ރާއްޖޭގެ މަސްވެރިކަން ރަނގަޅުވުމާއި އެކު މަސްކިރާ އަދަދު ވަކިވަރެއްގައި ހިފެހެއްޓުމާއި އެހެން ގިނަ ދަތިތަކެއް މަސްވެރިންނަށް ކުރިމަތިވެފައި ވާތީ ކަންބޮޑުވުން ފާޅުކޮށް، އެކަންތައްތައް ހައްލުކުރަން ގޮވާލައި ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަަޅައިފި އެވެ.
ރައްޔިތުންގެ މަޖިލީހުގެ ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ހުށަހެޅުއްވި ކުއްލި މައްސަލައިގައި ވިދާޅުވީ ރާއްޖޭގެ މަސްވެރިކަން މިދުވަސް ވަރު ރަނގަޅުވެފައި ވާއިރު މަސްގަންނަ މިންވަރު ލިމިޓްކޮށްފައި ވާތީ މަސްކިރުވަން، މަސްވެރިން އެތައް ދުވަހަކު ކިއުގައި ތިބެން ޖެހޭ ކަމަށެވެ. މަސްވެރިކަމަށް ބޭނުންވާ އައިސް ހޯދާށާއި މަސްދޯނި ފަހަރަށް އަޅާނެ ތެޔޮ ހޯދަން ވެސް އެގޮތަށް ކިއުގައި ތިބެން ޖެހޭ ކަމަށް ކުއްލި މައްސަލައިގައި އޭނާ ވިދާޅުވި އެވެ.
"...މަސްވެރިންނަށް ދޫކުރާ ތެލުގެ މިންވަރު ލިމިޓްކޮށްފައި ވާތީ އެކަމުގެ ސަބަބުން، މަސްވެރިކަަމަށް ނުކުންނަށް ދަތިތަކެއް ކުރިމަތިވެފައި ވާތީއާއި، ރެއާ ދުވާލު ދާ އޮހޮރުވަައިގެން ބާނާ މަސްކޮޅުން މަންފާއެއް ނުލިބުމަކީ ހުރިހާ މަސްވެރިން މިއަދު އެންމެ ކަންބޮޑުވާ މައްސަލަ[އެވެ]،" ކުއްލި މައްސަލައިގައި ޝިޔާމް ވިދާޅުވި އެވެ.
ޝިޔާމް ހުށަހެޅުއްވި ކުއްލި މައްސަލަ މަޖިލީހަށް މިއަދު ބަލައިގަތީ އެކަމަށް ނެގި ވޯޓުގައި ބައިވެރިވެވަޑައިގެންނެވި 29 މެމްބަރުންގެ ތެރެއިން 25 މެމްބަރަކު ވޯޓު ދެއްވައިގެނެވެ. އެ މައްސަލަ ބަލައިގަންނަން ނުފެންނަ ކަމަށް ހަތަރު މެމްބަރަކު ވޯޓު ދެއްވި އިރު ވަކި ގޮތަކަށް ވޯޓު ނުދެއްވައި އެއް މެމްބަރަކު އިންނެވި އެވެ.
ކުއްލި މައްސަލަ މަޖިލީހަށް ބަލައިގަނެ، މިއަދުގެ ޖަލްސާގައި ކުރި ބަހުސްގެ ފުރަތަމަ ފުރުސަތުގައި ޝިޔާމް ވިދާޅުވީ މަސްވެރިކަމުގެ ސިނާއަތާ ބެހޭ ގޮތުން ފިޝަރީޒް މިނިސްޓަރު ޑރ. ހުސައިން ރަޝީދު ހަސަން އާ މިިއަދު މަޖިލީހުގައި ކުރި ސުވާލުތަކަށް އޭނާ ދެއްވީ 2019 ވަނަ އަހަރު ވެސް ދެއްވި ޖަވާބުތައް ކަމަށެވެ.
ކޮންމެ އަހަރަކު ދެ ފަހަރު ރާއްޖޭގެ މަސްވެރިކަން ރަނގަޅުވާކަން ސަރުކާރަށް އެނގޭ ކަމަށާއި އެހެން ނަމަވެސް މަސްވެރިންނަށް ހުރި މައްސަލަތަކަށް އެއްވެސް ހަލެއް ނުލިބޭ ކަމަށް ވެސް އޭނާ ވިދާޅުވި އެވެ.
"މަސްވެރިންގެ މާ ގިނަ ޝަކުވާތަކެއް ނޫޅޭ އިއްޒަތްތެރި ރައީސް. މަސްވެރިންގެ މި އޮންނަނީ މަސްވެރިން ބާނާ މަސްކޮޅު ނުކިރޭ މައްސަލަ،" އޭނާ ވިދާޅުވި އެވެ.
މިފްކޯއިން ހިންގާ އެންމެ ބޮޑު ފެކްޓްރީ ހުންނަ ފެލިވަރު މިސާލަކަށް ނަންގަވައި ޝިޔާމް ވިދާޅުވީ ފެލިވަރަށް މަސްކިރުމަށް ޓަކައި މިހާރު ހަތަރު ދުވަސް ވަންދެން ކިއުގައި ތިބެން ޖެހޭ ކަމަށެވެ. ޝިޔާމްގެ ކުއްލި މައްސަލަ ހުށަހެޅުއްވުމުގެ ކުރިން މަޖިލީހުގައި މިއަދު އޮތީ ފިޝަރީޒް މިނިސްޓަރާ ސުވާލުކުރުމެވެ.
އެ ވަގުތުގައި ގިނަ މެމްބަރުން ތަކެއް ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ މަސް ނުކިރުމުގެ މައްސަލައަށް ދެމެހެއްޓެނިވި ހައްލެއް ހޯދަން ސަރުކާރުން މަސައްކަތް ކުރަމުން އަންނަ ކަމަށެވެ.
