އިނގިރޭސި ރާނީ ކުއީން އެލިޒަބަތުގެ ވަކިވުމާ އެކު އިނގިރޭސި ފުޓުބޯޅައިގެ ފޯރި ވެސް ވަޅު ޖެހުނެވެ. "ޝާހީ" ހިތާމައިގައި އެތައް މެޗުތަކެއް ކެންސަލްވެގެން ދިޔަ އެވެ. އެހެން ނަމަވެސް މި ހަފްތާގެ ފެށުން ވެގެންދާނީ އިނގިރޭސި ފުޓުބޯޅައަށް މަރުދޭ ސަޕޯޓަރުންނަށް އަލުން ފުޓުބޯޅަ ފޯރި ގެނުވާނެ ފެށުމަކަށެވެ. މެދުކެނޑުމަކަށްފަހު ފުޓުބޯޅަ އެނބުރި އަންނަ އިރު، ކުރިމަތީގައި އޮތީ ފޯރިގަދަ، ވަރުގަދަ ކުރިމަތިލުމެކެވެ.

މެންޗެސްޓާގެ ތަހުތަށް އަބަދުމެ ވާދަކުރާ ޔުނައިޓެޑާއި ސިޓީ ބައްދަލު ކުރާ "މެންޗެސްޓާ ޑާބީ" އަކީ އިނގިރޭސި ޕްރިމިއާ ލީގުގެ އެންމެ ފޯރިގަދަ އެއް ކުރިމަތިލުމެވެ. މީޑިއާ ނެޓުގެ އައިސް ޓީވީ ނެޓްވޯކުތަކުގެ ޗެނަލްތަކުން ލައިވް ކުރާ މި މެޗު ފެށޭނީ މި ފެށޭ މަހު ދެވަނަ ދުވަހުގެ އިރުއޮއްސި 6:00 ގައެވެ. އެމް.އެސް ޓީވީ އަދި އެމް.އެސް ލައިޓު ކަސްޓަމަރުންނަށް ކެޗް-އަޕް ފީޗާ މެދުވެރިކޮށް ފަހުންވެސް މި ފޯރިގަދަ މެޗު ބަލާލެވޭނެ އެވެ. އަދި ކުއިކްޕޭ އިން ސަބްސްކްރިޕްޝަނެއް ނުވަތަ ވައުޗާ އެއް ބައްލަވައިގަނެގެން އެމް.އެސް ޑިޖިޓަލް އެޕް މެދުވެރިކޮށް ކޮންމެ ތާކު ހުރެވެސް މީޑިއާނެޓު ކަސްޓަމަރުންނަށް މި މެޗު ބަލާލެވޭނެ އެވެ. ހުރިހާ ގޮތަކުން ވެސް ހާއްސަ މި މެޗަށް ދެ ޓީމުން ނުކުންނަ އިރު މި ދެޓީމަކީ ވާދަވެރި މާޒީއެއް އޮތް ދެ ޓީމެވެ.

މިއަންނަ އާދިއްތަ ދުވަހު އޮތް މި ދެޓީމުގެ ކުރިމަތި ލުމަކީ މި ދެޓީމުގެ މެދުގައި ކުޅެވިގެންދާ 188 ވަނަ މެޗެވެ. މި ދެޓީމުގެ ތާރީހުގައި 57 ފަހަރު މެންޗެސްޓަރ ސިޓީ ކުރި ހޯދާފައިވާއިރު މެންޗެސްޓަރ ޔުނައިޓެޑް ވަނީ 77 ފަހަރު ކުރި ހޯދާފަ އެވެ. މި ދެ ޓީމު އެންމެ ފަހުން ބައްދަލު ކުރި މެޗުގައި މި ދިޔަ މާޗު މަހު ސިޓީ އިން ވަނީ ޔުނައިޓެޑްގެ މައްޗަށް 4-1 ގެ ނަތީޖާއަކުން ކުރި ހޯދާފަ އެވެ. ފަހުގެ ތާރީހުގައި ގިނަ ކާމިޔާބީ އާއި ޓްރޮފީ ހޯދާފައިވަނީ ސިޓީ ކަންވެސް ފާހަގަކޮށްލެވެ އެވެ. ނަމަވެސް ދުރު ތާރީހަށް ބަލާއިރު ހުރިހާ ގޮތަކުންވެސް ކުރި ލިބެނީ މެންޗެސްޓާ ޔުނައިޓެޑަށެވެ. ސިޓީ އިން ފާއިތުވި އަހަރުތަކުގައި ލީގު ކާމިޔާބު ކުރި ނަމަވެސް، ޔުނައިޓެޑް ބަލި ކުރުން ވަނީ އެންމެ ފޯމުގައި އޮންނަ ސިޓީގެ ޓީމަށްވެސް އުނދަގޫ ކަމަކަށް ވެފަ އެވެ.

މި ސީޒަނުގަައި ދެ ޓީމު

މެންޗެސްޓާ ސިޓީ

ވަރުގަދަ ސްކޮޑަކާއި އެފަދަ ދެވެނައެއް ނެތް ތަޖުރިބާކާރު އަދި ތައްޓާއި ރައްޓެހި ކޯޗު ޕެޕް ގާޑިއޯލާ އާއި އެކު އާ ސީޒަނާއި ކުރިމަތިލި މެންޗެސްޓާ ސިޓީ މި ވަގުތު އޮތީ ޕޮއިންޓު ޓޭބަލްގެ ދެވަނައިގަ 17 ޕޮއިންޓާ އެކު އެވެ. ފާހަގަކޮށްލެވޭ ކަމަކީ ހަތް މެޗު ކުޅެވިގެން ދިޔައިރު ސިޓީ އަދި މި ސީޒަނުގައި އެއްވެސް ޓީމެއް އަތުން ބަލިވެފައި ނުވާކަމެވެ.

މި ސީޒަނުގައި ސިޓީގައި އެންމެ މޮޅު ކުޅުމެއް ދައްކަމުން އަންނަނީ ޓީމަށް އަލަށް ގުޅުނު ނޯވޭގެ ފޯވާޑް އާލިން ހާލަންޑެވެ. ހަތް މެޗު ކުޅެވުން އިރު 11 ގޯލާއެކު ހާލަންޑު އޮތީ ގޯލު ޗާޓުގެ އެއްވަނައިގަ އެވެ. ގޯލު ޖަހަން ފުރުސަތު ފަހި ކޮށްދިނުމުގައި ވެސް ސިޓީގެ ކުޅުންތެރިން ތިބީ ލިސްޓުގެ އެންމެ ކުރީގަ އެވެ. ކެވިން ޑިބުރައިނާ ހަ އެސިސްޓާ އެކު އެއްވަނައިގަ އޮތް އިރު އިނގިރޭސި ޒުވާން ތަރި ފިލް ފޮޑެން ހަތަރު އެސިސްޓާއެކު މި ލިސްޓުގެ ދެވަނައިގައި ވަނީ ހަމަ ޖެހިލާފަ އެވެ.

ގާޑިއޯލާގެ ޓެކްޓިކަލް ބަދަލުތައް މި މެޗުގައި ތަފާތު މޮޅުކޮށް ފެނިގެންދާނެކަން ޔަގީނެވެ. ސިޓީގެ އަމާޒަކަށް ވާނީ މުޅި މެންޗެސްޓާ ނޫ ކުލައިން ޖަރީ ކޮށްލުމެވެ.

މެންޗެސްޓާ ޔުނައިޓެޑު

މެންޗެސްޓާ ޔުނައިޓެޑު މި ސީޒަން ފެށީ އެންމެ ރަނގަޅަކަށް ނޫނެވެ. ފުރަތަމަ މެޗުގައި ބުރައިޓަން އަތުން އަދި ދެވަނަ މެޗުގައި ބުރެންޓްފޯޑު އަތުން ބޮޑު ތަފާތަކުން ބަލިވުމުން ޓީމާ މެދު ސުވާލުތަކެއް އުފެދިގެން ދިޔަ އެވެ. ނަމަވެސް އާ ސީޒަނަށް ޓީމާ ހަވާލުވި ކޯޗު އެރިކް ޓެން ހާގް ގެނައި ޓެކްޓިކަލް ބަދަލުތަކާއި އެކު ޔުނައިޓެޑުން ދަނީ ތަފާތު ދައްކަމުންނެވެ. މި ގޮތުން އިނގިރޭސި ފުޓުބޯޅައިގެ ގަދަ ބާރެއް ކަމުގައިވާ ލިވަޕޫލް އަދި މި ވަގުތު ޓޭބަލްގެ އެންމެ ކުރީގައި އޮތް އާސެނަލް މައްޗަށް ޔުނައިޓެޑުން ވަނީ ކުރި ހޯދާފަ އެވެ.

ޓްރާންސްފާ މާކެޓުގައި އެ ޓީމާ އަލަށް ގުޅުނު ބްރެޒިލްގެ އެންޓޮނީއާއި، މެދުތެރެއިން ޗާލު ބޯޅަތަކެއް ފޯރުކޮށްދޭ އެރިކްސަން އަދި ވަރުގަދަ މޮޅު ޑިފެންޑަރު މާޓިނޭޒް ދަނީ އެންމެ ފަހުން ކުޅުނު މެޗުތަކުގައި ތަފާތު ދައްކަމުންނެވެ. މި ވަގުތު މެޗު ފޯމު ދަށްކޮށް ފެނުނު ކަމުގައި ވިޔަސް ދުނިޔޭގެ އެންމެ މޮޅު އެއް ފުޓުބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ މަތިންވެސް ހަނދާން ނައްތާލެވޭކަށް ނެތެވެ. އަބަދެކޭ އެއް ފަދައިން އެންމެ މުހިއްމު ވަގުތު ތަކުގައި ރޮނާލްޑޯގެ ހުނަރުތައް މެންޗެސްޓާ ޔުނައިޓެޑަށް ފައިދާއަކަށް ވާނެ ކަން ޔަގީނެވެ.

މި މެޗަކީ ޔުނައިޓެޑުން ސިޓީގެ މައްޗަށް ދަމަހައްޓަމުން ގެންދާ ހެޑް ޓު ހެޑް ލީޑު އިތުރަށް ފުޅާކުރުމަށް ލިބިގެންދާނެ ރަނުގެ ފުރުސަތެކެވެ.