ބާރުގަދަަ ތޫފާން ނޯރޫއަށް ތައްޔާރުވުމުގެ ގޮތުން ފިލިޕީންސްގެ އައްސޭރިފަށުން މީހުން ރައްކާތެރި ހިސާބުތަކަށް ބަދަލު ކުރަން ފަށައިފި އެވެ.
ކެޓެގެރީ ތިނެއްގައި ހިމެނޭ ތޫފާން ނޯރޫ ދަަތުރު ކުރަމުން ދަަނީ ގަޑިއަކު 195 ކިލޯމީޓަރު ބާރުމިނުގަ އެވެ. އޭގެ މިސްރާބު ހުރީ ފިލިޕީންސްގެ މައި ރަށް، ލުޒޯންއާ ދިމާލަށެވެ.
އެ ތޫފާނުގައި ބިންގަނޑު ކަނޑައިގެން ގޮސް، ކުއްލިއަކަށް ފެންބޮޑުވެ، ނުރައްކާތެރި މިންވަރަށް އުދަ އަރާނެ ކަމަށް ބެލެވެ އެވެ. ވެރިރަށް މެނީލާއަށް ވެސް އަސަރު ކުރާނެ ކަމަށް ލަފާކޮށްފައިވެ އެވެ.
ސަރަހައްދީ ސަރުކާރުތަކަށް އަންގާފައި ވަނީ ނުރައްކާ ބޮޑު ހިސާބުތަކުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލު ކުރުމަށެވެ.
ފާއިތުވި 24 ގަޑިއިރުގެ ތެރޭގައި ތޫފާން ދަތުރު ކުރާ ދުވެލި ގަޑިއަކު 90 ކިލޯމީޓަަރު ހަލުވިވެފައިވާތީ، ފިލިޕީންސްގެ ރަށްތަކާ ހަމަައަށް ފޯރާއިރު އަދިވެސް ދުވެލި ބާރުވާނެ ކަމަަށް ބެލެވެ އެވެ.
މެނީލާގެ އިރުން އޮންނަ ކުއޭޒޯން ޕްރޮވިންސްގައި މަސްވެރިން މަހަށް ނިކުތުން މަނާކޮށްފައިވާ އިރު، މިހާރު ވެސް ބައެއް ހިސާބުތަކުން ވަނީ ކަރަންޓު ކެނޑިފަ އެވެ.
ފިލިޕީންސްއަކީ ޕެސިފިކް ކަނޑުގައި އޮންނަ 7000 ރަށް ހިމެނޭ ޖަޒީރާ ގައުމެކެވެ. އެ ގައުމަކީ ޕެސިފިކް ކަނޑުގައި އުފެދޭ ބާރުގަދަ ތޫފާންތަކުގެ ނުރައްކާ އެންމެ ބޮޑު ގައުމެވެ.
ޑިސެމްބަރު 2021 ގައި އެރި ތޫފާން ރާއީގައި 400 މީހުން މަރުވި އެވެ. އެ ތޫފާނުގެ ބޮޑެތި ގެއްލުންތަކެއް ލިބި ގިނަ ބަޔަކު ހާލުގައި ޖެހުނެވެ.
