ތޫފާން ފިއޯނާގައި ކެނެޑާގެ އައްސޭރިފަށަށް ވަރަށް ބޮޑަށް އަސަރުކޮށް، ބައެއް ގެތަށް އޮޔާ މޫދަށް ގެންގޮސްފި އެވެ.
ނިއުފާންޑްލޭންޑްގައި ގެޔާ އެކު މޫދަށް އޮޔާ ދިޔަ އަންހެނަކު ގެއްލިގެން ހޯދުމުގެ މަސައްކަތް ދަނީ ކުރަމުންނެވެ.
ކެނެޑާއަށް ތޫފާން އެރުމަކީ ވަރަށް ނުވާ ކަމެކެވެ. ފުލުހުން ބުނީ މިއީ މީގެ ކުރިން ފެނިފައި ނުވާ ފަދަ ތޫފާނެއް ކަމަށެވެ.
ތޫފާނަށް ފަހު ތަންތަން ސާފު ކުރުމަށް ނޯވާ ސްކޮޓިއާ ސަރަހައްދުގައި ސިފައިން ދަނީ ހަރަކާތްތެރިވަަމުންނެވެ.
ކެނެޑާގެ ފަސް ޕްރޮވިންސަށް ވިއްސާރަކޮށް 160 ކިލޯމީޓަރު ބާރު މިނުގައި ވައި ޖެހުނު އިރު، ފެންބޮޑުވެ އެތައް ހާސް ގެޔަކުން ކަރަންޓު ކެނޑިފައިވެ އެވެ.
ބޮޑު ވަޒީރު ޖަސްޓިން ޓްރޫޑޯ ވިދާޅުވީ ނޯވާ ސްކޮޓިއާއަށް ސިފަައިން ފޮނުވާފައިވާ ކަމަށާއި އާއްމުންނަށް އެހީވުމަށް މައި ސަރުކާރަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.
އޭގެ އިތުރުން ޖަޕާނުގެ ކުރީގެ ބޮޑު ވަޒީރު ޝިންޒޯ އަބޭގެ ރަަސްމީ ޖަނާޒާގައި ބައިވެރިވުމަށް ކުރަން ހަމަޖެހުނު ދަތުރު ކެންސަލްކޮށްފައިވާ ކަމަށް ވިދާޅުވި އެވެ.
ތޫފާނުގެ އިންޒާރު ދިނީ ނޯވާ ސްކޮޓިއާ، ޕްރިންސް އެޑްވާޑް އައިލެންޑް، ނިއުފަންޑްލޭންށް، ނިއު ބްރައުންސްވިކް އަދި ކިޔުބެކް ޕްރޮވިންސްގެ ބައެއް ހިސާބުތަކަށެވެ.
އޭގެ ތެރެއިން ގެތައް އޮޔާ ގެންދިޔައީ ނިއުފަަންޑްލޭންޑުން ކަމަށް ރިޕޯޓުތައް ބުނެ އެވެ. ކަރަންޓު ކެނޑިފައިވާ ހިސާބުތަކަށް އަލުން ހިދުމަތް ދޭން ދުވަސްތަކެއް ހޭދަވާނެ ކަމަށް ބެލެވެ އެވެ.
ކެނެޑާއަށް ބާރުގަދަ ތޫފާންތައް ކުރިމަތިވަނީ ވަރަށް މަދުންނެވެ. ނޯވާ ސްކޮޓިއާއަށް އެންމެ ފަހުން ބޮޑު ތޫފާނެއް ކުރިމަތިވީ 2003 ގަ އެވެ.
އެ ފަހަރު ތޫފާން ހުއާންގައި ދެ މީހުން މަރުވެ، ދަނޑުބިންތަކާއި ބައެއް އިމާރާތްތަކަށް ގެއްލުންވި އެވެ. ތޫފާން ފިއޯނާ ކެނެޑާއަށް ފޯރުމުގެ ކުރިން ފާއިތުވި ހަފްތާގައި އެރީ ޕުއޭޓޯ ރީކޯ އަދި ޑޮމިނިކަން ރިޕަބްލިކްއަށެވެ.
އެމެރިކާގެ ފްލޮރިޑާއަށް ވެސް މި ވަގުތު ތޫފާނެއްގެ ނުރައްކާ އެބަ އޮތެވެ. އެގޮތުން ހޮނިހިރު ދުވަހު ކެރީބިއަން ސަަރަހައްދުން ތޫފާން އިއަން ދަތުރު ކުރި މި ހަފްތާގެ ތެރޭގައި ފްލޮރިޑާއަށް އަރާނެ ކަމަށް ބެލެވެ އެވެ.
