އަންނަ މަހުގެ އެއް ވަނަ ދުވަހު ފަށަން ތާވަލުކޮށްފައިވާ ކްލަބް މޯލްޑިވްސް ކަޕްގައި އެންމެ ފަހުގެ ޗެމްޕިއަން، ރޯޑް ޑިވެލޮޕްމަންޓް ކޯޕަރޭޝަންގެ ރެކްރިއޭޝަން ކްލަބް (އާރްއާރްސީ) އާއި މާލެ ސިޓީ ކައުންސިލްގެ ޓީމު އެއް ގްރޫޕެއްގައި ވާދަކުރަން ޖެހިއްޖެ އެވެ.
ޕީއެސްއެމް ސްޓޫޑިއޯގައި ބޭއްވި ހާއްސަ އިވެންޓެއްގައި ރޭ ގުރުއުތުލުން ކުރިއަށްދިޔައިރު، ގްރޫޕް ބީގައި އާރްއާރްސީ އާއި ސިޓީ ކައުންސިލްގެ އިތުރުން ދެން އޮތީ މޯލްޑިވިއަން އާއި މީޑިއާނެޓް އެވެ. ގްރޫޕް އޭގައި ހިމެނެނީ މުބާރާތަށް ވަރުގަދަ އަށް ތައްޔާރުވެފައިވާ ކްލަބް ވެމްކޯ އާއި ކްލަބް އެމްޓީސީސީ އަދި ފެން ކްލަބާއި މިފްކޯ ރެކްރިއޭޝަން ކްލަބް އެވެ.
ގްރޫޕް ސީގައި ހިމެނެނީ އެމްއޭސީއެލް، ޓްރޭޑް ކްލަބް، ކްލަބް އޭވިއޭޝަން ސެކިއުރިޓީ އަދި ޓީމު ޑީޖީއޭ އެވެ.
މިރޭ ބޭއްވި ކްލަބް މޯލްޑިވްސް ކަޕްގެ ގުރުއަތުލުމުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
މި ފަހަރު ފެނަކަ އިން ނުކުންނާނީ ގައުމީ ފުޓްސަލް ޓީމުގެ ކޯޗު އަބްދުﷲ ނަސީރު (އަބޯ)ގެ އިރުޝާދުގެ ދަށުންނެވެ. އަބޯ އަކީ މިދިޔަ ފަހަރު އާރްއާރްސީ ޗެމްޕިއަންކަން ހޯދިއިރު، އެ ޓީމުގެ ކޯޗެވެ. ފެނަކަ ހިމެނެނީ މުބާރާތުގެ ތަށި ދެ ފަހަރު ހޯދި ޔުނައިޓެޑް ބީއެމްއެލް އާއި ޓީމު ސިވިލް ކޯޓު އަދި ކްލަބް އެއާޕޯޓްސްއާ އެކު ގްރޫޕް ޑީގަ އެވެ.
މިދިިިޔަ ފަހަރުގެ ރަނަރަޕް ޓީމު އެފްއެސްއެމް ގްރޫޕް އީގައި އޮތީ ސްޓެލްކޯ ކްލަބާއި ރާއްޖެ އޮންލައިން ކްލަބް އަދި ހޯމް އެފެއާޒްއާ އެކު އެވެ. މުބާރާތުގެ ތަށި ދެ ފަހަރު އުފާލާލާފައިވާ މޯލްޑިވްސް ޕޯޓްސް ލިމިޓެޑް (އެމްޕީއެލް) ހިމެނެނީ ކަސްޓަމްސް އާއި ޔޫތު މިނިސްޓްރީ އަދި ކްލަބް އާސަންދައާ އެކު ގްރޫޕް އެފްގަ އެވެ.
ގްރޫޕް ޖީގައި އޮތީ މި ފަހަރު ވެސް ވަރުގަދަ ޗެލެންޖެއް ދޭނެ ކަމަށް ބެލެވޭ ކްލަބް އެޗްޑީސީގެ އިތުރުން ދިވެހި ސިފައިންގެ ކްލަބް، އެމްއެމްއޭ ސޯޝަލް ކްލަބް އަދި ކްލަބް ޓީޓީއެސް އެވެ. ގްރޫޕް އެޗްގައި މުބާރާތުގެ އެންމެ ކާމިޔާބު ޓީމު އެސްޓީއޯގެ އިތުރުން ދެން އޮތީ ކްލަބް އިމިގްރޭޝަން، ޓީމު އެލައިޑް އަދި މުލިއާގެ ރެކްރިއޭޝަން ކްލަބް އެވެ.
މިރޭ ބޭއްވި ކްލަބް މޯލްޑިވްސް ކަޕްގެ ގުރުއަތުލުމުގެ ތެރެއިން ކުރިއަށްދިޔަ ފްރީސްޓައިލް ހަރަކާތެއް.--- ފޮޓޯ: މުހައްމަދު ޝާބިން/ އަދަދު
ކްލަބް މޯލްޑިވްސް ކަޕްގެ އަންހެން މުބާރާތް، 18/30 ފުޓްސަލް ފިއެސްޓާގައި މި ފަހަރު ވާދަކުރަނީ ފަސް ޓީމެކެވެ. އެއީ ކްލަބް ޔޫތު މިނިސްޓްރީ، ކްލަބް ވެމްކޯ، ޓީމު ފެނަކަ، އެންމެ ފަހުން ތިން ފަހަރުގެ ޗެމްޕިއަން - އެމްޕީއެލް އަދި ދިވެހި ސިފައިންގެ ކްލަބް އެވެ. ފަސް ޓީމުގެ މެދުގައި ލީގު ބުރެއް ކުުޅުމަށް ފަހު އެންމެ ރަނގަޅު ނަތީޖާ ނެރޭ ދެ ޓީމެއް ފައިނަލަށް ދާނެ އެވެ.
ތަފާތު އެކި ހަރަކާތްތަކާ އެކު ރޭ ކްލަބް މޯލްޑިވްސްގެ ގުރުއަތުލުމުގެ އިވެންޓް ކުރިއަށްދިޔައިރު، މުބާރާތް ކިކޮފް ކުރުމުގެ ގޮތުން ހާއްސަ އިވެންޓެއް މި މަހު 30 ގައި އޮންނާނެ އެވެ. މުބާރާތުގެ މެޗުތައް ފަށާނީ އަންނަ މަހު އެއް ވަނަ ދުވަހު އެވެ.
މި ފަަހަރުގެ ކްލަބް މޯލްޑިވްސް ކަޕްގެ ޕްލެޓިނަމް ސްޕޮންސަރުންނަކީ މައިލޯ، ސޮނީ ސްޕޯޓްސް، ޗެމްބާ ސްކެއާ އަދި އެލައިޑް އިންޝިއުރެންސް އެވެ. މުބާރާތުގެ އޮންލައިން މީޑިއާ ޕާޓްނަރަކީ "އަދަދު" އެވެ.
އިޖުތިމާއީ ޒިންމާ އަދާކުރުމުގެ ގޮތުން މި ފަހަރު ކްލަބް މޯލްޑިވްސް އިން ހާއްސަ ހަރަކާތްތަކެއް ކުރިއަށްގެންދަން ނިންމާފައިވާއިރު، އެކަމުގައި ބައިވެރިވާނީ މުބާރާތުގެ ސޯޝަލް ޕާޓްނަރެއްގެ ގޮތުގައި ބައިވެރިވާ ބީވިޒަމް (ބްލައިންޑް އެންޑް ވިޒުއަލީ އިމްޕެއާޑް ސޮސައިޓީ އޮފް މޯލްޑިވްސް) އެވެ.
