އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ޖަނާޒާގައި ސައުދީ އަރަބިއްޔާގެ ވަލީ އަހުދު އަމީރު މުހައްމަދު ބިން ސަލްމާން ބައިވެރިވެވަޑައިނުގަންނަވާނެ ކަމަށް އިނގިރޭސި ފޮރިން އޮފީހުން ބުނެފި އެވެ.
ފޮރިން އޮފީހުގެ އޮފިޝަލަކާ ހަވާލަދީ ރޮއިޓާޒް ނޫހުން ބުނީ އެގޮތަށް ނިންމީ ސައުދީ އަރަބިއްޔާއިން ކަމަށެވެ. ވަލީ އަހުދަށް ޖަނާޒާގެ ދައުވަތު ފޮނުވުމުން އެކްޓިވިސްޓުން ވަނީ ނުރުހުން ފާޅުކޮށްފަ އެވެ.
އެމެރިކާގެ ޖާސޫސީ އިދާރާއިން ބުނާ ގޮތުގައި 2018 ވަނަ އަހަރު ސައުދީ އަރަބިއްޔާގެ ނޫސްވެރިޔާ ޖަމާލް ހަޝޮގްޖީ މަރާލުމަށް އަމުރު ކުރެއްވީ ވަލީ އަހުދެވެ. ހަޝޮގްޖީ މަރާލީ އިސްތަންބޫލުގައި ހުންނަ ސައުދީ ކޮންޒިއުލޭޓް ތެރޭގައި ކަމަށާއި އޭނާގެ ހަށިގަނޑުތައް ގުނަވަންތައް ވަކިކުރި ކަމަށް ވެސް އެ އިދާރާއިން ބުނެ އެވެ.
ސައުދީ ވަލީ އަހުދާއި ސައުދީ ސަރުކާރުން އެ ތުހުމަތު ދޮގުކުރެ އެވެ. އޭގެ ފަހުން ހުޅަނގުގެ ގައުމުތަކާއި ސައުދީ ވަލީ އަހުދާ ދެމެދު އޮތް ގުޅުން ގޯސްވި އެވެ. ދެހާސް އަށާރަ ވަނަ އަހަރަށް ފަހު މިއަަދާ ހަމައަށް ވެސް ސައުދީ ވަލީ އަހުދު އިނގިރޭސިވިލާތަށް ދަތުރެއް ނުކުރައްވަ އެވެ.
ސައުދީ އެމްބަސީގެ ތަރުޖަމާނަކު ކުރިން ބުނީ މި ހަފްތާ ބަަންދުގައި ވަލީ އަހުދު ލަންޑަނަށް ވަޑައިގަންނަވާނެ ކަމަށެވެ. އެހެން ނަމަވެސް އިނގިރޭސި ފޮރިން އޮފީހުން ބުނީ ވަލީ އަހުދުގެ ބަދަަލުގައި ވަޑައިގަންނަވާނީ އަމީރު ތުރުކީ އަލް ފައިސަލް ކަމަށެވެ.
ސައުދީ ވަލީ އަހުދުގެ އިތުރުން ޗައިނާއަށް ދައުވަތު ދިނުމުން ވެސް ފާޑުކިޔުން އަމާޒުވި އެވެ. ޗަައިނާއިން ނިންމާފައި ވަނީ ރައީސް ޝީ ޖިންޕިންގެ ބަދަލުގައި ނައިބު ރައީސް ވާންގް ގިޝާން ދަތުރު ކުރެއްވުމަށެވެ.
