ބޯކޮށް ވާރޭވެހި ޕާކިސްތާނުގައި ފެންބޮޑުވެފައިވާ މި ދަނޑިވަޅުގައި ސިއްހީ ކާރިސާއެއް ކުރިމަތިވުމުގެ ބިރު ބޮޑުވެއްޖެ އެވެ.
ފެންބޮޑުވުމުގެ އަސަރު 33 މިލިއަން މީހުންނަަށް ކޮށްފައިވާ އިރު، 1،500 އަށް ވުރެ ގިނަ މީހުން މަރުވެފައިވެ އެވެ. އޭގެ ތެރޭގައި ގިނައީ ކުޑަކުދިންނެވެ.
މީހުންނަށް އެހީވުމުގެ ކަންކަން ކުރިއަށްދާ އިރު، ފެންބޮޑުވެފައިވާ ހިސާބުތަކުގައި ޑެންގޫ، މެލޭރިއާ އަދި ގޭސްޓްރިކްގެ ސީރިއަސް ސިއްހީ މައްސަލަތައް ފެނުން ދަނީ އިތުރުވަމުންނެވެ.
ހާލުގައި ޖެހިފައިވާ ގިނަ ބަޔަކު މަޑުކޮށްގެން ތިބީ ފެންގަނޑުތައް ކައިރީގަ އެވެ. އެހެންކަމުން އެ ތަންތަނުގައި މަދިރި އާލާވެ، މަދިރީގެ ޒަރިއްޔާއިން ފެތުރޭ ބަލިތައް ހަލުވިކަމާ އެކު ދަަނީ ފެތުރެމުންނެވެ.
ދެކުނު ސިންދް ޕްރޮވިންސްގައި ޑެންގޫގެ 3،830 ކޭސް ރިޕޯޓުކޮށްފައިވާ އިރު، މިހާތަނަށް ނުވަ މީހުން މަރުވެފައިވެ އެވެ.
ޕާކިސްތާން މެޑިކަލް އެސޯސިއޭޝަނުން ބުނީ ސިންދް ޕްރޮވިންސްގެ ހާލަތު ވަރަށް ގޯސް ކަމަށާއި ޓެސްޓު ކުރާ ކޭސްތަކުގެ 80 ޕަސެންޓަކީ ޑެންގޫ ކަމަށެވެ.
މިދިޔަ ހަފްތާގައި އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ޕާކިސްތާނުގެ ފެންބޮޑުވެފައިވާ ހިސާބުތަކަށް ޒިޔާރަތް ކުރެއްވުމަށް ފަހު ވިދާޅުވީ ހާލަތު ވަރަށް ގޯސް ކަމަށެވެ.
ޕާކިސްތާނަށް އެހީވުމަކީ ދުނިޔޭގެ ޒިންމާއެއް ކަމަށާއި މުއްސަނދި ގައުމުތަކުން އިސްނަގައި އެހީވުމަަށް ގުޓެރޭޒް ގޮވާލެއްވި އެވެ.
