ދުނިޔޭގެ އާބާދީގެ 50 މިލިއަން މީހުން ނުވަތަ ކޮންމެ 150 މީހުންގެ ތެރެއިން އެކަކު އުޅެނީ އަޅުވެތިކަމުގައި ކަމަށް އިންޓަނޭޝަނަލް ލޭބާ އޯގަނައިޒޭޝަން (އައިއެލްއޯ) އިން ލަފާކޮށްފި އެވެ.
އދ. ގެ މަސައްކަތްތެރިންނާ ބެހޭ ޖަމިއްޔާއިން ނެރުނު ރިޕޯޓެއްގައި ބުނީ ހަނގުރާމަ އާއި މޫސުމީ ބަދަލު އަދި ކޮވިޑް ބަލިމަޑުކަމާ ހެދި ޒަމާނީ އަޅުވެތިކަމުގެ ގޮންޖެހުން ބޮޑުވަމުންދާ ކަމަށެވެ.
މިހާރު ދުނިޔޭގެ އާބާދީގެ 50 މިލިއަން މީހުން އުޅެނީ އަޅުވެތިކަމުގަައި ކަމަށް ބެލެވޭ އިރު، އެއީ މީގެ ފަސް އަހަރު ކުރިއާ އަޅާ ބަލާއިރު 10 މިލިއަން އިތުރެވެ.
އައިއެލްއެއޯއިން ބުނީ މި މައްސަލަ ހައްލު ކުރަން ވަގުތުން ފިޔަވަޅު އަޅަން ޖެހޭ ކަމަށާއި ޓްރޭޑް ޔޫނިއަންތަކާއި، މަސައްކަތްތެރިންގެ ޖަމިއްޔާތަކާއި، ސިވިލް ސޮސައިޓީ އަދި ވަކިވަކި ފަރުދުންގެ ޒިންމާ މުހިއްމު ކަމަށެވެ.
އޭގެ އިތުރުން ޒަމާނީ އަަޅުވެތިކަން އޮންނަނީ ހަމައެކަނި ފަގީރު ގައުމުތަކުގައި ނޫން ކަމަށް އދ. ގެ ރިޕޯޓުގައިވެ އެވެ. މަޖުބޫރުން މަސައްކަތް ކުރުމުގެ މައްސަލަތަކުގެ 50 ޕަސެންޓު ހިނގަނީ މުއްސަނދި ގައުމުތަކުގައި ކަމަށް އަައިއެލްއޯއިން ބުންޏެވެ.
އައިއެލްއޯއިން ޒަމާނީ އަޅުވެތިކަމުގެ ގޮތުގައި މާނަކުރަނީ މަޖުބޫރުން މަސައްކަތް ކުރުވުމާއި ގަދަކަމުން ކައިވެނި ކުރުވުމަށެވެ. އެ ދެ ހާލަތުގައި ވެސް އިންޒާރުތަކާއި، އަނިޔާ އާއި އޮޅުވާލުން އަދި ބާރުގެ ބޭނުން ނާޖައިޒު ގޮތުގައި ކުރާތީ އަނިޔާ ލިބޭ މީހާއަށް ދުރަށް ދާން ގޮންޖެހުންތައް ގިނަ އެވެ.
ގާތްގަނޑަކަށް 27.6 މިލިއަން މީހުން މަޖުބޫރުން މަސައްކަތް ކުރަމުންދާ އިރު، އޭގެ ތެރެއިން 3.3 މިލިއަނަކީ ކުޑަކުދިންނެވެ. އެ ކުދިންގެ ތެރެއިން 50 ޕަސެންޓަށް ވުރެ ބޮޑު ބަޔެއް ހަށިވިއްކުވަން މަޖުބޫރުކޮށްފައިވެ އެވެ.
އޭގެ އިތުރުން 22 މިލިއަނެއްހާ މީހުން އުޅެނީ މަޖުބޫރުން ކޮށްފައިވާ ކައިވެނިތަކުގަ އެވެ. އޭގެ ތިންބައި ކޮށްފައި ދެ ބަޔަކީ އަންހެނުންނެވެ. މަޖުބޫރުން ކައިވެނި ކުރުވާ ގިނަ މީހުންނަށް އެކަން ދިމާވަނީ އުމުރުން 15 އަހަރު ފުރުމުގެ ކުރިންނެވެ.
