ބާރުގަދަ ތޫފާނަކަށް ތައްޔާރުވުމުގެ ގޮތުން ޝަންހާއީގެ ދެ އިންޓަނޭޝަނަލް އެއާޕޯޓަށް ކުރާ ހުރިހާ ފްލައިޓް ދަތުރެއް ކެންސަލްކޮށްފި އެވެ.
ތޫފާން މުއިފާއަަކީ މި އަހަރު ޗައިނާއަށް ކުރިމަތިވި 12 ވަނަ ސައިކްލޯނެވެ. އިދާރާތަކުން ގަބޫލުކުރަނީ މިއީ މި އަހަރު މިހާތަނަށް ކުރިމަތިވި އެންމެ ބާރުގަދަ ތޫފާނު ކަމަށެވެ.
އިންޓަނޭޝަނަލް ފްލައިޓްތައް ކެންސަލް ކުރި އިރު، އައްސޭރިފަށުގެ ސަރަހައްދަށް ތޫފާނުގެ އަަސަރު ކުރަން ފެށުމުން ގިނަ އަދަދެއްގެ ޑޮމެސްޓިކް ފްލައިޓް ވެސް ވަަނީ ކެންސަލްކޮށްފަ އެވެ.
ތޫފާން އެރީ ޝަންހާއީ ގަޑިން ބުދަ ދުވަހުގެ ރޭ 07:00 ހާއިރު އެވެ. ފަސް މީޓަރުގެ އުސް ރާޅުތައް ޝަންހާއީ ކައިރިން އުފެދިފައިވާ ކަމަށް ބެލެވެ އެވެ.
ދައުލަތުގެ ޓީވީއިން ބުނީ ޗައިނާގެ އެންމެ ބޮޑު ސިޓީއަށް އާދަޔާ ހިލާފަށް ބޯކޮށް ވާރޭ ވެހުން އެކަށީގެންވާ ކަމަށެވެ. ތައްޔާރުވުމުގެ ގޮތުން ވަގުތީ ހިޔާތައް ހަދާފައިވާ ކަމަށްވެ އެވެ.
ޝަންހާއީގެ ދެކުނުން އޮންނަ ނިންގްބޯ ސިޓީގައި ވެސް ސްކޫލްތައް ބަންދުކޮށް ރަތް އެލާޓު ނެރުނެވެ. މޫސުމާ ބެހޭ އިދާރާއިން ލަފާދިނީ ފެންބޮޑުވެދާނެ ކަމަށް ފިޔަވަޅު އެޅުމަށެވެ.
ޝަންހާއީ އާއި ނިންގްބޯގެ އިތުރުން ޒޫޝާާން ޕޯޓް ސިޓީއަށް ވެސް ތޫފާނުގެ އަސަރު ކުރަމުންދެ އެވެ. ރިޕޯޓުތައް ބުނާ ގޮތުން ޗައިނާގެ 31 ޕްރޮވިންސްގެ ތެރެއިން 12 ޕްރޮވިންސަށް ތޫފާނުގެ އަސަރު ކުރިއަށް އޮތް ދުވަސްތަކުގައި ކުރާނެ އެވެ.
