ދެކުނު ސޯމާލިއާއަށް ދިން ވައިގެ ހަމަލާއެއްގައި އަލް ޝަބާބް ޓެރަރިސްޓް ގްރޫޕުގެ އިސްވެރިޔަކު މަރާލާފައިވާ ކަމަށް ސޯމާލިއާ ސަރުކާރުން ބުނެފި އެވެ.
އޮކްޓޯބަރު އެއް ވަނަ ދުވަހު ދިން ޑްރޯން ހަމަލާގައި މަރުވި އަބްދުﷲ ޔާރޭގެ ބޮލަށް އެމެރިކާއިން 30 މިލިއަން ޑޮލަރު ހުށަހަޅާފައިވެ އެވެ.
އޭނާ މަރާލީ ސޯމާލިއާގެ ސިފައިންނާއި ބައިނަލްއަގްވާމީ ސަލާމަތީ ބައިވެރިން ގުޅިގެން ހިންގި އޮޕަރޭޝަނެއްގައި ހަރަމްކާ އަވަށުގަ އެވެ.
"އޭނާއަކީ އެ ގްރޫޕުގެ އެންމެ އިސް އިލްމުވެރިޔާ އަދި އަލް ޝަބާބް ގްރޫޕުގެ އެންމެ ނުރައްކާތެރި އެއް މެމްބަރު،" ސޯމާލިއާގެ އިންފޮމޭޝަން މިނިސްޓްރީން ނެރުނު ބަޔާނުގައި ބުންޏޭވެ.
"އޭނާއަކީ އެ ގްރޫޕްގެ ޝުރާ ކައުންސިލްގެ ކުރީގެ ވެރިޔާ އަދި އެ ގްރޫޕްގެ މާލީ ކަންކަމާ ބެހޭ ޑިރެކްޓަރު،" އެ ބަޔާނުގައި ބުންޏެވެ.
އަލް ގައިދާއާ ގުޅުން އޮތް އަލް ޝަބާބްގެ އެއް ފަައުންޑަރަކީ ވެސް ޔާރޭ އެވެ. ކުރިން ބެލެވިފައި އޮތީ އެ ގްރޫޕްގެ މިހާރުގެ ލީޑަރު އަހްމަދު ދިރިޔޭއަށް ފަހު ލީޑަރު ކަމަށް ވެސް އަންނާނީ ޔާރޭ ކަމަށެވެ.
އަލް ޝަބާބުން ސޯމާލިއާގައި ހަރަކާތްތެރިވާތާ 15 އަހަރުވެއްޖެ އެވެ. އެ ގްރޫޕާ ދެކޮޅަށް ގިނަ މަސައްކަތްތަކެއް ކުރި ނަމަވެސް، ގްރޫޕް ރޫޅާލެވިފައެއް ނުވެ އެވެ.
