގަސްތައް ނަގަން ޖެހުނު ނަމަވެސް އެ މަގުގެ މަސައްކަތް ނިމޭއިރު ނަގާ ކޮންމެ ގަހަކަށް ގަހެއް އިންދޭނެ ކަމަށެވެ.
