ރައްޔިތުންގެ މަޖިލީހުގެ މެމްބަރުންގެ އަދަދު ކަނޑައެޅުމަކީ ރައްޔިތުންނާ ސީދާ ގުޅުން ހުރި ކަމެއް ކަމަށާއި އެހެންވީމާ އެއީ ރައްޔިތުންގެ ހިޔާލު ހޯދަން ޖެހޭ ކަމެއް ކަމަށް، މާވަށު ދާއިރާގެ ޕީއެންސީ މެމްބަރު މުހައްމަދު ސައީދު މިއަދު ވިދާޅުވެއްޖެ އެވެ.
އާބާދީ އިތުރުވާ ނިސްބަތުން ރައްޔިތުންގެ މަޖިލީހުގެ މެމްބަރުން އިތުރުވާ ގޮތަށް، ގާނޫނު އަސާސީގައި އޮތް އޮތުން ބަދަލުކޮށް، މިހާރު ތިބި އަދަދުގައި ހިފަހައްޓަން، މާމިނގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް ވަނީ ރައްޔިތުންގެ މަޖިލީހަށް ބިލެއް ހުށަހަޅުއްވައިފަ އެވެ. އެ ބިލަށް މިހާރު ކުރަމުން އަންނަ ބަހުސްގައި ސައީދު ވިދާޅުވީ މަޖިލީހުގެ އެކުލެވޭ ގޮތް ކަނޑައެޅުމަކީ މަޖިލީހުގެ މެމްބަރުންނަށް އޮތް ބާރެއް ނޫން ކަމަށެވެ.
"މީގައި [ގާނޫނު އަސާސީގައި] އެބަ ބުނޭ އިއްޒަތްތެރި ރައީސް، ރައްޔިތުންނާ ގުޅުން ހުރި ކަމެއް ނިންމާ ނަމަ ، ރައްޔިތުންނާ ގުޅޭ މުހިއްމު ކަންކަމުގައި ރައްޔިތުންގެ ހިޔާލު ހޯދުމުގެ އާއްމު ވޯޓެއް ނަަގަން ވާނޭ. މެމްބަރުންގެ ފޯމޭޝަން އަށް ބަދަލު ގެންނަނީ، ފުރަތަމައިނުން ކީއްވެގެންތޯ، އެއީ ސުވާލަކީ. ބަދަލު ގެންނަ ކަމަށް ވަންޏާ މިތާ ތިބި މަޖިލިސް މެމްބަރުންގެ ހައްގެ ނޫނޭ އެއީ އިއްޒަތްތެރި ރައީސް، މި މަޖިލީހުގެ ކަންކަން އޮންނާނެ ގޮތުގެ އާޚިރު ގޮތް ނިންމުމަކީ،" ސައީދު ވިދާޅުވި އެވެ.
މެމްބަރުންގެ އަަދަދު މިހާރު އޮތް ވަރުގައި ހިފަހައްޓަން ގާނޫނު އަސާސީއަށް ބަދަލު ގެންނަން ގާސިމް ހުށަހެޅުއްވި ބިލާ ދެކޮޅަށް ސައީދު ވާހަކަދެކެވި ނަމަވެސް އިދިކޮޅު ބައެއް އެހެން މެމްބަރުން އެ ބިލަށް ތާއީދު ކުރެއްވި އެވެ.
މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގު ވިދާޅުވީ އެ ބިލަށް ތާއީދުކުރައްވާ ކަމަށާއި އެހެން ނަމަވެސް އެ ބިލު ހުށަހެޅުއްވުމުގައި ގާސިމްގެ އިހުލާސްތެރިކަމެއް ހުރި ނަމަ ބިލު ހުށަހަޅުއްވާނީ ކޯލިޝަން ޕާޓީތަކާ މަަޝްވަރާ ކުރައްވައިގެން ކަމަށެވެ.
"[ގާސިމް] ސަރުކާރުގެ ތެރޭގައި، ސަރުކާރުގެ ބޮޑު ޕޯޝަނެއް ނަގައިގެން ހުންނެވި އިރުގައި ސަރުކާރާ ގުޅިގެން މި ބިލު ގެނެސްގެން އިހުލާސްތެރިކަމާ އެކު މިކަން ކުރަން އުޅޭ ނަމަ މިކަން ވެސް ވާނެ،" ތޯރިގު ވިދާޅުވި އެވެ.
އޭނާ ވިދާޅުވީ މަޖިލީހުގެ ސުޕަ މެޖޯރިޓީ އޮންނަ އެމްޑީޕީގެ 66 މެމްބަރުން އެ ބިލާ ދެކޮޅުކަން މަޖިލީހުގައި މިއަދު ކުރި ބަހުސުން އެނގޭ ކަމަށެވެ.
