ޖަަޕާނުގެ ކުރީގެ ބޮޑު ވަޒީރު ޝިންޒޯ އަބޭގެ ރަސްމީ ޖަނާޒާގައި ރައީސް އިބްރާހިމް މުހައްމަދު ސޯލިހުގެ ހާއްސަ މަންދޫބެއްގެ ހައިސިއްޔަތުން ބައިވެރިވެވަޑައިގެންނެވުމަށް ފޮރިން މިނިސްޓަރު އަބްދުﷲ ޝާހިދު ޖަޕާނަށް ފުރާވަޑައިގެންފި އެވެ.
އަބޭ އަވަހާރަވީ މިދިޔަ ޖުލައި މަހު ކެމްޕެއިން އެއްވުމެއްގެ ތެރެއިން މީހަކު ކައިރިވެ ބަޑި ޖެހުމުންނެވެ.
ޓޯކިޔޯގެ ނިޕޯން ބުޑޮކާންގައި މާދަމާ އޮންނަ ޖަނާޒާގައި ގިނަ ގައުމުތަކެއްގެ އިއްޒަތްތެރިން ބައިވެރިވެވަޑަައިގަންނަވާ އިރު، ރައީސް ސޯލިހުގެ ހާއްސަ މަންދޫބެއްގެ ގޮތުން ބައިވެރިވެވަޑައިގެންނެވުމަށް ޝާހިދު ފުރާވަޑައިގެންނެވީ މިއަދުގެ ވަގުތެއްގަ އެވެ.
ޖަނާޒާ ފަށަނީ އަންގާރަ ދުވަހު ޖަޕާނު ގަޑިން މެންދުރު 02:00 (ރާއްޖެ ގަޑިން ހެނދުނު 10:00) ގަ އެވެ. ޖަނާޒާ އޮންނަ ސަރަހައްދުގެ ހުރިހާ މަގުތަކެއް ބަންދު ކުރާނެ އެވެ.
އޭގެ އިތުރުން ހޯމަ ދުވަހުން ފެށިގެން ބުދަ ދުވަހާ ހަމައަށް ޖަނާޒާ އޮންނަ ތަނުގެ މަތިން 25 ނޯޓިކަލް މޭލުގެ ވައިގެ ސަަރަހައްދެއް ބަންދުކުރާނެ އެވެ.
ސަލާމަތީ ކަންކަން ބެލެހެއްޓުމަށް އެތައް ހާސް ފުލުހުން ހަަމަޖައްސާފައިވާ އިރު، ޖަޕާނުގެ އެހެން ހިސާބުތަކުން 2،500 ފުލުހުން ޓޯކިޔޯއަށް ގެނެސްފައިވާ ކަމަށް ރިޕޯޓުތައް ބުނެ އެވެ.
އޮފިސަރުން ދަނީ ކުއްތާ ބޭނުންކޮށްގެން ޓެރަރިޒަމާ ދެކޮޅަށް ހިންގާ ޕެޓްރޯލްތައް އިތުރު ކުރަމުންނެވެ. އެގޮތުން ބޮޑެތި ރޭލު ސްޓޭޝަންތަކާއި ޓޯކިޔޯގެ ހަނޭޑާ އެއާޕޯޓަށް ހާއްސަ ސަމާލުކަމެއް ދީފައިވެ އެވެ.
އޭގެ އިތުރުން އެމްބަސީތައް ވަށައިގެންވާ ސަރަހައްދާއި ބޭރުގެ އިއްޒަތްތެރިން މަޑުކުރަން ހަމަޖެހިފައި ހޮޓެލްތަކުގެ ވަށައިގެންވާ ސަރަހައްދުގެ ސެކިއުރިޓީ ވެސް ވަނީ ވަރުގަދަކޮށްފަ އެވެ.
ޖަޕާނުގެ ނޫސްތަކުން ބުނާ ގޮތުގައި އެކި ގައުމުތަކުން 700 އިއްޒަތްތެރިން ޖަނާޒާގައި ބައިވެރިވެވަޑައިގަންނަވާނެ އެވެ. އޭގެ ތެރޭގައި ގައުމުގެ ވެރިންގެ ގޮތުގައި50 ބޭފުޅުން ހިމެނެ އެވެ.
އެގޮތުން އެންމެ ފާހަގަކުރެވެނީ އެމެރިކާގެ ނައިބު ރައީސް ކަަމަލާ ހެރިސް، އޮސްޓްރޭލިއާގެ ބޮޑު ވަޒީރު އެންތަނީ އަލްބަނީޒް އަދި އިންޑިއާގެ ބޮޑު ވަޒީރު ނަރެންދްރަ މޯދީ އެވެ.
ޖަޕާން ސިފައިންގެ 1000 މީހުން ވެސް ސެކިއުރިޓީ ބަލަހައްޓަން ނެރެން ހަމަޖެހިފައިވާ އިރު، ޖަނާޒާގައި 4،300 އަށް ވުރެ ގިނަ މެހެމާނުން ބަައިވެރިވާނެ އެވެ.
ޖަޕާނުގެ ސަރުކާރުން ރާވާފައި ވަނީ ޖަނާޒާއަށް 11.5 މިލިއަން ޑޮލަރު (1.65 ބިލިއަން ޔެން) ހޭދަކުރުމަށެވެ. އޭގެ ތެރެއިން 800 މިލިއަން ޔެން ހޭދަަކުރަަނީ ސެކިއުރިޓީއަށެވެ.
