ލަންޑަން (ސެޕްޓެމްބަރު 28) - ޗެލްސީ އަށް ކުރިން ކުޅުނު ނައިޖީރިއާގެ މިޑްފީލްޑަރު ޖޯން އޮބީ މިކޭލް އާއި މެންޗެސްޓާ ސިޓީގެ ކުރީގެ މިޑްފީލްޑަރު ފަބިއަން ޑެލްފް ކުޅުން ހުއްޓާލައިފި އެވެ.
މިކޭލް ،35، ގެ ކެރިއަރުގެ އެންމެ ފާހަގަކޮށްލެވޭ އަހަރުތައް ހޭދަކުރީ ޗެލްސީގަ އެވެ. އުމުރުން 19 އަހަރުގައި ޗެލްސީއާ ގުޅުނު މިކޭލް ވަނީ އެ ކްލަބަށް 372 މެޗު ކުޅެފަ އެވެ. އެ ކްލަބާ އެކު އޭނާ ވަނީ ޕްރިމިއާ ލީގުގެ ޗެމްޕިއަންކަން ދެ ފަހަރު އަދި ޗެމްޕިއަންސް ލީގު އަދި ޔޫރޮޕާ ލީގުގެ ޗެމްޕިއަންކަން ވެސް ހޯދައިފަ އެވެ. މީގެ އިތުރުން އެފްއޭ ކަޕް ހަތަރު ފަަހަރު އަދި ލީގު ކަޕް ދެ ފަހަރު ކާމިޔާބުކުރި އެވެ.
"ކެރިއަރުގައި ފާއިތުވި 20 އަހަރަށް ބަލާއިރު، އަހަންނަށް ހާސިލްކުރެވުނު ކަންތައްތަކާމެދު ވަރަށް ހިތްހަމަޖެހޭ،" މިކޭލް ބުންޏެވެ.
ޗެލްސީ ދޫކޮށްލުމަށް ފަހު 2017 ވަނަ އަހަރު މިކޭލް ބަދަލުވީ ޗައިނާ ލީގަށެވެ. އޭގެ ފަހުން އޭނާ ވަނީ އިނގިރޭސި ޗެމްޕިއަންޝިޕްގެ ސްޓޯކް ސިޓީ އާއި މިޑްލްސްބަރާ އަށް ކުޅެފަ އެވެ. އަދި ތުރުކީގެ ޓްރަބްޒޮންސްޕޯ އަށް ވެސް ކުޅުނެވެ. އެންމެ ފަހުން އޭނާ ކުޅުނީ ކުވޭތު ސްޕޯޓްސް ކްލަބަށެވެ.
އިންގްލެންޑްގެ ގައުމީ ޓީމަށް ވެސް ކުރިން ކުޅުނު ޑެލްފް ،32، ކުޅުން ހުއްޓާލިއިރު، އެވަޓަން އިން އޭނާ ދޫކޮށްލީ މިދިޔަ ސީޒަނަށް ފަހު އެވެ. ޑެލްފް ވަނީ އިނގިރޭސި ޕްރިމިއާ ލީގުގައި ސިޓީ އާއި އެވަޓަންގެ އިތުުރުން އެސްޓަން ވިލާ އާއި ލީޑްސް ޔުނައިޓަޑަށް ވެސް ކުޅެފަ އެވެ.
އެންމެ ފަހުން އެވަޓަން އަށް ޑެލްފް ކުޅުނު ނަމަވެސް، އަނިޔާގެ މައްސަލަތަކާ ހެދި އެ ކްލަބަށް އެންމެ އެކަށީގެންވާ ގޮތުގައި އޭނާގެ ބޭނުމެއް ނުހިފުނެވެ.
ޑެލްފް ވަނީ ސިޓީއާ އެކު ދެ ފަހަރު ޕްރިމިއާ ލީގުގެ ޗެމްޕިއަންކަން ހޯދައިފަ އެވެ. އަދި ވިލާއާ އެކު އެފްއޭ ކަޕާއި ލީގު ކަޕްގެ ފައިނަލްގައި ކުޅުނެވެ.
"އަހަރެންގެ ނަސީބު ރަނގަޅުކަމުން ވަރަށް ބޮޑެތި ކްލަބުތަކަށް ކުޅުމުގެ ފުރުސަތު ލިބުނު. އެ ކްލަބުތަކާއި އަހަރެންގެ ފަހަތުގައި ތިބި ސަޕޯޓަރުންގެ އަގު ވަޒަންކުރަން،" ޑެލްފް ބުންޏެވެ. -- އޭއެފްޕީ
