އިންސާނުންގެ ލޮލަށް ނުފެންނަ ހަމުގެ ކެންސަރު ދެނެގަންނަން ހާއްސަ ސްކޭނަރެއް ފުރަތަމަ ފަހަރަށް އުފައްދައިފި އެވެ.
އެ ސްކޭނަރު އުފެއްދީ ބަލި ދެނެގަތުމާއި ސާޖަރީ އަވަސް ކުރުމަށެވެ. މިއީ ހަމުގެ ކެންސަރާ ދެކޮޅަށް އިންގިލާބީ އުފެއްދުމެކެވެ.
ވޯވިކް ޔުނިވާސިޓީގެ ސައިންސްވެރިން އުފެއްދި "ސްކިންއޮމީޓާ"ގެ އެހީގައި ކެންސަަރު ފެތުރިފައި ހުރި މިންވަރު ހަމުގެ ދަށުން ދެނެގަނެވޭނެ އެވެ.
އިނގިރޭސިވިލާތުގެ ޔުނިވާސިޓީ ހޮސްޕިޓަލް ކޮވެންޓްރީގެ ހަމުގެ ކެންސަަރަށް ފަރުވާ ކުރަމުންދާ ބަލި މީހުން ސްކިންއޮމީޓާ ޓެސްޓު ކުރުމުގައި ބައިވެރިވުމަށް ދަނީ ބާރު އަޅަމުންނެވެ.
"ބައެއް ބާވަތުގެ ހަމުގެ ކެންސަރު މި ހުންނަނީ ލޮލަށް ނުފެންނަ ގޮތަށް. އެހެންވީމަ، ސާޖަރީގެ ތެރެއިން ވެސް ބަައެއް ފަހަރު ކެންސަރުގެ ބައިތައް އެއްކޮށް ނުނެގި ދޭ،" އެ ހޮސްޕިޓަލުގެ ޕްރޮފެސަރު ޖޯ ހާޑްވިކް ވިދާޅުވި އެވެ.
ސައިންސްވެރިންގެ އުއްމީދަކީ ސްކިންއޮމީޓާއާ އެކު ލޮލަށް ނުފެންނަ ކެންސަރު ސްކޭންކޮށް ދެނެގަނެގެން، ސާޖަރީގެ ޔަގީންކަން އިތުރު ކުރުމެވެ.
މިހާރު ހަމުގެ ކެންސަރަށް ފަރުވާ ކުރާ އިރު، ކެންސަރު ސެލްތައް ނައްތާލެވިއްޖެތޯ ބެލުމަށް ގިނަ އަދަދެއްގެ ހަމުގެ ސާމްޕަލް ނަގައި ޓެސްޓު ކުރަން ޖެހެ އެވެ.
އެހެން ނަމަވެސް މި ސްކޭނާ ޓެކްނޮލޮޖީގެ އެހީގައި ސާމްޕަލް ނެގުން މަދުކޮށް، ސާޖަރީ ހަދަން ޖެހޭ އަދަދު މަދު ކުރެވޭނެ ކަމަށް ބެލެވެ އެވެ.
ސްކިންއޮމީޓާއިން ބޭނުން ކުރަނީ "ލައިޓް ސްޕެކްޓްރަމް" ގައި ހިމެނޭ ޓެރަހާޓްޒް ބައިގެ އަލިކަމެވެ. އެ އަލިކަން ހަމުގައި ޖެހި ރިފްލެކްޓްވެ އެވެ.
ރިފްލެކްޓްވާ އަލިކަމުގެ ވޭވްފޯމްތަކުގެ އެހީގައި ހަމުގެ ދަށުން ކެންސަރު ފެތުރިފައި ހުރީ ކިހާ މިންވަރަކަށްކަން ފަސޭހަކަމާ އެކު ދެނެގަނެވެ އެވެ.
ވޯވިކް ޔުނިވާސިޓީގެ ޕްރޮފެސަރު އެމާ މެކްފާސަން ވިދާޅުވީ އެ ޓެކްނޮލޮޖީ ޓެސްޓުކޮށް އެއްކުރާ ޑޭޓާގެ އެހީގައި ކެންސަރުގެ ފަރުވާއަށް ހޯދިދާނެ ކުރިއެރުންތައް އިނގޭނެ ކަމަށެވެ.
އޭނާގެ އުއްމީދަކީ ޓެސްޓުކޮށް ނިންމައި ކުރިއަށް އޮތް ފަސް އަހަރުގެ ތެރޭގައި ސްކިންއޮމީޓާ ފުޅާކޮށް ބޭނުންކުރަން ފެށުމެވެ.
ހަމުގެ ކެންސަރުގެ އިތުރުން ކޮލޯން ކެންސަރު ދެނެގަންނަަން ވެސް މި ޓެކްނޮލޮޖީ ބޭނުންކުރެވިދާނެ ކަމަށް ސައިންސްވެރިން ދެކެ އެވެ.
