ޔޫރަޕްގެ ގައުމުތަކަށް ދިމާވެފައިވާ ހަކަތައިގެ ކާރިސާ ހައްލު ކުރުމަށް ކަރަންޓު ބޭނުން ކުރުން މަދުކޮށް، ހަކަތައިގެ ކުންފުނިތަކުން ވަގުތީ ޓެކްސް ނަގަން ޔޫރަޕިއަން ޔޫނިއަން (އީޔޫ) ގެ ޗީފް އުރްސުލާ ވޮން ޑެ ލެޔެން ގޮވާލައްވައިފި އެވެ.
ޔޫރަަޕިއަން ޕާލިމެންޓުގައި އުރްސުލާ ވިދާޅުވީ ފެބްރުއަރީ މަަހު ފެށި ޔޫކްރެއިން ހަނގުރާމައާ ގުޅިގެން ގޭހާއި ކަރަންޓުގެ އަގު ރެކޯޑް މިންވަރަށް މަތިވި ކަމަށެވެ.
އޭނާ ގޮވާލެއްވީ އާއްމުކޮށް އެންމެ ގިނައިން ކަރަންޓު ބޭނުން ކުރާ "ޕީކް" ގަޑިތަކުގައި ކަރަންޓު ބޭނުން ކުރާ މިންވަރު މަދުވެގެން ފަސް ޕަސެންޓުން ކުޑަ ކުރުމަށެވެ.
އެހެން ނަމަވެސް ރަޝިއާއިން އީޔޫއަށް އެކްސްޕޯޓް ކުރާ ގޭހުގެ އަގު ކޮންޓްރޯލް ކުރަަން ރޭވި ރޭވުން މަޑުޖައްސާލާފައިވާ ކަމަށް ވިދާޅުވި އެވެ.
ތެލާއި ގޭސް އަަދި ބޯޓު ދެލި ވިއްކާ ކުންފުނިތަކަށް މި ދަނޑިވަޅުގައި އިތުރަށް ލިބޭ އާމްދަނީއިން "ވިންޑްފޯލް" ޓެކްސް ނަގަން އީޔޫއިން ވަނީ ރާވާފަ އެވެ.
އެ ޓެކްސްގެ ގޮތުގައި 141 ބިލިއަން ޑޮލަރު ލިބޭނެ ކަމަށް ބެލެވޭ އިރު، އެ ފައިސާ ހޭދަކުރާނީ އީޔޫގެ 27 މެމްބަރު ގައުމުގެ އާއިލާތަކާއި ވިޔަފާރިތަކުގެ ހާލަތު ރަނގަޅު ކުރުމަށެވެ.
އީޔޫގެ މެމްބަރު ގައުމުތަކުން އެ ޕްލޭނާ މެދު ވިސްނުމަށް ފަހު، މި މަސް ނިމުމުގެ ކުރިން އެއްބަސްވުމަކަށް ދާން މަސައްކަތް ކުރާނެ އެވެ.
