ލުބްނާންގެ ވެރިރަށް ބެއިރޫތުގެ ބޭންކެއްގައި ބަޔަކު ރަހީނުކޮށް، އަމިއްލަ އެކައުންޓްގައި ފްރީޒްކޮށްފައި ހުރި ޑޮލަރުތައް ދިނުމަށް ޑިމާންޑްކޮށްފި އެވެ.
އެކަން ކުރީ ހަތިޔާރު ހިފައިގެން ހުރި އަންހެނެކެވެ. އޭނާގެ އެކައުންޓުގައި ހުރި ޑޮލަރު ދިނުމަށް ޑިމާންޑް ކުރީ ދައްތަގެ ސިއްހީ ފަރުވާއަށް ފައިސާ ބޭނުންވާތީ ކަމަށް ބުންޏެވެ.
ރިޕޯޓުތައް ބުނާ ގޮތުން ފުލުހުން އައުމުގެ ކުރިން ކުޑަ ދޮރުން ނިކުމެ އޭނާ ބޭންކުން ދިޔައީ އެކައުންޓުގައި ހުރި 13،000 ޑޮލަރު ދިނުމުންނެވެ. އޭނާ ހައްޔަރު ކުރި ކަމެއް ނޭނގެ އެވެ.
ބޭންކަށް ވަދެ ހިނގި ހާދިސާގެ ވީޑިއޯ، އަންހެން މީހާ އަމިއްލައަށް ވަގުތުން އާއްމުކުރި އެވެ. އޭނާ ބުނީ ޑިމާންޑް ކުރަނީ އޭނާާގެ ހައްގު ހޯދަން ކަމަށެވެ.
"އަހަރެން މިއީ ސެލީ ހާފިޒް. އަހަރެން މިއަދު މި އައީ އަހަރެންގެ ދައްތަގެ ފައިސާ ނަގަން. ދައްތަ އޮތީ ހޮސްޕިޓަލުގައި މަަރު އެނދުގައި."
"އަހަރެން މި އައީ ބަޔަކު މަރާކަށް ނޫން. ހުޅު ޖަހާކަށް ނޫން. އަހަރެން މި އައީ އަހަރެންގެ ހައްގު ހޯދަން،" އެ އަންހެން މީހާ ވީޑިއޯގައި ބުންޏެވެ.
ސެލީ ހާފިޒްގެ މަންމަ އަލްޖަދީދް ޓީވީއަށް ބުނީ އެގޮތަށް އަމަލު ކުރީ މަޖުބޫރުވެގެން ކަމަށާއި އެ ފައިސާ ނަގަން ޖެހުނީ ހަގު ދަަރިފުޅުގެ ކެންސަރު ފަރުވާއަށް ކަމަށެވެ.
އޭގެ ފަހުން އެހެން ސިޓީއެއްގެ ބޭންކެއްގައި ވެސް ބަޔަކު ރަހީނުކޮށް، އަމިއްލަ އެކައުންޓުގައި ހުރި ޑޮލަރު ދިނުމަށް ފިރިހެނަކު ޑިމާންޑް ކުރި ކަމަށް ވެ އެވެ.
ރޮއިޓާޒް ނޫހުން ބުނީ އެ ފިރިހެން މީހާގެ އެކައުންޓްގައި ހުރި 30،000 ޑޮލަރު އޭނާއަށް ދިން ކަމަށާއި އޭނާ އަމިއްލައަށް ގޮސް ފުލުހުންނާ ހަވާލުވި ކަމަަށެވެ.
އިގްތިސާދީ ކާރިސާއާ ގުޅިގެން ލުބްނާންގައި މާލީ ފިޔަވަޅުތަކެއް އަޅާފައިވާ އިރު، ބޭންކުތަކުން މީހުން ރަހީނުކޮށްގެން އަަމިއްލަ އެކައުންޓުން ޑޮލަރު ނެގުމުގެ ހާދިސާތައް ދަނީ އިތުރުވަމުންނެވެ.
ލުބްނާން ފައިސާގެ އަގު ވަރަަށް ބޮޑަށް ވެއްޓިފައިވާ އިރު، 2019 އިން ފެށިގެން ބޭންކުން ނަގުދު ފައިސާ ހޯދުމަކީ ދަތި ކަމެކެވެ. މިހާރު ލުބްނާންގެ 80 ޕަސެންޓް މީހުން ދިރިއުޅެނީ ފަގީރުކަމުގަ އެވެ.
