އިންޑިއާގައި އަންހެން ދަރިވަރަކު ފާހާނާގައި އެހެން އަންހެނުންގެ މަންޒަރުތައް ސިއްރުން ވީޑިއޯ ކުރި މައްސަލައެއް ހޫނުވެ ޗަންދިގަރް ޔުނިވާސިޓީ ހަފްތާއަކަށް ބަންދުކޮށްފި އެވެ.
ޗަންދިގަރް ޔުނިވާސިޓީއަކީ އުތުރު ޕަންޖާބް ސްޓޭޓުގެ ޕްރައިވެޓް ޔުނިވާސިޓީއެކެވެ. ވީޑިއޯތަކުގެ މައްސަލައިގައި އެތައް ހާސް ދަރިވަރުން އާދީއްތަ ދުވަހު މުޒާހަރާ ކުރި އެވެ.
މުޒާހަރާ ކުރަން ފެށީ އަންހެން ދަރިވަރަކު ފާހާނާގައި އެހެން އަންހެނުންގެ މަންޒަރުތައް ސިއްރުން ވީޑިއޯކޮށް، އޭނާގެ ލޯބިވެރިޔާއާ ހިއްސާކުރަމުންދާ ކަމަށް އަޑު ފެތުރުމުންނެވެ.
އެހެން ނަމަވެސް، ޔުނިވާސިޓީ އާއި ޕަންޖާބްގެ ފުލުހުން އެ ވާހަކަތައް ދޮގުކުރެ އެވެ. އެގޮތުން ތުހުމަތު ކުރެވޭ އަންހެން މީހާގެ ފޯނުން ފެނުނީ އޭނާގެ އަމިއްލަ ވީޑިއޯތަކެއް ކަމަށް ފުލުހުން ބުންޏެވެ.
އެކަމަކު އެހެން މީހުންގެ ހުއްދަ ނެތި ޕްރައިވެޓް ފޮޓޯ ހިއްސާކުރި ކަމުގެ ތުހުމަތަށް އެ އަންހެން މީހާ އާއި އޭނާގެ ލޯބިވެރިޔާ އަދި އިތުރު ފިރިހެނަކު ހައްޔަރުކޮށްފައިވެ އެވެ.
އަންހެން މީހާގެ ފޯނު ހިފަހައްޓައި ފޮރެންސިކް ތަހުލީލުތައް ކުރުމަށް ވަނީ ހަވާލުކޮށްފަ އެވެ. އާދީއްތަ ދުވަހު ދަރިވަރުން މުޒާހަރާ ހުއްޓާލީ އެ މީހުންގެ ބައެއް ޑިމާންޑުތައް ބަލައިގަތުމުންނެވެ.
ދަރިވަރުން ދެކޭ ގޮތުގައި ޔުނިވާސިޓީ އާއި ފުލުހުން ދަނީ ވީޑިއޯތަކެއް ނެތް ކަމަށް ބުނެ މައްސަަލަ އޮއްބާލަން މަސައްކަތް ކުރަމުންނެވެ.
އެގޮތުން މީހުންގެ ސިއްރު ވީޑިއޯތަކެއް ނެތް ނަމަ ތުހުމަތު ކުރެވޭ މީހުންނާ ދެކޮޅަށް ދައުވާ އުފުލީ ކީއްވެގެންތޯ ބައެއް ދަރިވަރުން ސުވާލު އުފައްދަ އެވެ.
