ގެރި ގެންގުޅޭ ތަންތަނަށް ވައުދުވެފައިވާ އެހީ ފޯރުކޮށްނުދޭތީ މުޒާހަރާ ކުރުމުގެ ގޮތުން އިންޑިއާގެ ގުޖަރާތު ސްޓޭޓުގައި ސަރުކާރު އިމާރާތްތަކުގެ ތެރެއަށް ގެރިތަކެއް ދޫކޮށްލައިފި އެވެ.
އެތައް ހާސް ގެރި ދޫކޮށްފައިވާ އިރު، އިމާރާތްތަކާއި ބައެއް ބޮޑެތި މަގުތަކުގައި ގެރިތައް ޖަމާވެގެން އުޅޭ ވީޑިއޯތައް ދަނީ ސޯޝަލް މީޑިއާގައި ފެތުރެމުންނެވެ.
ސަރުކާރުން ވައުދުވި ފައިސާގެ އެހީ ނުލިބޭ ނަމަ ކުރިއަށް އޮތް ސްޓޭޓް އިންތިހާބް ބޮއިކޮޓް ކުރާނެ ކަަމުގެ އިންޒާރު ވެސް މުޒާހަރާ ކުރާ މީހުން ދީފައިވެ އެވެ.
އިންޑިއާގެ ބައެއް ހިސާބުތަކުގައި ގެރިތަކުގެ މެދުގައި "ލަމްޕީ ސްކިން ޑިޒީޒް" ބަލި ދަނީ ފެތުރެމުންނެވެ. އެގޮތުން ގުޖަރާތުގެ ގެރިތަކަށް ވެސް އެ ބަލި ޖެހިފައިވެ އެވެ.
ގުޖަރާތުގައި 5،800 އަށް ވުރެ ގިނަ ގެރި މަރުވެފައިވާ އިރު، 170،000 އެއްހާ ގެރިއަށް އެ ބަލީގެ އަސަރުކޮށްފައިވާ ކަމަށް ބެލެވެ އެވެ.
އިންޑިއާގެ މެޖޯރިޓީ ހިންދޫ ދީނުގައި ގެރިއަކީ މާތްވެގެންވާ އެއްޗެކެވެ. އެހެންވެ، ގުޖަރާތު ހިމެނޭހެން 18 ސްޓޭޓެއްގައި ގެރި ކަތިލުން މަނަ އެވެ.
ދެހާސް ސަތާރަ ވަނަ އަހަރުން ގުޖަރާތުން ވަނީ ގާނޫނު ހަރުކަށިކޮށް، ގެރި ކަތިލައިފި ނަމަ އުމުރު ދުވަހުގެ ޖަލު ހުކުމެއް އަންނަ ގޮތަށް ހަދާފަ އެވެ.
ގެރި ކަތިލުން މަނާވުމުގެ ނަތީޖާއެއްގެ ގޮތުން ގެރީގެ އާބާދީ އިތުރުވެ މަގުތަކުގައި އުޅެން ފެށުމުން ޓްރެފިކް މައްސަލަތައް ދިމާވި އެވެ. އެހެންވެ، ގިނަ ގެރިތައް ބަލަހައްޓަނީ ހާއްސަ ތަންތަނުގަ އެވެ.
މި އަހަރުގެ ބަޖެޓުގައި ގުޖަރާތުގެ ސަަރުކާރުން ވަނީ ގެރި ބަލަހައްޓާ ތަންތަނަށް 61 މިލިއަން ޑޮލަރު ކަނޑައަޅާފަަ އެވެ. އެހެން ނަމަވެސް އެ ތަންތަަނުގެ މީހުން ބުނީ ސަރުކާރުން އެއްވެސް އެހީއެއް ނުވާ ކަމަށެވެ.
ބަޖެޓުގައި ހިމެނި ފައިސާ ދިނުމަށް ތަަކުރާރުކޮށް އެދުނު ނަމަވެސް ހައްލެއް ނުލިބުނު ކަމަށް އެ މީހުން ބުނެ އެވެ. އިންޑިއަން އެކްސްޕްރެސް ނޫހުން ބުނީ ގެރިތައް ދޫކޮށްލައި ފެށި މުޒާހަރާގަައި 1،750 ތަނުން ބައިވެރިވާ ކަމަށެވެ. އެ ތަންތަނުގައި 450،000 ގެރި ގެންގުޅެ އެވެ.
ފުލުހުން ބުނީ އެ މުޒާހަރާއާާ ގުޅުން ހުރި 70 މީހުން ހައްޔަރުކޮށްފައިވާ ކަމަށެވެ. ގުޖަރާތުގެ އެނިމަލް ހަޒްބެންޑްރީ މިނިސްޓަރު ވިދާޅުވީ އެހީ ފޯރުކޮށްދިނުމުގައި ލަސްތަކެއް އުޅޭ ކަމަށާއި ދެ، ތިން ދުވަހުގެ ތެރޭގައި ހައްލެއް ހޯދޭނެ ކަމަށެވެ.
މުޒާހަރާ ކުރާ މީހުން ބުނީ މަސް ނިމުމުގެ ކުރިން ހައްލެއް ނުލިބިއްޖެ ނަމަ، މުޒާހަރާ ފުޅާކުރާނެ ކަމަށެވެ.
