ފިލިޕީންސަށް އެރި ތޫފާން ނޯރޫގައި ފެންބޮޑުވެ ގެތަކުން ކަރަންޓު ކެނޑިފައިވާ އިރު، ރެސްކިއު ޓީމުގައި ހިމެނޭ ފަސް މީހުން މަރުވެއްޖެ އެވެ.
އެ ފަސް މީހުން މަރުވީ ވެރިރަށް މެނީލާގެ އުތުރުން އޮންނަ ސޭން މިގުއޭލް ޑިސްޓްރިކްޓުގައި ކުއްލިއަކަށް ފެންބޮޑުވުމުން އާއްމުންނަށް އެހީވުމުގައި އުޅެނިކޮށް އޮޔާ ގެންގޮސްގެންނެވެ.
ތޫފާން ނޯރޫގެ އަސަރު އެންމެ ބޮޑަށް ކުރި އެއް ޑިސްޓްރިކްޓަކީ ސޭން މިގުއޭލް އެވެ. ބައެއް ގެތަކަަށް ފެން ވަނުމުން މީހުން ފުރާޅަށް އަރައި ތިބި އިރު، އިތުރު މީހުން ފެންގަނޑު ތެރެއިން އާއްމުންނަަށް ސަޕްލައި ފޯރުކޮށްދެވޭތޯ ދަނީ ބަލަމުންނެވެ.
ތޫފާން އެންމެ ފުރަތަމަ އެރީ ލުޒޯން ރަށަށް ގަޑިއަކު 240 ކިލޯމީޓަރުގެ ބާރުމިނުގަ އެވެ. ލުޒޯންއަކީ ފިލިޕީންސްގެ އާބާދީގެ 110 މިލިއަން މީހުންގެ ތެރެއިން 50 ޕަސެންޓު ދިރިއުޅޭ ރަށެވެ.
ތޫފާން ނޯރޫ ފިލިޕީންސަށް އެރީ އާދީއްތަ ދުވަހުގެ ރޭގަ އެވެ. އޭގެ ބާރު މިހާރު ދަށްވެފައިވާ އިރު، ހޯމަ ދުވަހުގެ ހަވީރު ފިލިޕީންސުން ފައިބައިގެން ތޫފާން ދާނެ ކަމަަށް ބެލެވެ އެވެ.
ތޫފާނަށް ތައްޔާރުވުމުގެ ގޮތުން 74،000 މީހުން ރައްކާތެރި ހިސާބުތަކަށް ބަދަލުކުރި އެވެ. ވެރިރަށް މެނީލާގައި ވަރަށް ބޮޑަަށް ފެންބޮޑުވާނެކަމުގެ އިންޒާރު ދިން ނަމަވެސް، ސީރިއަސް ގެއްލުމެއް ނުލިބެ އެވެ.
ފިލިޕީންސްގެ ރައީސް ފާޑިނަންޑް މާކޯސް ވިދާޅުވީ މި ފަހަރު ލިބުނު ގެއްލުން ކުޑަވީ ނަސީބުގެ ސަބަބުން ކަމަށާއި ކޮންމެ ފަހަރަކު ވެސް ތޫފާނެއް ކުރިމަތިވާ ނަމަ ފުރިހަމައަށް ތައްޔާރުވުން މުހިއްމު ކަމަށެވެ.
"އަދިވެސް މި އޮޕަރޭޝަން ނުނިމޭ. އަޅުގަނޑުމެންނަށް ނިންމާލެވޭނީ އިވެކުއޭޓް ކުރި ގިނަ މީހުންނަށް އެނބުރި ގެތަކަށް ދެވުމުން،" މާކޯސް ވިދާޅުވި އެވެ.
މާކޯސް އަމުރު ކުރައްވާފައި ވަނީ ހެލިކޮޕްޓަރުގައި ސަޕްލައި ގެންގޮސް، އެންމެ ބޮޑަށް އަސަރު ކުރި ހިސާބުތައް ސާފު ކުރާނެ ސާމާނު ފޯރުކޮށްދިނުމަށެވެ.
ފިލިޕީންސްއަކީ ޕެސިފިކް ކަނޑުގައި އޮންނަ 7000 ރަށް ހިމެނޭ ޖަޒީރާ ގައުމެކެވެ. އެ ގައުމަކީ ޕެސިފިކް ކަނޑުގައި އުފެދޭ ބާރުގަދަ ތޫފާންތަކުގެ ނުރައްކާ އެންމެ ބޮޑު ގައުމެވެ.
ޑިސެމްބަރު 2021 ގައި އެރި ތޫފާން ރާއީގައި 400 މީހުން މަރުވި އެވެ. އެ ތޫފާނުގެ ބޮޑެތި ގެއްލުންތަކެއް ލިބި ގިނަ ބަޔަކު ހާލުގައި ޖެހުނެވެ.
