އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ޖަނާޒާއަށް ސައުދީ އަރަބިއްޔާގެ ވަލީ އަހުދު އަމީރު މުހައްމަދު ބިން ސަލްމާނަށް ދައުވަތު ފޮނުވުމުން އެކްޓިވިސްޓުން ނުރުހުން ފާޅުކޮށްފި އެވެ.
އެމެރިކާގެ ޖާސޫސީ އިދާރާއިން ބުނާ ގޮތުގައި 2018 ވަނަ އަހަރު ސައުދީ އަރަބިއްޔާގެ ނޫސްވެރިޔާ ޖަމާލް ހަޝޮގްޖީ މަރާލުމަށް އަމުރު ކުރެއްވީ ވަލީ އަހުދެވެ. ހަޝޮގްޖީ މަރާލީ އިސްތަންބޫލުގައި ހުންނަ ސައުދީ ކޮންޒިއުލޭޓް ތެރޭގައި ކަމަށާއި އޭނާގެ ހަށިގަނޑުތައް ގުނަވަންތައް ވަކިކުރި ކަމަށް ވެސް އެ އިދާރާއިން ބުނެ އެވެ.
ސައުދީ ވަލީ އަހުދާއި ސައުދީ ސަރުކާރުން އެ ތުހުމަތު ދޮގުކުރެ އެވެ. އޭގެ ފަހުން ހުޅަނގުގެ ގައުމުތަކާއި ސައުދީ ވަލީ އަހުދާ ދެމެދު އޮތް ގުޅުން ގޯސްވި އެވެ. ދެހާސް އަށާރަ ވަނަ އަހަރަށް ފަހު މިއަަދާ ހަމައަށް ވެސް ސައުދީ ވަލީ އަހުދު އިނގިރޭސިވިލާތަށް ދަތުރެއް ނުކުރައްވަ އެވެ.
އެހެން ނަމަވެސް ސައުދީ އެމްބަސީގެ ތަރުޖަމާނަކު ބުނީ މި ހަފްތާ ބަަންދުގައި ވަލީ އަހުދު ލަންޑަނަށް ވަޑައިގަންނަވާނެ ކަމަށެވެ. އެކަމަކު ސެޕްޓެމްބަރު 19 ގައި އޮންނަ ރާނީގެ ޖަނާޒާގައި ސީދާ ބައިވެރިވެވަޑައިގަންނަވާނެކަން ސާފެއް ނޫނެވެ.
ހަޝޮގްޖީގެ ލޯބިވެރިޔާ ހަތީސޭ ގެންގިޒް ވަނީ ވަލީ އަހުދަށް އިނގިރޭސިވިލާތުން ދައުވަތު ފޮނުވުމުން ނުރުހުން ފާޅުކޮށްފަ އެވެ. އޭނާ ގޮވާލީ ވަލީ އަހުދު ލަންޑަނުން ހައްޔަރު ކުރެއްވުމަށެވެ.
ކެމްޕެއިން އަގެއިންސްޓް ދަ އާމްސް ޓްރޭޑް ގްރޫޕުން ވެސް ބުނީ މި ދަތުރުފުޅުގެ ނާޖައިޒް ބޭނުންކޮށް، ސައުދީ އަރަބިއްޔާގެ އިންސާނީ ހައްގުތަކުގެ ރެކޯޑް "ދޮވެލަން" އުޅޭނެ ކަމަށެވެ.
ހުޅަނގުގެ ގައުމުތަކުގެ ފާޑުކިޔުން ވަލީ އަހުދަށް އަމާޒުވި ނަމަވެސް، އެމަނިކުފާނު ގެންދަވަނީ ސަައުދީ އަަރަބިއްޔާއަށް ގިނަ އިސްލާާހީ ބަދަލުތަކެއް ގެންނަމުންނެވެ. އެގޮތުން ސިނަމާތައް ހުޅުވައި އާއްމުންގެ މުނިފޫހިފިލުވޭނެ ގޮތްތައް ވަނީ ތައާރަފުކޮށްފަ އެވެ.
އޭގެ އިތުރުން އަންހެން ރައްޔިތުންނަށް ކާރު ދުއްވުމުގެ ހައްގު ދީފައިވާ އިރު، ބޮޑެތި ކުޅިވަރު އަދި މިޔުޒިކް ފެސްޓިވަލްތައް ސައުދީ އަރަަބިއްޔާގައި ބޭއްވުމަށް ވެސް މިހާރު ހުއްދަ ދެ އެވެ.
