ޕޮޕިއުލާ ފްރަންޓް އޮފް އިންޑިއާ (ޕީއެފްއައި) މުސްލިމް ގްރޫޕްގެ ގިނަ މެމްބަރުންތަަކެއް ހައްޔަރު ކުރުމުން މައްސަލަ ހޫނުވެއްޖެ އެވެ.
އެ ގްރޫޕާ ދެކޮޅު އޮޕަަރޭޝަން ހިންގީ އިންޑިއާގެ ޓެރަަރިޒަމް ހުއްޓުވާ ނޭޝަނަލް އިންވެސްޓިގޭޝަން އޭޖެންސީ (އެންއައިއޭ) އަދި މާލީ ކުއްތައް ހުއްޓުވާ އެންފޯސްމަންޓް ޑައިރެކްޓޮރޭޓް (އީޑީ) އިންނެވެ.
އިންޑިއާގެ 11 ސްޓޭޓެއްގައި ބުރާސްފަތި ދުވަހުގެ ހެނދުނު ހިންގި އޮޕަރޭޝަންގައި ޕީއެފްއައިގެ 106 މެމްބަރުން ހައްޔަރު ކުރި ކަމަށް ޕްރެސް ޓްރަސްޓް އޮފް އިންޑިއާ (ޕީޓީއައި) ނޫހުން ބުނެ އެވެ.
އެކަމާ ހެދި ޕީއެފްއައިގެ މެމްބަރުން ކެރަލާ އަދި ޓަމިލް ނާޑޫގައި މުޒާހަރާ ކުރި އެވެ. އެ ގްރޫޕުން ބުނީ ސަރުކާރުން އުޅެނީ އިދިކޮޅި ފިކުރު ފޮހެލައި އަޑު މަޑު ކުރަން ކަމަށެވެ.
އެންއައިއޭއިން ނެރުނު ބަޔާނެއްގައި ބުނީ ހައްޔަރު ކުރީ ތަފާތު ފަސް މައްސަލައަކާ ގުޅުން ހުރި 45 މީހުން ކަމަށެވެ. އޮޕަރޭޝަންތަކުގެ ތެރެއިން ގިނަ އަދަދެއްގެ ނަގުދު ފައިސާ އާއި ހަތިޔާރު އަދި ޑިޖިޓަލް ސާމާނު ވެސް ހިފެހެއްޓި އެވެ.
ޕީއެފްއައިއަކީ 2006 ވަނަ އަހަރު އުފެދުނު އަމިއްލަ ޖަމިއްޔާއެކެވެ. އެ ޖަަމިއްޔާއިން ބުނާ ގޮތުގައި އެ މީހުން ލަނޑުދަނޑިއަކީ ފަގީރުންގެ ހައްގުގައި މަސައްކަތްކޮށް، ހަމަހަމަކަން ގެނަައުމެވެ.
އެއީ 1992 ވަނަަ އަހަރު ބާބްރީ މިސްކިތް ތަޅާލުމުން ކެރަލާގައި އުފެދުނު ނޭޝަނަލް ޑެވެލޮޕްމަންޓް ފްރަންޓް (އެންޑީއެފް) އާއި އިތުރު ދެ ޖަމިއްޔާ ގުޅިގެން އުފެއްދި އާ ޖަމިއްޔާއެކެވެ.
މި ވަގުތު ޕީއެފްއައި އެންމެ ބޮޑަށް ފެތުރިފައި އޮތީ ކެރަލާ އަދި ކަަރްނާޓަކާގަ އެވެ. އެކަމަކު އިންޑިއާގެ 20 ސްޓޭޓުގައި އެ ގްރޫޕްގެ މެމްބަަރުން އުޅެ އެވެ.
ޕީއެފްއައިގެ ވެބްސައިޓުގަައިވާ ގޮތުން އިޖުތިމާއީ ހަމަހަމަކަން ގެނައުމަށް ސިޔާސަަތުތަކަށް ބަަދަލު ގެނެސް، ދާލިތު ކޮމިއުނިޓީ އާއި ގަބީލާ އަދި މައިނޯރިޓީ މީހުންގެ ހައްގުތައް ކަށަވަރު ކުރަން ޖެހެ އެވެ.
ދާލިތު ކޮމިއުނިޓީއަކީ ހިންދޫ ދީނުގެ ފަންތި ކުރުމުގެ ނިޒާމުގައި އޮންނަ އެންމެ ދަށް ފަންތި އެވެ. ގާނޫނު އަސާސީގެ ދަށުން ދާލިތު ކޮމިއުނިޓީއަށް ރައްކާތެރިކަން ފޯރުކޮށްދިން ނަަމަވެސް، އެ މީހުންނާ މެދު ލާއިންސާނީ އެތައް އަމަލެއް ހިންދޫއިން އަދިވެސް ހިންގަ އެވެ.
އެ މީހުންގެ ހައްގުތައް ހޯދަން ޕީއެފްއައިއިން އަމާޒު ކަނޑައެޅި ނަމަަވެސް، ސަރުކާރުން ވަނީ ޕީއެފްއައިއާ ދެކޮޅަށް ގިނަ ތުހުމަތުތަކެއްކޮށްފަ އެވެ. އެގޮތުން ބައިބައިވުން އުފައްދަން އުޅޭ ކަމަށް ވެސް ތުހުމަތު ކުރެ އެވެ.
މިދިޔަ ޖޫން މަހު ރާޖަސްތާންގައި ހިންދޫ މީހެއްގެ ބޯބުރި ކުރުމުގައި ޕީއެފްއައިގެ މެމްބަރުން ބައިވެރިވި ކަމަށް ފުލުހުން ތުހުމަތު ކުރެ އެވެ.
އޭގެ އިތުރުން އިންޑިއާއަކީ އިސްލާމީ ގައުމަކަށް ހަދަން އެ ގްރޫޕުން ގެންގުޅޭ ފިކުރުމުގެ ލިޔުމެއް ބިހާރްގައި ދައުރުވި ކަމަށް ފުލުހުން ބުނެ އެވެ. އެކަމަކު ޕީއެފްއަައިއިން ބުނީ "އިންޑިއާ 2047: ޓުވޯޑްސް ރޫލް އޮފް އިސްލާމިކް އިންޑިއާ" ލިޔުމަކީ ބަޔަކު އުފެއްދި ފޭކު އެއްޗެއް ކަމަށެވެ.
އޭގެ އިތުރުން ދެ މަނާ ގްރޫޕާއި ޕީއެފްއައިއާ ގުޅުން އޮންނަ ކަމަށް ވެސް ތުހުމަތު ކުރެވެ އެވެ. އެއީ ސްޓުޑެންޓްސް އިސްލާމިކް މޫވްމަންޓް އޮފް އިންޑިއާ (ސިމީ) އަދި އިންޑިއަން މުޖާހިދީން ގްރޫޕެވެ.
މި އަހަރުގެ ކުރީކޮޅު ކަރްނާޓަކާގެ ސްކޫލެއްގައި ކުދިން ބުރުގާ އެޅުން މަނާ ކުރުމުން މުޒާާހަރާ ކުރުމަށް ހިތްވަރު ދިނީ ޕީއެފްއައިއިން ކަމަށް އެ ސްޓޭޓުގެ ސަރުކާރުން ބުނެ އެވެ.
އިންޑިއާގައި ވެރިކަން ކުރާ ހިންދޫ ފިކުރުގެ ބަރަތިޔަ ޖަނަތަ ޕާޓީ (ބީޖޭޕީ) އާ ގުޅުން އޮންނަ ހިންދޫ ގްރޫޕްތަކުން ޕީއެފްއައި މަނާ ކުރުމަށް ޕްރެޝަަރު ކުރާތާ އަހަރުތަކެއް ވެއްޖެ އެވެ.
