އިނގިރޭސިވިލާތުގެ ތަހުތުގައި 70 އަހަރު ހޭދަކުރެއްވި ރާނީ އެލިޒަބަތު ދެ ވަނަ އަވަހާރަވީ ސެޕްޓެމްބަރު އަށް ވަނަ ދުވަހު އެވެ. އޭގެ ދެ ހަފްތާއެއްހާ ދުވަސް ފަހުން ސެޕްޓެމްބަރު 19، ގައި ބާއްވަން ހަމަޖެހިފައިވާ ޖަނާޒާއަކީ ފަަހުގެ ތާރީހެއްގައި ބާއްވާ އެންމެ ބޮޑު ޖަނާޒާއަށް ވެގެންދާނެ އެވެ.

ގިނަ ޝާހީ ބޭފުޅުންނާއި ސިޔާސީ ނުފޫޒު ގަދަަ ވެރިން އެއް ތަނަކުން ފެންނާނެ ދުވަހަކަށް އެ ޖަނާޒާ އޮންނަ ދުވަސް ވެގެންދާނެ އެވެ. ދައުލަތުގެ ވެރިންގެ ގޮތުގައި ހިމެނޭ އަދި ބޭރުގެ އިއްޒަތްތެރިންގެ ގޮތުގައި ހިމެނޭ 500 އަށް ވުރެ ގިނަ މީހުންނަށް ވަނީ ޖަނާޒާގެ ދައުވަތު ފޮނުވާފަ އެވެ.

އެހެން ނަމަވެސް، ތަފާތު އެކި ސަބަބުތަކާ ހެދި ޖަނާޒާގެ ދައުވަތު ނުލިބޭ މަދު ވެރިންތަކެއް އެބަ ތިއްބެވެ.

އިނގިރޭސި ޝާހީ އާއިލާ، ރާނީގެ އެކުވެރިން އަދި މުވައްޒަަފުން

ރާނީގެ ދޮށީ ދަރިކަލުން އަދި އާ ރަސްގެފާނު ޗާލްސް ތިން ވަނައާއެކު އަނބިކަނބަލުން ކުއީން ކޮންސޯޓް ކެމިލާ ޖަނާޒާގައި އިސްކޮށް ތިއްބަވާނެ އެވެ. ރާނީގެ އަނެއް ތިން ބޭފުޅުން، އޭން، އެންޑްރޫ އަދި އެޑްވާޑް ވެސް ޖަނާޒާގައި އިސްކޮށް ތިއްބަވާނެ އެވެ. އޭގެ އިތުރުން ޝާހީ އާއިލާއާ ކައިވެނީގެ ގުޅުން އޮތް ފަރާތްތައް ވެސް ޖާނާޒާއިން ފެންނާނެ އެވެ.

ރާނީގެ މާމަ ދަރިކަލުންގެ ގޮތުގައި ތިއްބެވި ނުވަ ބޭފުޅުންނާއި އެ މީހުންގެ އާއިލާތަކުގެ އިތުރުން، ރާނީގެ 12 މުނި މާމަ ދަަރިކަަލުން ވެސް ޖަނާޒާގައި ބައިވެރިވެވަޑައިގަންނަވާނެ އެވެ. އޭގެ އިތުރުން ރަސްގެފާނު ޗާލްސްގެ ކުރީގެ އަނބިކަނބަލުން ޑަޔާނާގެ އާއިލާގެ ބޭފުޅުން ވެސް ތިބޭނެ ކަމަށް ބެލެވެ އެވެ.

ރާނީގެ އެކުވެރިންގެ ގޮތުގައި ފާހަގަވާ މީހުންނާއި މުވައްޒަފުން ވެސް ޖަނާޒާގައި ބައިވެރިވެވަޑައިގަންނަވާނެ އެވެ. އެގޮތުން 1960 ގެ އަހަަރުތަކުގައި ރާނީގެ މުވައްޒަފެއްގެ ގޮތުގައި އުޅެން ފެށި ލޭޑީ ސޫޒަން ހަސީ އާއި ޑޭމް މޭރީ މޮރިސަން ހިމެނެ އެވެ.

އެންޖެލާ ކެލީ.

އޭގެ އިތުރުން ރާނީގެ ޕާސަލަަން އެސިސްޓަންޓް އަދި 30 އަހަރު ވަންދެން ރާނީގެ ހެދުންތައް ތައްޔާރު ކުރެއްވުމަށް އެހީވެދިން އެންޖެލާ ކެލީ ވެސް ފާހަގަކުރެވެ އެވެ. ރާނީގެ އެޑްވައިޒަރު ޖޯން ވޮރެން އާއި ސާ ޑޭވިޑް އެޓެންބޮރޯ ވެސް ފެނިގެން ދާނެ އެވެ.

ޔޫރަޕްގެ ޝާހީ އާއިލާތައް

ޔޫރަޕްގެ ގިނަ ޝާހީ އާއިލާތަކުގެ މެމްބަރުންނަކީ ރާނީއާ ލޭގެ ގުޅުން އޮންނަ އާއިލީ ބޭފުޅުންނެވެ. އެ ފަރާތްތައް ވެސް ޖަނާޒާގައި ބައިވެރިވެވަޑަައިގަންނަވާނެ އެވެ.

ބެލްޖިއަމްގެ ރަސްގެފާނު ފިލިޕޭ އާއި ރާނީ މަތިލްޑޭ، ނެދަލޭންޑްސްގެ ރަސްގެފާނު ވިލެމް އެލެގްޒެންޑާ އަދި ރާނީ މެކްސިމާ ވަނީ ޖަނާޒާއަށް ވަޑައިގަންނަވާނެކަން އިއުލާންކޮށްފަ އެވެ.

ނެދަލޭންޑްސްގެ ރަސްގެފާނު ވިލެމް އެލެގްޒެންޑާ އަދި ރާނީ މެކްސިމާ (ވ).

އޭގެ އިތުރުން ސްޕެއިންގެ ރަސްގެފާނު ފެލިޕޭ އާއި ރާނީ ލެޓީޒިއާ އަަދި ނޯވޭ، ސްވިޑަން، ޑެންމާކާއި މޮނާކޯގެ ޝާހީ އާއިލާއިން ވެސް ވަނީ ދައުވަތު ގަބޫލުކޮށްފަ އެވެ.

ކޮމަންވެލްތުގެ ލީޑަރުން

ރާނީ އެލިޒަބަތު އިނގިރޭސި ތަހުތުގައި ހޭދަކުރެއްވި މުއްދަަތުގައި، އެކަމަނާއަކީ ކޮމަންވެލްތުގެ ވެސް އެންމެ އިސް ވެރިޔާ އެވެ. އެހެންކަމުން ކޮމަަންވެލްތުގައި ހިމެނޭ ގައުމުތަކުގެ ވެރިން ޖަނާޒާއަށް ވަަޑައިގަންނަވާނެ އެވެ.

އޮސްޓްރޭލިއާގެ ބޮޑު ވަޒީރު އެންތަނީ އަލްބަނީޒް އާއި ނިއުޒީލޭންޑްގެ ބޮޑު ވަޒީރު ޔަސިންޑާ އާޑޭން އަދި ކެނެޑާގެ ބޮޑު ވަޒީރު ޖަސްޓިން ޓްރޫޑޯ ވަނީ ދައުވަތު ގަބޫލުކުރަައްވައިފަ އެވެ.

ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެސް ދައުވަތު ގަަބޫލުކުރައްވައި ހޮނިހިރު ދުވަހު އިނގިރޭސިވިލާތަށް ފުރާވަޑައިގެންފައިވާ އިރު، އަވައްޓެރި އެހެން ގައުމުތަކުގެ ވެރިން ވެސް ޖަނާޒާގައި ބައިވެރިވެވަޑައިގަންނަވަ އެވެ.

އެގޮތުން ސްރީލަންކާާގެ ރައީސް ރަނިލް ވިކްރަމަސިންހަ އާއި އިންޑިއާގެ ރައީސް ދްރޫޕަދީ މުރްމޫ އަދި ބަންގްލަދޭޝްގެ ބޮޑު ވަޒީރު ޝެއިހް ހަސީނާ ފާހަގަކުރެވެ އެވެ.

އެހެން ގައުމުތަކުގެ ލީޑަރުން

އެމެރިކާގެ ރައީސް ޖޯ ބައިޑެން އާއި ޖަރުމަނުވިލާތުގެ ރައީސް ފްރޭންކް ވޯލްޓާ ސްޓެއިންމެޔޭ، އިޓަލީގެ ރައީސް ސާޖިއޯ މަޓަރެއްލާ އަދި ފްރާންސްގެ ރައީސް އިމޭނުއެލް މެކްރޯން ވަނީ ދައުވަތު ގަބޫލުކުރައްވައިފަ އެވެ.

ޗައިނާގެ ރައީސް ޝީ ޖިންޕިންއަށް ވެސް ދައުވަތު ފޮނުވާފައިވާ އިރު، އެމަނިކުފާނު މިހާތަނަށް ޖަވާބެއް ނުދެއްވަ އެވެ. ޗައިނާގެ ފޮރިން މިނިސްޓްރީން ބުނީ އެ ގައުމުގެ އިސް ވަފުދެއް ފޮނުވުމާ މެދު ވިސްނަމުންދާ ކަމަށެވެ.

އިރާނުގެ ރައީސަށް ދައުވަތު ނުފޮނުވި ނަމަވެސް އެ ގަައުމުގެ ސަފީރަކަށް ދައުވަަތު ފޮނުވި އެވެ. އޭގެ އިތުރުން އުތުރު ކޮރެއާ އާއި ނިކަަރަގުއާއަަށް ވެސް ދައުވަތު ދިނީ އެންމެ އިސްވެރިޔާގެ ބަަދަަލުގައި ސަފީރަކު ފޮނުވުމަށެވެ.

ދައުވަތު ނުލިބޭ ވެރިން

އިނގިރޭސިވިލާތުން ދައުވަތު ނުފޮނުވާ ގައުމުތަކަކީ ސީރިއާ، ވެނެޒުއެލާ އަދި އަަފްގާނިސްތާން ކަމަށް ބީބީސީއިން ރިޕޯޓުކުރެ އެވެ. އެއީ އިނގިރޭސިވިލާތާއި އެ ތިން ގައުމާ ދެމެދު ފުރިހަމަ ޑިޕްލޮމެޓިކް ގުޅުން ގާއިމްވެފައި ނެތުމުންނެވެ.

އޭގެ އިތުރުން ރަޝިއާ އާއި ބެލަރޫސް އަަދި މިޔަންމާގެ ވެރިންނަށް ވެސް ދައުވަތު ނުފޮނުވަ އެވެ. އެގޮތަށް ނިންމީ ޔޫކްރެއިން ހަަނގުރާމައާ ގުޅިގެންނެވެ. ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމަ ފެށުމުގައުި ބެލަރޫސް އެހީތެރިވި ކަމަށް ހުޅަނގުގެ ގައުމުތަކުން ބުނެ އެވެ.

އިނގިރޭސިވިލާތާއި މިޔަންމާގެ ގުޅުން ގޯސްވީ، މިދިޔަ އަހަރު އެ ގައުމުގައި ހިންގި އަސްކަރީ ބަގާވާތާ ގުޅިގެންނެވެ.

ވެރިން ޖަނާޒާއަށް ވަޑައިގަންނަވާނީ ބަހުގައި

ރާނީގެ ޖަނާޒާއާ ދިމާކޮށް އިނގިރޭސިވިލާތުން ނެރުނު އުސޫލުގައި ބުނާ ގޮތުން އެހެން ގައުމުތަކުގެ ވެރިން ޖަނާޒާއަށް ވަޑައިގަންނަވަން ޖެހޭނީ ޕްރައިވެޓް ކާރުތަކުގެ ބަދަލުގައި ހާއްސަ ބަހެއްގަ އެވެ.

އެހެން ނަމަވެސް ރިޕޯޓުތައް ބުނާ ގޮތުން އެމެރިކާގެ ރައީސް ޖޯ ބައިޑެން އާއި ފަސްޓް ލޭޑީ ޖިލްގެ ސެކިއުރިޓީ ސަބަބުތަކާ ހެދި، އެ ދެ ކަނބަލުން ވަޑައިގަންނަވާނީ ކާރުކޮޅުގަ އެވެ.

ޕޮލިޓިކޯ ނޫހުން ބުނީ އެފަދަ އުސޫލެއް ނެރުނީ ޖަނާޒާގެ ސެކިއުރިޓީ ކަންކަމަށް ކުރަން ޖެހޭ ހޭދަ އާއި މަސައްކަތް މާ ބޮޑު ވާތީ އެވެ. ގައުމުތަކުގެ ވެރިންގެ ވަފުދު ވީހާވެސް ކުޑަކުރަން ލަފާދީފައިވެ އެވެ.

އޭގެ އިތުރުން ހީތްރޯ އެއާޕޯޓުގައި ވެރިންގެ ޕްރައިވެޓް ބޯޓުތަކާއި ޖެޓުތައް ޕާކު ނުކުރެވޭނެ ކަމަށާއި ލަންޑަންގެ އެހެން އެއާޕޯޓުތައް ބޭނުން ކުރުމަށް ލަފާދީފައިވެ އެވެ. އެހެންކަމުން އެދިފައި ވަނީ ޖަނާޒާގެ އެއް ދުވަސް ކުރިން ކޮމާޝަލް ފްލައިޓުގަައި ދަތުރު ކުރުމަަށެވެ.

އެ އުސޫލުގައި އިތުރަށްވާ ގޮތުން ވެރިޔަކު އެއާޕޯޓަށް ވަޑައިގަންނަވާ އިރު، އެއްވެސް ގައުމެއްގެ ދިދަަ ވެސް އާއްމުކޮށްގެން ނުވާނެ އެވެ.